ChatGPT pradstaviŭ novuju madel GPT-5. Voś što ŭ joj novaha i što abiacajuć raspracoŭščyki

Vyjšła novaja madel ChatGPT — GPT-5. Z klijenta ChatGPT nieŭzabavie buduć vydalenyja madeli GPT-4o, GPT-4.1, GPT-4.5, GPT-4.1-mini, o4-mini, o4-mini-high, o3 i o3-pro. Abrać možna z troch opcyjaŭ ChatGPT 5 (dla ŭsich), GPT-5 Thinking (dla składanych zadačaŭ, dastupna dla płatnych karystalnikaŭ) i GPT-5 Thinking Pro (tolki dla pro-karystalnikaŭ).

Jakija novyja funkcyi hetaj madeli?

Ciapier, kali vy zadajecie pytańnie, ChatGPT sam vyrašaje, kali adkazać chutka, a kali dumać daŭžej (raspracoŭščyki nazyvajuć heta «roŭteram»). Miarkujučy pa adkazach, pa zmoŭčańni ŠI sprabuje analizavać mnohija pytańni bolš hruntoŭna i značna daŭžej, čym minułyja madeli.

Kali GPT-5 analizuje, što adkazać, možna nacisnuć Get a quick answer, kab atrymać karaciejšy i chutčejšy adkaz biez hłybokaj razvahi. 

Naprykład, my zadali pytańnie pra kolkaść hałaktyk u suśviecie. U chutkim režymie jon adkazaŭ imhnienna, tady jak bieź jaho dumaŭ kala 20 siekund, ale daŭ bolš padrabiaznaściaŭ. Ale ličbavy adkaz byŭ taki samy (kala dvuch tryljonaŭ).

Pavialičyć

Taksama raspracoŭščyki kažuć, što zdoleli zamianić usie madeli adnoj dziakujučy inavacyjnaj sistemie, jakaja aŭtamatyčna vyrašaje, jak doŭha dumać nad zadačaj, zasnoŭvajučysia na kantekście, i kolki resursaŭ vykarystoŭvać na jakoje z pytańniaŭ karystalnika. Heta taksama dazvalaje adkazvać na składanyja pytańni chutčej i ekanomić resursy.

U tekstavym režymie źjaviłasia mahčymaść abirać adnaho z čatyroch piersanažaŭ abo zastavacca ŭ standartnym styli ChatGPT u raździele naładaŭ «Piersanalizacyja», jaki byŭ istotna pašyrany. Voś, što pra ich pišuć raspracoŭščyki:

• Cynic — sarkastyčny i suchi, dapamahaje z humaram;
• Robot — dakładny, efiektyŭny, biez emocyj;
• Listener — spakojny, dzielicca dumkami i mierkavańniami, trochu žartuje;
• Nerd — zachopleny viedami, dapamahaje hruntoŭna i dastupna.

Abnoŭleny hałasavy režym (Voice mode). Raspracoŭščyki abiacajuć, što jon staŭ bolš zručnym i dastupnym, a taksama padtrymlivaje karystalnickija GPT. Płatnyja karystalniki mohuć padstroić hołas pad siabie — paprasić źmianić styl, chutkaść i tanalnaść havorki. Praz 30 dzion stary režym Standard Voice budzie adklučany.

Hałasavy režym pakul budzie pracavać na staroj madeli GPT-4o i bieź piersanažaŭ.

Źjavilisia i čysta estetyčnyja dadatki. Naprykład, ciapier možna budzie abirać koler dla niekatorych elemientaŭ interfiejsa, naprykład, knopki Voice, vyłučanaha tekstu i burbałak čata.

Jakija vyhody hetaj madeli ŭ paraŭnańni ź minułymi?

Samaje admietnaje z taho, što abiacaje OpenAI — radykalnaje źmianšeńnie halucynacyj, to-bok nieśviadomaj vydačy chłuślivaj ci vydumanaj infarmacyi. Zhodna z pres-relizam, kolkaść takich adkazaŭ, asabliva na čullivyja temy kštałtu zdaroŭja, źmienšyłasia prykładna na 80% adnosna madeli 3o.

Madel radziej padmanvaje karystalnika ŭ składanych zadačach, to-bok radziej zhadžajecca z pamyłkovaj pazicyjaj dla zručnaści, zamoŭčvaje niavyznačanaść i padaje viersiju jak biassprečnuju, prydumlaje krynicy ci śćviardžaje toje, što supiarečyć faktam zadačy. Karaciej, radziej śviadoma chłusić.

OpenAI ułasnaručna stvaraje takija składanyja nieadnaznačnyja testavyja scenary dla svaich madelaŭ. Z GPT-5 vypadkaŭ chłuśni dla takich scenaroŭ stała ŭdvaja mienš (2.1% z GPT-5 Thinking suprać 4.8% u madeli 3o). Zamiest adkazu, kažuć raspracoŭščyki, jany navučyli GPT-5 zadavać bolej udakładniajučych pytańniaŭ i z bolšaj imaviernaściu pierapytvać ci kazać, što niemahčyma adkazać ci niešta praanalizavać, čym vydavać chłuśniu ci łuchtu.

OpenAI zajaŭlaje, što GPT-5 mienš liślivaja i radziej stanovicca na bok karystalnika biez padstaŭ na toje. Ciapier dola takich adkazaŭ u farmalnych testach mienšaja za 6% suprać 14.5% u minułych madelaŭ.

OpenAI abiacajuć, što ciapier budzie mienš nieabhruntavanych admovaŭ ad abmierkavańnia składanych temaŭ, ale adkazy buduć bolš biaśpiečnymi. To-bok navat jany starajucca zrabić tak, kab karystalnik moh abmiarkoŭvać z madellu što zaŭhodna, ale adkazy nie nanieśli škody ni jamu, ni hramadstvu.

Pa źviestkach raspracoŭščykaŭ, ChatGPT 5 — najlepšaja madel dla prahramavańnia. Jany zajaŭlajuć, što možna stvarać usio, navat hulni (prykład takoj veb-hulni jany pryvodziać u relizie) litaralna za adzin adekvatna sfarmulavany zapyt biez patrebaŭ u karekcyi koda.

Taksama, śćviardžajuć jany, istotna palepšylisia funkcyi napisańnia tekstaŭ, u tym liku pa-biełarusku. Ciapier madel lepš pracuje z tekstami z šmatuzroŭnievymi sensami, moža lepš pisać i apracoŭvać vieršy i mastackija teksty.

Open AI abiacaje taksama, što novaja madel lepš kansultuje pa miedycynskich pytańniach, bolš hruntoŭna analizuje infarmacyju i «zabiaśpiečvaje bolš dakładnyja i nadziejnyja adkazy». Kampanija prapanuje ChatGPT nie jak zamienu doktaru, a jak partniora dla razumieńnia vynikaŭ i pryniaćcia rašeńniaŭ.

Pa źviestkach OpenAI, GPT-5 — najmacniejšaja madel kampanii, jakaja bje rekordy va mnohich farmalnych testach: prahramavańni, matematycy, multymadalnym razumieńni i miedycynie. Hiendyrektar kampanii navat zajaviŭ, što GPT-5 «dasiahnuła ŭzroŭnia doktara navuk (PhD)».

• 17
• 0
• 0
• 0
• 1
• 0
• 0
• 0