Sieuł nie budzie supraciŭlacca amierykanskim taryfam praz «histaryčny doŭh» Karei pierad ZŠA
Paŭdniovaja Kareja hatovaja da sastupak u handlovych pieramovach z ZŠA, navat niahledziačy na balučyja taryfy. Časovy kiraŭnik krainy Chan Dak Su zajaviŭ, što Sieuł «nie budzie zmahacca», bo adčuvaje histaryčny abaviazak pierad Vašynhtonam.
Na fonie novych 25-pracentnych taryfaŭ, uviedzienych administracyjaj Donalda Trampa suprać karejskich tavaraŭ, u tym liku aŭtamabilaŭ i mikračypaŭ, vykonvajučy abaviazki prezidenta Paŭdniovaj Karei Chan Dak Su zajaviŭ: «Rola ZŠA była vyrašalnaj u tym, što Kareja stała takoj, jakoj jana jość siońnia».
Jon padkreśliŭ, što paśla Karejskaj vajny ZŠA dali krainie dapamohu, inviestycyi, technałohii i harantyi biaśpieki, što zrabiła Kareju pryvabnaj dla zamiežnych układańniaŭ.
«My nie budziem usprymać dziejańni ZŠA jak niešta, suprać čaho treba baranicca. My šukajem vyjhryšnyja rašeńni dla abodvuch bakoŭ», — zajaviŭ Chan napiaredadni pieramovaŭ z Trampam.
Niahledziačy na toje, što pamiž krainami isnuje damova ab svabodnym handli, Paŭdniovaja Kareja sutyknułasia z šeraham novych abmiežavańniaŭ z boku ZŠA. U toj ža čas Chan zajaviŭ pra hatoŭnaść skaračać handlovy lišak (jon skłaŭ rekordnyja $55 młrd u 2024 hodzie) i razhledzieć źnižeńnie nietaryfnych barjeraŭ — naprykład, u śfiery aŭtamabilnych vykidaŭ, cenaŭtvareńnia na leki i impartu amierykanskaj jałavičyny.
Jon taksama vykazaŭ hatoŭnaść abmierkavać pavyšeńnie supracoŭnictva ŭ budaŭnictvie vajennych karabloŭ i zakupy amierykanskaha ZPH i samalotaŭ.
Tramp ža adkryta źviazvaje handal ź biaśpiekaj i zaklikaje Sieuł bolš apłačvać prysutnaść amal 28 500 amierykanskich vajskoŭcaŭ na paŭvyśpie. Chan pakul nie paćvierdziŭ, ci hatovy pierahladać hetaje pahadnieńnie, ale pakinuŭ mahčymaść dla pieramoŭ.
Pry hetym sam Chan, jaki vykonvaje abaviazki paśla impičmientu Jun Sok Jola, sutykajecca z pytańniami pra lehitymnaść svaich dziejańniaŭ. Apazicyja śćviardžaje, što taki handlovy kurs moža abmiežavać mahčymaści nastupnaha abranaha prezidenta.
2 krasavika Donald Tramp, adznačajučy abvieščany im «dzień vyzvaleńnia Amieryki», zajaviŭ pra šyrokamaštabnaje ŭviadzieńnie myt na impart amal z usiaho śvietu. Heta faktyčna stała pačatkam novaj handlovaj vajny, jakaja zakranuła dziasiatki krain i rynkaŭ.
Najbolš žorstkija miery byli pryniaty suprać Kitaja — paśla niekalkich raŭndaŭ uzajemnaha ŭźniaćcia taryfaŭ ahulny ŭzrovień pošlin na kitajskija tavary dasiahnuŭ 145%.
Abviaščeńnie novaj palityki vyklikała paniku na finansavych rynkach.
Praź niekalki dzion paśla chvali krytyki Tramp abviaściŭ pra 90-dzionnuju zamarozku novaha etapu myt dla bolš za 75 krain, jakija źviarnulisia z prośbaj pra dyjałoh i nie stali adkazvać uzajemnymi mierami. Ich tavary časova abkładajucca «bazavymi» pošlinami ŭ 10%, uviedzienymi raniej.
Niekatoryja krainy ŭžo raspačali pieramovy. U pryvatnaści, Japonija viadzie aktyŭny dyjałoh z Vašynhtonam.
«Dostup da rynku pieratvarajecca ŭ zbroju». Si farmiruje novy azijacki aljans suprać ZŠA
Stała viadoma, jak Tramp choča nacisnuć na Kitaj u raźviazanaj handlovaj vajnie
Biełarus raskazaŭ, jak novyja handlovyja taryfy ZŠA adbilisia na pracy jaho zavoda ŭ Techasie
Chto prymusiŭ Trampa raptoŭna admovicca ad uviadzieńnia taryfaŭ
Ciapier čytajuć
«Chavaješ svoj žach, bo heta škilet sa skuraj». Śviatłana Cichanoŭskaja pryznałasia, ci paznała Siarhieja praź piać hadoŭ1
Kamientary