Paśla taho jak na minułym tydni rasijski bieśpiłotnik «Hierbiera» zalacieŭ na terytoryju Litvy ź Biełarusi, jeŭrakamisar pa abaronie i kosmasie Andrus Kubilus zaklikaŭ Litvu i krainy rehijona stvarać dronavuju zasłonu i naładzić masavuju vytvorčaść bieśpiłotnikaŭ.
«Heta pakazvaje, što mahčymaść praniknieńnia takoha drona na terytoryju Litvy isnuje. Ci hatovaja Litva abaraniacca ad takich dronaŭ, ci jość u jaje dastatkovyja mahčymaści — pytańnie zastajecca biez adkazu», — skazaŭ Kubilus u prahramie «Tema dnia» telekanała LRT.
«Tamu ja zaŭsiody zaklikaju Litvu i krainy rehijona pakłapacicca pra stvareńnie tak zvanaha płana abarony ŭschodniaj miažy, płana fizičnaj abarony, pierš za ŭsio šlacham ustalavańnia šerahu fizičnych zaharod na ziamli. (…) Na maju dumku, taki płan pavinien uklučać nie tolki fizičnuju miažu, ale i stvareńnie dronavaj zasłony», — adznačyŭ jeŭrakamisar.
U mai minułaha hoda tahačasnaja ministarka ŭnutranych spraŭ Ahnie Biłatajcie abviaściła, što krainy rehijona damovilisia pra stvareńnie tak zvanaj «dronavaj zasłony», dla jakoha buduć vykarystoŭvacca bieśpiłotnyja latalnyja aparaty dla manitorynhu ŭčastkaŭ miažy, a taksama sistemy baraćby z dronami, jakija dazvolać spyniać vykarystańnie dronaŭ varožymi krainami dla kantrabandy i pravakacyj.
Adnak pa stanie na pačatak sakavika hetaha hoda Litva i Estonija nie atrymali finansavańnia ad Jeŭrapiejskaha sajuza na hety prajekt.
Pavodle słoŭ Kubilusa, prykmiet hatoŭnaści Litvy i krain Bałtyi adbivać mahčymyja ataki dronaŭ z boku Rasii «nie nadta šmat».
«Tamu siońnia treba nie stolki vyrablać drony abo zakuplać ich i zachoŭvać na składzie, kolki navučać i rychtavać kamandy śpiecyjalistaŭ, jakija mahli b vielmi chutka vyrablać nieabchodnuju kolkaść dronaŭ dla hetaj zasłony», — skazaŭ delehiravany Litvoj člen Jeŭrapiejskaj kamisii.
«Ja liču, što Litva i krainy Bałtyi pavinny mieć ahulnuju kancepcyju nie tolki pa ŭźviadzieńni fizičnaha zaharody, ale i pa stvareńni dronavaj zasłony, uklučajučy padrychtoŭku da ich masavaj vytvorčaści», — skazaŭ jon.
U minuły čaćvier dniom litoŭskija pamiežniki zaŭvažyli BPŁA. Pavodle vajskoŭcaŭ, jon znachodziŭsia na terytoryi Litvy kala troch chvilin, pierš čym upaŭ u rajonie zakrytaha pamiežnaha punkta propusku «Šumsk».
Litoŭskija pamiežniki spačatku pryniali abjekt za iranski bieśpiłotnik šachied, a paźniej vypuścili paviedamleńnie, što heta byŭ «samarobny samalocik» z faniery i pienapłastu.
Ale, imavierna, heta była «Hierbiera» — lohki, adnarazovy dron-prymanka, pryznačany dla pierahruzki sistem PRA i vyjaŭleńnia pazicyj radarnych kompleksaŭ. Taki aparat moža być abstalavany i nievialikaj bajavoj častkaj.
Kamientary