Dałučeńnie Kryma da Rasii mahło być apošniaj volaj baćki Pucina

Pucin razam ź niekalkimi siabrami ź liku svaich pieciarburhskich kaleh naviedaŭ baćku ŭletku 1999 hoda, niadoŭha da jaho śmierci. Uładzimir Śpirydonavič ciažka chvareŭ na rak, uskładnieny prablemami z sercam, i lažaŭ u ankałahičnym dyspansiery ŭ Pieciarburhu. Mnohija hady paźniej, padčas pramoj linii ŭ 2017 hodzie, Pucin pryznaŭsia, što jahonamu baćku spačatku pastavili niapravilny dyjahnaz, i mahčyma, čas na lačeńnie byŭ stračany.

Baćka Pucina byŭ upeŭnieny, što jaho syn voś-voś uznačalić krainu (pra heta tady viedała, mahčyma, tolki «siamja» Barysa Jelcyna), i tamu pakładaŭ na spadčyńnika palityčnyja nadziei.

Baćka skazaŭ Pucinu-małodšamu, što spadziajecca, što niekali Krym znoŭ vierniecca da Rasii. Uładzimir Śpirydonavič taksama pryznaŭsia synu, što sumavaŭ pa dziaržaŭnym himnie Savieckaha Sajuza, jaki byŭ admienieny paśla raspadu SSSR u 1991 hodzie. Hetuju častku razmovy aŭtaram knihi pierakazaŭ čałaviek, blizka znajomy z adnym z naviedvalnikaŭ balnicy.

Žurnalisty ličać, što hetaja historyja moža akazacca apokryfam, ale vyłučajuć važny fakt, jaki časta zabyvajecca inšymi bijohrafami Pucina. Krym, a dakładniej — baza rasijskaha (i raniej savieckaha) fłotu ŭ Sievastopali, — byŭ darahim miescam dla Pucina-starejšaha. Jon pravioŭ tam niejki čas pierad vajnoj jak matros na padłodcy Čarnamorskaha fłotu.

Pucin-małodšy ŭpieršyniu zhadaŭ sievastopalski epizod baćkoŭskaj bijahrafii ŭ artykule, apublikavanym napiaredadni 9 traŭnia 2015 hoda, to bok na pieršuju hadavinu akupacyi Kryma (hety artykuł taksama admietny tym, što ŭ im prezident Rasii pierabłytaŭ daty śmierci baćki i maci)

Fotazdymak maładoha baćki ŭ fłockaj bieskazyrcy zaŭsiody stajaŭ u pracoŭnym kabiniecie prezidenta Rasii (jak stała viadoma ź intervju Oliviera Stoŭna) i mienavita ź im jon šeść razoŭ udzielničaŭ u maršy «Bieśśmiarotny połk». «Adnym słovam, kryma-marskaja častka siamiejnaj historyi vidavočna była važnaja Pucinu», — padsumoŭvajuć žurnalisty.

Dziaržaŭny himn, aŭtarstva Alaksandra Alaksandrava, Pucin-małodšy viarnuŭ našmat raniej, čym Krym. Heta, pa sutnaści, stała adnym ź pieršych rašeńniaŭ Pucina paśla abrańnia prezidentam u 2000 hodzie.

Uvosień da jaho na pryjom pryjšli spartsmieny z skarhaj: padčas uručeńnia na Alimpijadzie ŭ Sidnei-2000 im niama čaho było śpiavać. Sapraŭdy, z 1991 pa 2000 hod u Rasii byŭ, tak by mović, časovy himn — miełodyja «Patryjatyčnaj pieśni» kampazitara Michaiła Hlinki biez słoŭ. Saviecki himn byŭ viernuty ź vialikaj śpieškaj — užo ŭ śniežni 2000 hoda byŭ pryniaty adpaviedny zakon, i ŭ navahodniuju noč novy-stary himn hučaŭ u efiry rasijskaha telebačańnia.

• 1
• 1
• 1
• 4
• 0
• 0
• 3
• 0