Prezident Polščy nakłaŭ vieta na papraŭku da zakona ab dapamozie hramadzianam Ukrainy
Prezident Polščy Karal Naŭrocki nakłaŭ vieta na papraŭku da zakona ab dapamozie hramadzianam Ukrainy. Jon padkreśliŭ, što Polšča zastajecca adkrytaj dla padtrymki Ukrainy i praciahvaje bačyć svajoj stratehičnaj metaj dapamohu ŭ supraćstajańni rasijskaj ahresii. Adnak, na jaho dumku, sacyjalnyja vypłaty ŭ raniejšym pamiery pavinny atrymlivać tolki tyja ŭkrainskija baćki, jakija pracujuć.
«My zastajemsia adkrytymi dla akazańnia dapamohi hramadzianam Ukrainy; heta zastajecca niaźmiennym. Stratehičnaja meta polskaj dziaržavy pierad abliččam napadu Rasii na Ukrainu taksama zastajecca niaźmiennaj — intares Polščy palahaje ŭ vajskovaj padtrymcy Ukrainy ŭ hetym kanflikcie. Rasija źjaŭlajecca vinavataj, a Ukraina — achviaraj hetaj vajny.
Ale paśla 3,5 hadoŭ naš zakon pavinien być vypraŭleny. Zakon ab dapamozie hramadzianam Ukrainy nie ŭnosić karektyŭ, jakija byli pradmietam publičnaha abmierkavańnia, adnosna taho, što dapamoha 800+ pavinna być akazanaja ŭkraincam, jakija vykonvajuć abaviazkovuju pracu», — skazaŭ Naŭrocki, jakoha cytuje jaho pres-słužba.
Zhodna ź dziejnym zakanadaŭstvam, ukrainskija biežancy ŭ Polščy majuć prava na štomiesiačnuju dapamohu ŭ pamiery kala 800 złotych (kala 180 jeŭra) na dzicia, a taksama dadatkovyja vypłaty na druhoje i nastupnaje dzicia. Zakon, uchvaleny ciapierašniaj uradavaj kaalicyjaj, praduhledžvaŭ praciah hetych vypłat da sakavika 2026 hoda.
Premjer-ministr Polščy Donald Tusk i jaho kamanda raskrytykavali rašeńnie prezidenta, ale jany nie majuć dastatkovaj bolšaści, kab pieraadoleć vieta. Ministarka pracy Polščy Ahnieška Dziemianovič-Bonk adznačyła, što dzieci nie pavinny pakutavać ad taho, ci pracuje ich maci, i nazvała padtrymku dziaciej pytańniem čałaviečaj hodnaści.
Paśla pačatku vajny va Ukrainie ŭ 2022 hodzie ŭ Polščy pasialilisia kala miljona ŭkrainskich biežancaŭ, pieravažna žančyny i dzieci. Sama ž Polšča zastajecca adnym z hałoŭnych sajuźnikaŭ Ukrainy i klučavym tranzitnym šlacham dla zachodniaj dapamohi.
Miž tym zakon, na jaki Naŭrocki nakłaŭ vieta, tyčyŭsia nie tolki hetych dapamoh, ale praź jaho taksama pravodziłasia, naprykład, finansavańnie spadarožnikavaha internetu Starlink dla Ukrainy, jakoje ciapier apynułasia pad pahrozaj. Pra heta paviedamiŭ polski vice-premjer, ministr ličbavych technałohij Kšyštaf Haŭkoŭski.
«Heta kaniec internetu Starlink, jaki Polšča daje achoplenaj vajnoj Ukrainie. Heta taksama spyniaje padtrymku zachoŭvańnia danych ukrainskaha ŭrada ŭ biaśpiečnym miescy. Ja nie mahu ŭjavić sabie lepšaha padarunka dla vojskaŭ Pucina», — napisaŭ Haŭkoŭski ŭ sacsietcy X.
Jon zaklikaŭ Naŭrockaha «spynić ślepa napadać na ŭrad u imia palityčnaj baraćby», padkreśliŭšy, što «biazdumnyja» pastanovy dapamahajuć Rasii i škodziać ukraincam, jakija zmahajucca za svaju niezaležnaść.
Pavodle źviestak Ministerstva ličbavych technałohij Polščy, u 2025 hodzie heta kraina płanavała vydatkavać bolš za $20 miljonaŭ na Starlink dla Ukrainy. U 2022-2024 hadach vydatki na hetyja mety skłali kala $84 miljonaŭ.
«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie19
Kamientary
- u stupdzieni 2025 hoda pisaŭ Donald Tusk.