Apielacyjny sud ZŠA pryznaŭ bolšaść taryfaŭ, uviedzienych administracyjaj Trampa, niezakonnymi

Sud ZŠA pastanaviŭ, što bolšaść taryfaŭ, uviedzienych Donaldam Trampam, źjaŭlajucca niezakonnymi, bo prezident nie maje paŭnamoctvaŭ uvodzić ich pavodle Zakona ab mižnarodnych nadzvyčajnych ekanamičnych paŭnamoctvach. Niahledziačy na heta, taryfy zastanucca ŭ sile da 14 kastryčnika, kab Bieły dom moh abskardzić hetaje rašeńnie ŭ Viarchoŭnym sudzie.

Apielacyjny sud ZŠA pastanaviŭ, što bolšaść taryfaŭ, uviedzienych prezidentam Donaldam Trampam, źjaŭlajucca niezakonnymi, što patencyjna pazbaŭlaje kiraŭnika Biełaha doma instrumienta źniešniaj palityki, jaki jon šyroka vykarystoŭvaŭ ciaham svajho druhoha terminu na pasadzie, piša Bi-bi-si.

Rašeńnie datyčycca «ŭzajemnych» taryfaŭ Trampa, jakija jon uvioŭ suprać bolšaści krain śvietu, a taksama inšych taryfaŭ, uviedzienych suprać Kitaja, Mieksiki i Kanady.

Sud dazvoliŭ pakinuć taryfy ŭ sile da 14 kastryčnika, kab dać administracyi Trampa mahčymaść padać apielacyju ŭ Viarchoŭny sud ZŠA.

Donald Tramp, kamientujučy rašeńnie Apielacyjnaha suda, napisaŭ u sacyjalnaj sietcy Truth Social: «Kali hetyja taryfy kali-niebudź buduć skasavanyja, heta stanie poŭnaj katastrofaj dla krainy. Heta asłabić nas finansava, a my pavinny być mocnymi». Jon dadaŭ, što inšyja krainy ŭviali taryfy suprać ZŠA, i vykazaŭ upeŭnienaść, što rašeńnie Apielacyjnaha suda budzie skasavana Viarchoŭnym sudom.

Tramp abhruntavaŭ abodva nabory taryfaŭ Zakonam ab mižnarodnych nadzvyčajnych ekanamičnych paŭnamoctvach (IEEPA). U krasaviku jon abviaściŭ nadzvyčajnaje stanovišča ŭ halinie handlu, śćviardžajučy, što z-za taho, što ZŠA impartujuć bolš, čym ekspartujuć, dysbałans nanosić škodu nacyjanalnaj biaśpiecy ZŠA.

Ale sud pastanaviŭ, što ŭviadzieńnie taryfaŭ nie ŭvachodzić u mandat prezidenta i što jany źjaŭlajucca «asnoŭnym paŭnamoctvam Kanhresu».

«Zakon nadaje prezidentu značnyja paŭnamoctvy pradprymać šerah dziejańniaŭ u adkaz na abvieščanaje nadzvyčajnaje stanovišča, ale ni adno z hetych dziejańniaŭ naŭprost nie ŭklučaje paŭnamoctva ŭvodzić taryfy, pošliny abo padobnyja miery, abo paŭnamoctva abkładać padatkami», — havorycca ŭ rašeńni suda.

U 127-staronkavym pastanovie taksama havorycca, što IEEPA «nidzie nie zhadvaje taryfy (ci jakija-niebudź ich sinonimy) i nie ŭtrymlivaje pracesualnych harantyj, jakija ŭklučajuć jasnyja abmiežavańni na ŭładu prezidenta ŭvodzić taryfy».

Takim čynam, prava ŭvodzić padatki i taryfy pa-raniejšamu naležyć Kanhresu, pastanaviŭ sud, i IEEPA hetaha nie admianiaje.

Sud napisaŭ, što małavierahodna, što, kali Kanhres prymaŭ zakon, jon mieŭ namier «admovicca ad svajoj papiaredniaj praktyki i pieradać prezidentu nieabmiežavanyja paŭnamoctvy na ŭviadzieńnie taryfaŭ».

«Kožny raz, kali Kanhres maje namier delehavać prezidentu paŭnamoctvy na ŭviadzieńnie taryfaŭ, jon robić heta naŭprost — abo z dapamohaj niedvuchsensoŭnych terminaŭ, takich jak taryf i pošlina, abo praz ahulnuju strukturu, jakaja jasna pakazvaje, što Kanhres maje na ŭvazie taryfy», — napisali sudździ.

Rašeńnie vyniesiena ŭ adkaz na dva iski, padadzienyja małym biźniesam i kaalicyjaj amierykanskich štataŭ.

U traŭni fiederalny sud u Ńju-Jorku pa pytańniach mižnarodnaha handlu pryznaŭ taryfy niezakonnymi. Bieły dom abskardziŭ hetaje rašeńnie.

• 5
• 0
• 1
• 0
• 0
• 0
• 0
• 0