Sieryjał, jaki moža stać adkryćciom hoda. Raskazvajem pra «Pierachodny ŭzrost»

Sieryjał pačynajecca jak načny kašmar lubych baćkoŭ. Rankam u dom anhlijskaj siamji Mileraŭ uryvajecca śpiecnaz. Praz kryki jany prabirajucca da spalni, dzie budziać 13-hadovaha Džejmi Milera i aryštoŭvajuć jaho pa abvinavačvańni ŭ zabojstvie (u Brytanii kryminalnaja adkaznaść mahčymaja z 10-hadovaha ŭzrostu). Školnik, jaki baicca navat ihołak na analizie kryvi, traplaje ŭ kamieru i na svoj pieršy dopyt, a žyćcio siamji pieravaročvajecca nazaŭždy.

«Pierachodny ŭzrost» — heta čatyry sieryi, źniatyja adnym kadram. Jak tłumačyli stvaralniki sieryjała, heta aznačaje, što na kamiery naciskajuć knopku «zapis» i nie adklučajuć jaje da taho momantu, pakul nie zdymuć usiu sieryju. 

Hučyć nieskładana, ale ž źniać takoje kino było zusim nie prosta. Spatrebilisia šmatlikija repietycyi i miesiacy padrychtoŭki, u tym liku treba było vyznačyć, dzie ŭ kožny momant zdymak musić znachodzicca taja samaja adzinaja kamiera. I, viadoma, źniać atrymałasia daloka nie ź pieršaha dubla — na kožnuju z čatyroch sieryj pajšło bolš za 10 sprobaŭ. 

Usio heta robić sieryjał šedeŭram u techničnym płanie, navat kali nie zadumvacca pra jaho źmiest. Tym bolš dziŭna, što hałoŭnuju rolu ŭ takich składanych umovach vykanaŭ akcior, dla jakoha «Pierachodny ŭzrost» — debiut u kino. Havorka pra 15-hadovaha Oŭena Kupiera, jaki pryvioŭ u zachapleńnie svajoj pracaj i krytykaŭ, i prostych hledačoŭ. Vas urazić taja addanaść i ščyraść, ź jakoj chłopiec pracuje ŭ kadry, toje, jak jon trymaje na sabie ŭvahu. Niezdarma, što ciapier Oŭenu praročać uźlot u karjery.

Asobnaje miesca ŭ sieryjale zajmaje Styvien Hrem, viadomy brytanski akcior, jaki hraje Edzi Milera, baćku Džejmi. Razam z Kupieram jany raskryvajuć adno z hałoŭnych pytańniaŭ sieryjała — adnosiny pamiž baćkam i synam.

Jašče budučy ŭ šoku paśla aryštu, Džejmi prosić baćku być jaho davieranaj asobaj u śledčych dziejańniach. Tak Edzi Miler apynuŭsia la syna, kali Džejmi pakazali adzin z najvažniejšych dokazaŭ u jaho spravie. Baluča i mocna, jak jon vahajecca pamiž vieraj u nievinavataść małoha i ciskam dokazaŭ, i jak urešcie znachodzić u sabie moc abniać Džejmi.

Niezdarma hety sieryjał maje nazvu «Pierachodny ŭzrost». Heta nie prosta kryminalnaja drama: nam nie pakazvajuć zabojstva, achviaru, nie pravodziać pa ŭsim šlachu śledstva i suda. Hety prajekt, chutčej, razvaha pra sučasnych padletkaŭ, toje, jak jany daśledujuć śviet, samich siabie i svaju seksualnaść, i jak na hetym šlachu jany mohuć paviarnuć nie ŭ toj bok.

Hetym sieryjał i strašyć, i ŭražvaje, i asabliva ciažka jaho budzie hladzieć baćkam. Siamja Džejmi takaja prostaja i zvyčajnaja: baćka-santechnik, maci, siastra-padletak. Jak jany apynulisia ŭ situacyi, kali śpiecnaz łamaje dźviery ŭ ich doma, a ich syna abvinavačvajuć u ciažkim złačynstvie? Niaŭžo jany zrabili niešta nie tak? I ci možna harantavać, što šlach tvajho dziciaci budzie biazvobłačnym?

U apošniaj sieryi nam dajuć adkaz słovami Edzi Milera: «My nie vinavatyja, nielha siabie vinavacić». Ale što rabić, kali tak chočacca znajści adkaznaha?

Pavialičyć

«Pierachodny ŭzrost» — heta jašče i razvaha pra sapraŭdnuju maskulinnaść, pra ŭspryniaćcie mužčynskaha połu i pra toje, što heta nasamreč takoje — być mužčynam u situacyi, kali ty nie možaš ničoha zrabić, kali niama nijakaha sposabu dastać tvajo dzicia z-za krataŭ. Asobny važny momant — historyja z dniom naradžeńnia Edzi, jaki siamja sprabuje śviatkavać tak, nibyta ničoha nie zdaryłasia, ale praŭdu nie schavać ad siabie.

Zdajecca, adzin z hałoŭnych sensavych momantaŭ sieryjała — pytańnie, jakoje Džejmi zadaje psichołahu: «Ja vam padabajusia?» Hety padletak akazaŭsia našmat praściejšym za darosłych, jakija nie zdoleli svoječasova pačuć jahony bol, zatoje abkłali jaho ŭmoŭnaściami svaich palicejskich spraŭ i psichałahičnych ekśpiertyz.

Mahčyma, «Pierachodny ŭzrost» vyratuje niekaha ad takoha losu ci chacia b matyvuje baćkoŭ na jašče adnu hłybokuju hutarku ź dziećmi. Čym nie pośpiech?

• 12
• 2
• 1
• 1
• 0
• 2
• 0
• 0