Mužčyna padchapiŭ ciažkuju infiekcyju lohkich praz zvyčku niuchać svaje brudnyja škarpetki
U Kitai amatar niuchać svaje brudnyja škarpetki paśla praciahłaha ich našeńnia trapiŭ u balnicu. Miedyki vyjavili, što mienavita hety pradmiet harderobu staŭ krynicaj śmiarotna niebiaśpiečnaha hrybka. I heta nie pieršy taki vypadak.
Jak paviedamlaje Daily Mail, u Čuncynie, što znachodzicca na paŭdniovym zachadzie Kitaja, ofisny rabotnik siarednich hadoŭ trapiŭ u špital z mocnym kašlem, jaki nie davaŭ jamu spać, niahledziačy na pryjom lekaŭ.
Miedycynskaje abśledavańnie pakazała tryvožnyja prykmiety ciažkaj infiekcyi ŭ pravym lohkim. Lekary praviali bronchaskapiju i vyśvietlili, što ŭ pacyjenta aśpierhiloz — zachvorvańnie, vyklikanaje pleśnievym hrybkom Aspergillus, jaki lubić vilhotnyja i ciopłyja miescy.
Padčas razmovy z pacyjentam daktary daviedalisia, što jon časta niuchaŭ svaje škarpetki paśla doŭhaha našeńnia. Analiz pakazaŭ, što na ich sapraŭdy prysutničaje toj samy štam hrybka, jaki vyklikaŭ chvarobu.
Jak patłumačyli śpiecyjalisty, zakrytaja, vilhotnaja i ciopłaja prastora ŭ abutku i škarpetkach — idealnaje asiarodździe dla raźvićcia hrybkoŭ. Kali ŭdychnuć ich spory, asabliva pry asłablenym imunitecie, u čałavieka moža raźvicca hrybkovaja pnieŭmanija.
Na ščaście, pacyjent dobra adreahavaŭ na supraćhrybkovyja preparaty i ŭ chutkim časie byŭ vypisany.
Heta nie pieršy padobny vypadak u Kitai. U 2018 hodzie 37-hadovy mužčyna z Čžančžoŭ taksama trapiŭ u balnicu z kašlem i bolem u hrudziach. Jon pryznaŭsia, što mieŭ zvyčku niuchać ułasnyja škarpetki.
Tady lekary vyznačyli, što infiekcyja raspaŭsiudziłasia praz spory hrybka, jakija byli ŭ jaho abutku. Dadatkovym faktaram, jaki paŭpłyvaŭ na raźvićcio zachvorvańnia, staŭ źnižany imunitet z-za chraničnaha niedasypańnia, źviazanaha z dohladam za dziciem.
Śpiecyjalisty adznačajuć, što aśpierhiloz redka sustrakajecca ŭ zdarovych ludziej, ale moža być niebiaśpiečnym dla tych, chto maje zachvorvańni lohkich (naprykład, astmu) abo asłableny imunitet (naprykład, u ankałahičnych chvorych).
Simptomy ŭklučajuć kašal z vydzialeńniem makroty z kryvioju, zadyšku, vysokuju tempieraturu, stomlenaść i rezkaje źnižeńnie vahi. U ciažkich vypadkach mahčymyja kryvacioki ŭ lohkich, pnieŭmanija i navat raspaŭsiudžvańnie hrybka na serca ci mozh.
Asabliva niebiaśpiečnaja forma — invaziŭny aśpierhiloz, jaki, pavodle niekatorych daśledavańniaŭ, zabivaje da 88% pacyjentaŭ z mocna asłablenym imunitetam.
Hrybok Aspergillus vielmi raspaŭsiudžany, i całkam paźbiehnuć kantaktu ź im amal niemahčyma. Adnak ludziam z hrupy ryzyki daktary rajać paźbiahać kamposnych kučaŭ i apałaj listoty, padtrymlivać dobruju vientylacyju i dastatkova suchoje pavietra ŭ domie, kab praduchilić rost hrybka.
Lačeńnie zaležyć ad ciažaru zachvorvańnia: u bolšaści vypadkaŭ dapamahajuć supraćhrybkovyja preparaty, ale niekatorym davodzicca prymać ich usio žyćcio. Časam patrabujecca chirurhičnaje vydaleńnie «hrybkovych šaroŭ» (ščylnych zhustkaŭ) u lohkich.
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary
Padajecca, samy biaśpiečny varyjant - pukać u škarpiektu. Asabliva, kali śpiš u mietro biez trusoŭ.