Novaja kiraŭnica PVT raskazała, jak źmienicca praca ź IT-kampanijami ŭ Biełarusi
Hanna Rabava, niadaŭna pryznačanaja kiraŭnikom Parka vysokich technałohij (PVT), u intervju «Pieršamu infarmacyjnamu» zajaviła, što kardynalnych reformaŭ u PVT pakul nie płanujecca — jon raźvivajecca stabilna. Adnak jość peŭnyja akcenty, na jakich ciapier choča zasiarodzicca dziaržava.
Na pieršym pasiadžeńni naziralnaj rady PVT premjer-ministr Biełarusi Alaksandr Turčyn, pa słovach Hanny Rabavaj, vyłučyŭ dva hałoŭnyja kirunki:
- stvareńnie adkrytaha i efiektyŭnaha kanała, praź jaki raspracoŭki PVT-rezidentaŭ buduć traplać u ekanomiku i dziaržaŭnyja struktury;
- padtrymka asiarodździa, dzie źjaŭlajucca novyja talenavityja śpiecyjalisty i kampanii, u tym liku praz supracoŭnictva z adukacyjaj dla padrychtoŭki inžyniernych kadraŭ.
Rabava taksama adznačyła, što asobnaj tendencyjaj ciapier vyłučajucca kryptakampanii. Akramia taho, cikava raźvivajecca napramak stvareńnia prahramna-aparatnych kompleksaŭ — heta nie prosta soft, a techničnyja inavacyi.
Što da śpiecyjalistaŭ, jakija raniej vyjechali z krainy, to kiraŭnica PVT padkreśliła, što, maŭlaŭ, dla ŭsich, chto choča pracavać i prynosić karyść Biełarusi, dźviery adčynienyja. IT-śfiera vielmi dynamičnaja i mabilnaja, ale luboŭ da radzimy, pa słovach čynoŭnicy, nichto nie admianiaŭ.
«Tut, napeŭna, havorka budzie iści pra toje, nakolki hetyja ludzi hatovyja viarnucca, hatovyja pracavać na tych praviłach i ŭstanoŭkach, jakija daje naša kraina. I nakolki my sa svajho boku prapanujem režym, umovy, jakija maksimalna dazvalajuć im zadavolić svaje ambicyi. Tamu tut taki dvuchbakovy ruch», — skazała Rabava.
Na siońnia ŭ PVT zarehistravanyja bolš za 1000 kampanij, u jakich pracujuć kala 60 tysiač čałaviek.
Nahadajem, što Hanna Riabova stała kiraŭnicaj PVT u kancy maja. Da hetaha jana była namieśnicaj ministra suviazi i infarmatyzacyi i zajmałasia raźvićciom ličbavaj ekanomiki i inavacyj.
Kamientary