Ejsmanty na «Majbachu», Baskaŭ na «Bentli». Chakiejny siezon u Minsku zakryli z šykam-blaskam
30 krasavika ŭ Minsku adbyłasia ŭračystaja cyrymonija zakryćcia chakiejnaha siezona. Pahladzieli, na jakich aŭtamabilach tudy pryjazdžali hości.
Hości źjazdžalisia da restarana «Lebiadziny» kala vadaschovišča Drazdy. Viałasia tranślacyja — adčuvałasia, jak režysiory cyrymonii chacieli prademanstravać šykoŭnyja aŭtamabili, na jakich pryjazdžali topavyja spartsmieny i roznyja funkcyjaniery.
Pieršym prybyŭ staršynia Fiederacyi chakieja Biełarusi Alaksandr Bahdanovič. Viadučyja padkreślili: heta nie hość, a haspadar mierapryjemstva. Jaho pryvieźli na Hongqi E-HS9 — fłahmanskim elektrakrasoviery kitajskaha premium-brenda Hongqi. Hety luksavy aŭtamabil časta nazyvajuć kitajskim Rolls-Royce.
Razam z Bahdanovičam z mašyny vyjšaŭ hienieralny sakratar fiederacyi Andrej Baško.
Sienatar Dźmitryj Baskaŭ vyrašyŭ nie padtrymlivać niachaj i luksavyja, ale ž kitajskija aŭtamabili, i pryjechaŭ na čornym Bentley Continental GT. Pry hetym, za rulom siadzieŭ jon sam. Viadučyja prezientavali Baskava jak zakanadaŭcu mod.
Siarod minskich kampanij, jakija zdajuć aŭtamabili ŭ arendu, amal niama prapanoŭ arendy Bentley biez kiroŭcy — tym bolš, kali aŭtamabil patrebny ŭsiaho na niekalki hadzin. Arandavać anałahičny Bentley na dzień kaštuje ad 1138 rubloŭ.
Ale zdajecca, heta ŭsio ž nie zvyčajny arendny aŭtamabil, bo šmat pytańniaŭ vyklikaje tanavańnie jaho voknaŭ. Zhodna ź biełaruskimi praviłami łabavoje škło moža być zataniravana tak, kab śviatłoprapuskańnie składała nie mienš za 75%, a piaredniaje bakavoje škło (z boku vadziciela i piaredniaha pasažyra) — nie mienš za 70%. Tut taniroŭka vyhladaje značna ciamniejšaj.
Natalla i Ivan Ejsmanty prybyli na premijalnym Mercedes-Maybach GLS 600 z palepšanym raskošnym azdableńniem i dadatkovymi funkcyjami. Darečy, nabyć anałahičny Maybach u Minsku možna pryblizna za 380 tysiač dalaraŭ. Madel ekskluziŭnaja, prosta ŭ prakacie takuju nie znojdzieš.
Natalli Ejsmant, darečy, jakaja kupiła kvateru ŭ ŽK «Alimpik park», da restarana iści pieššu zusim niedaloka, ale status abaviazvaŭ prybyć na aŭto.
Vasil Dziemčanka, bramnik minskaha «Dynama», pryjechaŭ na retraaŭtamabili Rolls-Royce Silver Wraith. Anałahičnyja aŭto znajści ŭ prakacie składana, a ceny na retraaŭtamabili latuć u kosmas: arenda na sutki kaštuje ad 2240 rubloŭ.
Kamandu «Junactva-Minsk» pryvieźli na limuzinie Cadillac Escalade. Hadzina arendy takoha kaštuje ad 250 da 400 rubloŭ.
Ale najbolš dziŭna na spartyŭna-śvieckim mierapryjemstvie, mabyć, vyhladaŭ limuzin-kareta. Stvorany hety cud inžyniernaj dumki na bazie Chrysler PT Cruiser. Vializnyja vokny nahadvajuć vitryny viasielnaha sałonu, štory byccam by časova pazyčyli ŭ Pałacy Niezaležnaści, a dekor na kuzavie vyklikaje ŭstojlivyja asacyjacyi z tortam.
Pryviezła kareta nie Papiałušku, a chakieistaŭ Aleha Kačałoŭskaha, Uładzisłava Martyniuka i Marka Rudakoŭskaha. Darečy, arenda takoha niezvyčajnaha limuzina ŭ Minsku kaštuje 179 rubloŭ za hadzinu (kali arandavać mienš, čym na try hadziny) i 200 rubloŭ, kali treba prosta advieźci z punktu A ŭ punkt B.
Kamientary
Na viełosipiedie.
A za nimi kot
Zadom napieriod.
A za nim komariki
Na vozdušnom šarikie.
A za nimi raki
Na chromoj sobakie.
Ejsmonty - na Majbachie,
Baksov - na Bientle.
Jedut i śmiejutsia,
Prianiki žujut.
Tam jeŝie dalšie čto-to pro Tarakana było;)