ZŠA prapanujuć Ukrainie mirny płan, jaki dazvolić Pucinu zachavać zachoplenyja terytoryi. Stali viadomyja amierykanskija prapanovy
Novy prajekt mirnaj damovy, prapanavany pradstaŭnikami Donalda Trampa, praduhledžvaje pryznańnie Kryma častkaj Rasii i zamacavańnie linii frontu, što dazvolić Pucinu zachavać amal usie zachoplenyja terytoryi. Ukraina ž, pavodle ŭmoŭ, nie atrymaje amal nijakich vyraznych harantyj biaśpieki ad ZŠA.
Pavodle płana, pra jaki pišuć adrazu niekalki zachodnich ŚMI, u tym liku The Telegraph, i jaki budzie abmiarkoŭvacca ŭ Łondanie ŭ sieradu, ZŠA prapanujuć mirnaje pahadnieńnie, jakoje praduhledžvaje pryznańnie Kryma rasijskaj terytoryjaj, a taksama faktyčnuju lehitymacyju kantrolu Rasii nad inšymi akupavanymi terytoryjami, uklučajučy častki Danieckaj, Łuhanskaj, Chiersonskaj i Zaparožskaj abłaściej.
Asnoŭnyja punkty płana
Ukraina pavinna admovicca ad imknieńnia da ŭstupleńnia ŭ NATO, ale zachoŭvaje prava dałučycca da Jeŭrasajuza.
Pryznańnie ZŠA Kryma jak terytoryi Rasii.
Zamacavańnie ciapierašniaj linii frontu, što dazvolić Rasii zachavać bolšuju častku zachoplenych terytoryj.
Rasija addaść dva nievialikija rehijony va Ukrainie, a taksama zabiaśpiečyć dostup da vuścia Dniapra i častkova vyviedzie vojski z Chiersonskaj vobłaści.
Zaparožskaja AES pierachodzić pad kantrol ZŠA, adbyvajecca enierhietyčnaje supracoŭnictva ZŠA z RF, a amierykanskija kampanii atrymlivajuć dostup da karysnych vykapniaŭ Ukrainy.
ZŠA zdymuć usie sankcyi suprać Rasii i pačnuć novy etap supracoŭnictva ŭ śfiery enierhietyki.
Płan padrychtavany hienierałam Kitam Kiełaham i jaho kaleham Styvam Uitkafam, jaki płanuje prezientavać jaho Pucinu paśla reakcyi Kijeva. Adnak ukrainskija ŭłady skieptyčna nastrojeny i nie čakajuć zaklučeńnia damovy ŭ Łondanie. Ukazvajecca, što navat i Uładzimir Pucin moža nie pahadzicca na častkovuju zdaču terytoryj.
Akramia taho, pavodle kanstytucyi Ukrainy, pieradača terytoryi mahčymaja tolki praz refierendum, ale va ŭmovach vajennaha stanovišča takija refierendumy zabaronieny.
Brytanski premjer Kir Starmier raniej zajaŭlaŭ, što nivodzin jeŭrapiejski kantynhient nie moža być nakiravany va Ukrainu biez harantyj biaśpieki z boku ZŠA, ale prapanavany płan nie ŭtrymlivaje takoj harantyi.
U toj ža čas vydańnie Axios piša, što Ukraina hatovaja abmierkavać siońnia 30-dzionnaje spynieńnie ahniu, ale nie prymaje mirny płan Trampa.
Ciapier čytajuć
Kryk dušy Biaspałava pra Cichanoŭskaha: Jon pieratvarajecca ŭ Łukašenku 2.0, heta trajanski koń73
Kamientary
Mo iran sabraŭsia bambić
A mo kitajcaŭ ad Tajvania adpužvać.