Prapahandyst Mukavozčyk apisaŭ, jak prachodzić pasiadžeńnie kamisii pa viartańni. Kali ŭ vas byli iluzii, to pakińcie ich
Kamisija ŭ toj dzień razhladała vosiem zvarotaŭ i voś jakija rašeńni pryniała.
Prapahandyst Andrej Mukavozčyk u dziaržaŭnaj haziecie «SB. Biełaruś siehodnia» apisaŭ pasiadžeńnie kamisii pa viartańni hienprakurora Švieda, jakoje było 17 červienia. Mukavozčyk — adzin z členaŭ hetaj kamisii.
Na pasiadžeńni razhladali 8 zvarotaŭ. Mukavozčyk źjedliva prajšoŭsia pa zajaŭnikach.
Ajcišnik F. z Polščy ŭdzielničaŭ u pratestach, ale chacieŭ by viarnucca i prasiŭ dać harantyi, što jaho nie pasadziać. «Jakija tabie harantyi? Azaronka ŭ zakładniki? Dyk nie dadzim ža», — piša Mukavozčyk.
Inšy čałaviek Š. źjechaŭ u Vjetnam. Jon napisaŭ, što pierasyłaŭ adno fota pra PVK «Vahnier», ale hatovy kampiensavać škodu. Kamisija pa viartańni znajšła ŭ jaho 23 «špijonskija paviedamleńni» (nie zrazumieła, što pad hetym majecca na ŭvazie).
Biełarus N. napisaŭ u zvarocie, što jaho 10 žniŭni źbili siłaviki. Ale jon paźniej napisaŭ admovu ad pretenzij.
Jašče adzin zajaŭnik K. raniej rabiŭ danaty i ŭžo niekalki razoŭ spłaciŭ «kampiensacyju» ŭ kratnym pamiery. Jon invalid treciaj hrupy. Z tekstu padobna, što jon zarehistravaŭsia ŭ niejkim fejkavym pratesnym čacie, ale, kali tam pastupiła dziŭnaja prapanova, vydaliŭ jaho.
«I što jon taki zrobić, viarnuŭšysia, nie viedaje nichto», — pałochaje Mukavozčyk.
Što ž rašyła kamisija? Tolki trom čałaviekam (siarod ich — toj, kaho źbili 10 žniŭnia) paviedamili, što na ich niama nijakich spraŭ na momant zvarotu.
Inšym paviedamili, što jany ci padazravanyja, ci abvinavačanyja pa kryminalnaj spravie.
«Dvaim ža hramadzianam — D. i K. — kamisija (znoŭ ža dziejničajučy stroha pa ŭkazie) paličyła mahčymym źmiakčyć vybranuju ŭ dačynieńni da ich mieru strymańnia. Heta aznačaje, što paśla pierasiačeńnia miažy zamiest zaklučeńnia pad vartu jany zmohuć «uźjadnacca ź siamjoj» abo «praciahvać lačeńnie». Paralelna raźbirajučysia z pretenzijami ŭ svoj adras z boku pravaachoŭnych orhanaŭ», — napisaŭ Mukavozčyk.
Kamisija pa viartańni, jakuju ŭznačalvaje hienprakuror Andrej Švied, była stvorana ŭ 2022 hodzie. U lutym 2025 hoda śćviardžałasia, što kamisija razhledzieła 241 zvarot. Tolki pa 30 dali stanoŭčy adkaz, a viarnułasia 20 čałaviek.
Ciapier čytajuć
Buchi Ihar ź Viciebska ŭžo nie viedaje, jak adbicca ad padarunkaŭ ad roznych brendaŭ. I ŭžo zvalniajecca z zavoda26
Kamientary