Biełarus raspracavaŭ pierakładčyk dla biznesu, jaki prynosić jamu miljon dalaraŭ na hod
Uradženiec Navapołacka Alaksiej Rudak pačynaŭ z raspracoŭki prostych mabilnych prahram, ale zatym stvaryŭ niejronny pierakładčyk, jaki pracuje afłajn. Ciapier jaho startap maje amal miljon dalaraŭ na hod.
Historyju pośpiechu 39-hadovaha biełarusa Alaksieja Rudaka raskazvaje vydańnie Forbes.ru.
Chłopiec naradziŭsia ŭ siamji pradprymalnika z Navapołacka. U 12 hadoŭ u jaho źjaviŭsia pieršy noŭtbuk. Spačatku Alaksiej prosta hulaŭ u videahulni, paźniej pačaŭ asvojvać Photoshop i Microsoft Word, a praź niekatory čas jamu zachaciełasia stvaryć ułasny prajekt, jaki b byŭ karysny dla inšych. Tak chłopiec zachapiŭsia prahramavańniem.
Paśla škoły Alaksiej pastupiŭ u Biełaruski dziaržaŭny technałahičny ŭniviersitet na napramak «infarmacyjnyja technałohii» a na piatym kursie ŭładkavaŭsia raspracoŭščykam u minskuju IT-kampaniju Artezio.
Pieršyja niaŭdačy i pośpiech
Jak raskazvaje sam Rudak, u 2011 hodzie jon syšoŭ z kampanii, viarnuŭsia ŭ Navapołack i na sabranyja 5000 dalaraŭ zasnavaŭ ułasny biznes — staŭ raspracoŭvać mabilnyja prahramy.
Adnak ich nie atrymałasia kamiercyjalizavać, i chłopiec viarnuŭsia ŭ najm — minskuju IT-kampaniju Oxagile. Praz hod, naźbiraŭšy tuju ž sumu ŭ dalarach i nabraŭšysia vopytu ŭ biznesie mabilnych prahram, jon znoŭ syšoŭ u svabodnaje płavańnie.
Rudak vyrašyŭ chutka vypuścić mnostva prostych prahram u AppStore, kab zrazumieć, što najbolš zapatrabavana. Dla hetaha jon raspracavaŭ płatformu, jakaja kambinavała napisanyja im častki kodu dla zborki prahram z hatovych modulaŭ, što dazvoliła stvarać novy dadatak za 2-3 dni.
Za dva hady jon vykłaŭ kala 500 prahram — kalkulatary kałoryj, pierakładčyki, hulni, navihatary — z ubudavanaj rekłamaj i płatnymi funkcyjami. Heta prynosiła jamu 5000-7000 dalaraŭ štomiesiac, a paźniej — da 25 000 dalaraŭ. Jon nabyŭ aŭto, kvateru i abjeździŭ bolš za 15 krain.
Adnak z časam Rudak straciŭ cikavaść: padarožžy nadakučyli, a karystalniki pačali skardzicca na biessensoŭny kantent.
«Mnie było soramna. Ja zrazumieŭ, što čas zapuskać surjozny prajekt», — uspaminaje pradprymalnik.
Kod z dysiertacyi
IT-pradprymalnik zaŭvažyŭ, što najbolšy dachod prynosili pierakładčyki. Pry hetym karystalniki šukali dadatkovyja funkcyi, jakich nie było ŭ Google Translate (hłasaryj, navučańnie movie). Jon vyrašyŭ zasiarodzicca na hetaj nišy.
U 2017 hodzie Rudak zarehistravaŭ kampaniju na Kipry pad nazvaj Lingvanex i naniaŭ praz aŭtsorsinhavuju firmu kamandu ź siami raspracoŭščykaŭ ź Biełarusi.
Raspracavanyja dadatki pracavali na bazie Cloud Translation API — prahramnaha interfiejsu Google, jaki dazvalaje intehravać funkcyju pierakładu ŭ inšyja servisy, ale kamisii da 60% padšturchnuli chłopca šukać ułasnaje rašeńnie.
Kab paźbiehnuć zaležnaści ad Google, jon zadumaŭ raspracavać ułasnuju madel, jakaja b pracavała afłajn. Heta była niša, jakuju Google pakul nie achapiŭ.
Samastojna jaje stvaryć było ciažka: zvyčajnyja niejrasietki zajmali šmat pamiaci i drenna ściskalisia, a inviestary admaŭlali, nie bačačy sensu kankuravać z Google.
Rudak vyjšaŭ na kafiedru kampjutarnaj linhvistyki Politechničnaha ŭniviersiteta Valensii (Ispanija) i za 3000 dalaraŭ zamoviŭ kampaktnuju niejronnuju moŭnuju madel. Aśpirantka kafiedry raspracavała anhła-ispanski pierakładčyk, kod jakoha staŭ vynikam jaje dysiertacyi. Kamanda Rudaka vykarystała jaho jak asnovu dla dadavańnia inšych moŭ u Lingvanex.
Strach usio zhubić
U 2019 hodzie ŭ pierakładčyku Lingvanex užo padtrymlivałasia 10 moŭ, u tym liku francuzskaja i niamieckaja. Rudak praciahvaŭ zarablać kala 30 000 dalaraŭ na miesiac na rekłamie i padpiskach, ź jakich prykładna pałovu prynosili pierakładčyki. Bolšaść hetaha dachodu išła na ŭtrymańnie kamandy, jakaja da taho času razrasłasia da 12 čałaviek.
Adnak rynak staŭ bolš kankurentnym: Google zapuściŭ ułasny niejronny pierakład u afłajn-režymie, chutkimi tempami rasła papularnać startapa DeepL.
Pa słovach Rudaka, jon adčuvaŭ strach, što moža ŭsio stracić. Inviestary praciahvali admaŭlać, dachod z AppStore pačaŭ padać.
Na hetym fonie znajomy paraiŭ jamu zasiarodzicca na B2B-siehmiencie. Rudak ubačyŭ u hetym mahčymaść adroźnivacca ad Google i DeepL, pačaŭ raspracoŭvać bolš biaśpiečny i funkcyjanalny pierakładčyk dla kampanij i ŭkłaŭ u jaho kala 500 000 dalaraŭ ułasnych aščadžeńniaŭ.
Praz hod pieršaja viersija praduktu była hatovaja, a jašče dva hady jaje dapracoŭvali razam z movaznaŭcami. Novy Lingvanex možna było intehravać u karparatyŭnyja sistemy praz API, pierakładać fajły na roznych movach i pracavać u afłajn-režymie.
Pieršym klijentam stała amierykanskaja analityčnaja kampanija, jakaja sama vyjšła na Rudaka. Da taho času jon zmoh pieramahčy na minskaj kanfierencyi Venture Day.
U 2022 hodzie braŭzier Vivaldi intehravaŭ Lingvanex u svaju sistemu biaspłatna. Rudak pahadziŭsia na heta, kab prasunuć pradukt i prateściravać jaho na pamyłki. Vyručka za toj hod skłała 534 000 jeŭra. U servisa było try karparatyŭnyja klijenty i 3000 karystalnikaŭ z padpiskaj pa 43 jeŭra na hod.
U nastupnyja dva hady ŭ Lingvanex źjavilisia novyja funkcyi: aŭtamatyčnaje raspaznavańnie i pierakład havorki, instrumienty dla karotkaha pierakazu tekstu i ananimizacyi dadzienych.
Da śpisu klijentaŭ dałučylisia kampanii Rolls Royce, Reverso, Liebherr, braŭzier Opera i inšyja.
Kampanii płaciać ad 3000 da 250 000 jeŭra ŭ hod. U kancy 2024 hoda ŭ jaje było 80 karparatyŭnych klijentaŭ, bolš za 7000 pryvatnych karystalnikaŭ. Prybytak skłaŭ zvyš 890 000 jeŭra. Pry hetym zarpłata Rudaka na miesiac składaje 5000 jeŭra. Astatniaje idzie na raźvićcio.
Mary pra les i rybałku
Pa słovach śpiecyjalistaŭ, asnoŭnyja pieravahi Lingvanex — afłajn-pierakład, što pazbaŭlaje kampanii ad ryzyki ŭciečki infarmacyi, a taksama zachavańnie zychodnaha farmatavańnia. Dla Opera jon daje pierakład na 109 moŭ i kaštuje ŭ čatyry razy tańniej za Google.
Rudak pryznajecca, što maje namier na praciahu dvuch hadoŭ pradać svoj startap stratehičnamu inviestaru, što dazvolić Lingvanex achapić značna bolš klijentaŭ i zasiarodzicca na palapšeńni jakaści asobnych pierakładčykaŭ.
Sam biznesmien hatovy zastacca ŭ kamandzie i raźvivać technałahičnuju častku prajektu, źniaŭšy ź siabie inšyja kiraŭničyja abaviazki.
«Paśla prodažu ja pierastanu dumać pra hrošy i zmahu žyć u svajo zadavalnieńnie — źjechać u les, łavić rybu», — pryznajecca Rudak.
Kamientary
Voś typovy kamientaryj pakryŭdžanaha psieŭdabiełarusa, jaki ŭsio razumieje i viedaje zahadzia, tolki lanujecca daviedacca. Treba ž niejak padsiłkoŭvać svajo adčuvańnie elitarnaści na fonie niapravilnaha narodca i biźniesmienaŭ.
Znajści śpis moŭ u praduktach nieskładana, 5 siekund.