Sioleta fiestyval intelektualnaj knihi Pradmova projdzie ŭ čatyroch haradach
Fiestyval intelektualnaj knihi «Pradmova» sioleta projdzie ŭ čatyroch jeŭrapiejskich haradach: Vilni, Prazie, Poznani i Varšavie. Arhanizatary zaprašajuć padavać zajaŭki na ŭdzieł asob i inicyjatyvy, što pracujuć ź biełaruskaj litaraturaj i kulturaj, piša Bellit.info.
Fiestyval staŭ užo tradycyjnym miescam sustrečy vydaŭcoŭ, aŭtaraŭ, pierakładčykaŭ, mastakoŭ, dyzajnieraŭ, daśledčykaŭ, muzykaŭ, teatralnych tvorcaŭ i, viadoma, čytačoŭ. U prahramie — prezientacyi knih, dyskusii, litaraturnyja čytańni, kancerty, pierformansy, aŭtohraf-siesii, majstar-kłasy i mnostva inšych farmataŭ, pryśviečanych volnamu myśleńniu, tvorčaści i kulturnamu vykazvańniu.
Vosieńniu 2025 hodu Pradmova zavitaje ŭ čatyry harady. Pieršyja imprezy adbuducca ŭ Vilni (10-12 kastryčnika), dalej fiestyval adbudziecca ŭ Prazie (24-26 kastryčnika), zatym zavitaje ŭ Poznań (7-9 listapada), a skončycca vialikim fiestyvalem u Varšavie (21-24 listapada). Taksama imprezy buduć adbyvacca anłajn napraciahu fiestyvalnaha siezonu — z kastryčnika pa listapad.
Adkryty pryjom zajavak na ŭdzieł u fiestyvalnaj prahramie. Uziać udzieł mohuć asoby i inicyjatyvy, jakija pracujuć ź biełaruskaj litaraturaj, movaj, mastactvam, dumkaj i/abo hramadskaj tematykaj — praz tekst, vizualnaje vykazvańnie, pierformans, daśledavańnie ci inšyja formy.
Zajaŭki prymajucca da 30 lipienia (uklučna) praz anłajn-formu na sajcie fiestyvalu: pradmova.eu. Pierad tym, jak padać zajaŭku, nieabchodna zarehistravacca na sajcie albo ŭvajści ŭ svoj ulikovy zapis.
Abmiežavańniaŭ pa ŭzroście, dośviedzie abo miescy žycharstva niama. My adkrytyja da ekśpierymientu, dyjałohu i niečakanych farmataŭ. Dadatkovuju infarmacyju možna atrymać praz [email protected] abo ŭ sacsietkach @pradmova.
Ciapier čytajuć
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy34
Kamientary