Rasijanie zapuścili ŭ Biełarusi dziŭny miesiendžar — rehistracyja pa numary telefona, a voś vydalicca možna tolki kali dazvolać

Kab zarehistravacca ŭ Max, vam spatrebicca ŭvieści numar telefona, kudy pryjdzie paviedamleńnie z kodam. Ciapier dla hetaha padydzie tolki rasijskaja ci biełaruskaja sim-karta. Atrymali kod — treba ŭvieści jaho ŭ miesiendžary, a potym napisać svajo imia i, kali žadajecie, proźvišča. 

Dalej treba zapampavać fota na avatar ci vybrać dla hetaj mety adzin z malunkaŭ u troch stylach. I možna karystacca!

Pavialičyć

U samim miesiendžary karystalnika čakajuć dva boty. Pieršy — bot samoha dadatka, zrobleny «dla karysnych paviedamleńniaŭ i navinaŭ», a taksama dla instrukcyj pa karystańni prahramaj. Druhi bot — niejrasietka GigaChat ad rasijskaha Śbierbanka. Hety servis užo moža być karysny: z dapamohaj GigaChat, naprykład, možna hienieravać teksty i malunki, pieravodzić aŭdyjapaviedamleńni ŭ tekst, ścisła pierakazvać teksty i videa.

Pavialičyć

Dyzajn prahramy nahadvaje Telehram i Vatsap. Ciapier Max maje bazavy funkcyjanał miesiendžara: naprykład, u im možna pierapisvacca, rabić zvanki, zapisvać hałasavyja i videapaviedamleńni, dasyłać fajły. Pytańnie ŭ tym, kab było z kim pierapisvacca. Dla paraŭnańnia: na siońnia Max maje bolš za 100 tysiač spampoŭvańniaŭ na Google Play, a ŭ vypadku z Telehramam hety pakazčyk pieravaliŭ bolš za miljard.

Z vosieni, adnak, situacyja kryšku vypravicca, bo Max pačnuć prymusova ŭstaloŭvać na ŭsie smartfony i płanšety, jakija buduć pradavać u Rasii. Dalej u prahramu abiacajuć dadać funkcyi elektronnaha podpisa i ličbavaha pašparta, ździajśniać bankaŭskija apieracyi. 

Usio heta, kaniečnie, aktualna mienavita dla hramadzian Rasii, i tym nie mienš u Max praduhledžanaja rehistracyja biełarusaŭ. Navošta? Stvaralniki Max, chołdynh VK, ničoha nie kazali pra raspaŭsiud prahramy ŭ Biełarusi. Ale kali i biełarusy atrymajuć u prahramie funkcyjanał nakštałt bankaŭskich apieracyj, vidavočna, što ŭ rukach rasijskich haspadaroŭ Max moža akazacca vielmi adčuvalnaja infarmacyja.

Da biaśpieki ŭ Max jość pytańni, i sprava nie tolki ŭ tym, što miesiendžar stvaryła rasijskaja kampanija i za jaho padtrymku hałasavali ŭ rasijskim parłamiencie. Biełarusaŭ musić naścieražyć užo toje, što ŭ prahramie nie zarehistravacca biez numara telefona, i zamiežnaja simka tut nie padydzie.

U Max, adnak, jość niekatoryja nałady, jakija vizualna spryjajuć biaśpiecy. Naprykład, u vypadku z botam možna ačyścić historyju paviedamleńniaŭ ci vydalić dyjałoh. 

U naładach jość asobny raździeł, pryśviečany pryvatnaści. Možna pastavić pin-kod, ale čamuści nie na sami dyjałohi, a na nałady. Taksama vy možacie vybrać, chto budzie zdolny vas znajści ŭ miesiendžary pa numary telefona, chto zmoža vam zvanić, zaprašać u čat i bačyć, ci vy ciapier anłajn. Jašče dastupnaja mahčymaść stvaryć čorny śpis i praviarać, ź jakoha hadžeta i IP-adrasa vy padklučajeciesia da miesiendžara, a taksama kolki ŭvohule ŭ vas hetych aktyŭnych siesij.

Pavialičyć

Kali ŭsio nadakučyła, možna i vydalić profil. Praŭda, u vas nie atrymajecca zrabić heta chutka — na sajcie miesiendžara tłumačać, što vy možacie tolki padać zajaŭku na vydaleńnie, a kampanija musić jaje zadavolić praz 30 dzion i vydalić vaš akaŭnt niezvarotna. Stvaralniki prahramy nie tłumačać, navošta treba hetyja 30 dzion i jakim čynam zadavalniajuć zajaŭki na vydaleńnie akaŭnta.

Lepš vybirać dla siabie miesiendžary z bolš prazrystymi naładami biaśpieki, za jakimi nie stajać rasijskija ŭłady. Dla čytańnia navin abo bytavoj kamunikacyi padydzie i Telehram, dla dalikatnaj kamunikacyi — bolš abaronienyja kanały nakštałt miesiendžara Signal.

• 2
• 5
• 14
• 13
• 1
• 0
• 5
• 0