Jeŭropa abmiarkoŭvaje raźmiaščeńnie vojsk NATA ŭ Hrenłandyi — kab Tramp pieradumaŭ zavałodvać vostravam

Vialikabrytaja viadzie pieramovy ź jeŭrapiejskimi sajuźnikami nakont raźmiaščeńnia vajskovaha kantynhientu ŭ Hrenłandyi, paviedamlaje The Telegraph.

Płany mohuć uklučać nakiravańnie brytanskich sałdat, vajennych karabloŭ i samalotaŭ dla abarony Hrenłandyi ad Rasii i Kitaja. Jeŭrapiejskija krainy spadziajucca, što značnaje ŭzmacnieńnie ich prysutnaści ŭ Arktycy pierakanaje Donalda Trampa admovicca ad jaho ambicyj anieksavać hety stratehičny vostraŭ.

Tramp vykazvaŭ zaniepakojenaść tym, što Maskva ci Piekin zachopiać vostraŭ, kali jon hetaha nie zrobić. 

Krynicy vydańnia va ŭradzie paviedamili, što Kir Starmier pastaviŭsia da pahrozy z boku Rasii i Kitaja ŭ hetym rehijonie «nadzvyčaj surjozna» i pahadziŭsia, što nieabchodna prymać miery.

Čym tak važnaja Hrenłandyja? Tut znachodziacca adny z najbujniejšych u śviecie radoviščaŭ redkaziamielnych elemientaŭ. Plus stratehičnaje raźmiaščeńnie pamiž ZŠA i Rasijaj dla supraćrakietnaj abarony. ZŠA heta dapamahło b supraćstajać rostu ŭpłyvu Kitaja ŭ Arktycy. Tut taksama raźmieščana kaśmičnaja baza Pitufik, samaja paŭnočnaja vajskovaja zastava Pientahona.

Jeŭrapiejskija krainy spadziajucca advieści Trampa ad idei zachopu, prapanavaŭšy raźmiaścić na vostravie vajskovy kantynhient. Hetaja ideja abmiarkoŭvałasia na sustrečy sajuźnikaŭ pa NATA ŭ Brusieli ŭ čaćvier.

Krynicy paviedamili The Telegraph, što patencyjnaja apieracyja znachodzicca na rańnich stadyjach płanavańnia. Heta moža być paŭnavartasnaje razhortvańnie vojskaŭ abo kambinacyja abmiežavanych pa časie vučeńniaŭ, abmienu raźvieddanymi, raźvićcia patencyjału i pieraraźmierkavańnia abaronnych vydatkaŭ. Lubaja apieracyja, chutčej za za ŭsio, budzie pravodzicca pad ściaham NATA i budzie adździelenaja ad isnujučych misij u Prybałtycy i Polščy.

The Telegraph taksama stała viadoma, što Jeŭrapiejski Sajuz raspracoŭvaje płany sankcyj suprać amierykanskich kampanij na vypadak, kali Tramp adchilić prapanovu ab razhortvańni sił NATA. Technałahičnym hihantam, takim jak Meta, Google, Microsoft i X, moža być abmiežavana dziejnaść na kantyniencie, hetak ža jak i amierykanskim bankam i finansavym firmam. Bolš ekstremalnym varyjantam moža stać vypravadžeńnie amierykanskich vajskoŭcaŭ ź ich baz u Jeŭropie, što pazbavić ZŠA klučavoha płacdarma dla apieracyj na Blizkim Uschodzie i ŭ inšych rehijonach.

• 2
• 0
• 1
• 1
• 0
• 1
• 0
• 0