U adnym ź biełaruskich univiersitetaŭ zapuścili łabaratoryju ličbavych dvajnikoŭ
U Połackim dziaržaŭnym univiersitecie imia Jefrasińni Połackaj adkryli pieršuju ŭ krainie ajčynnuju adukacyjnuju łabaratoryju ličbavych dvajnikoŭ, raspaviali ŭ pres‑słužbie Ministerstva adukacyi.
U pres‑słužbie padkreślili, što prajekt «Ličbavy dvajnik» — pieršaja ŭ krainie vučebnaja prastora, całkam pabudavanaja na ajčynnych ličbavych technałohijach. Jany anałahičnyja tym, što prymianiajucca na realnych abjektach hazavaj haliny.
Ideja stvaryć łabaratoryju źjaviłasia ŭ krasaviku hetaha hoda na rabočaj sustrečy ŭ Homielskim dziaržaŭnym techničnym univiersitecie imia Suchoha z udziełam kiraŭnikoŭ profilnych ministerstvaŭ, rektaraŭ viadučych VNU krainy i pradstaŭnikoŭ pramysłovych pradpryjemstvaŭ u śfiery enierhietyki.
Stvareńnie takich ličbavych dvajnikoŭ było praduhledžana i kancepcyjaj inžyniernaj adukacyi da 2035 hoda, jakuju zaćvierdzili ŭ mai ŭ Biełarusi.
Novaja łabaratoryja ŭjaŭlaje saboj šmatfunkcyjanalny ličbavy kompleks, jaki ŭklučaje piać klučavych zon:
- Ličbavy dvajnik hazaraźmierkavalnaj sistemy Biełarusi. Heta dakładnaja virtualnaja madel infrastruktury, što dazvalaje farmiravać pracesy ŭ realnym časie;
- Mabilny ličbavy pamočnik. Heta intelektualnaja sistema padtrymki vučebnaha pracesu;
- Interaktyŭnaja zona «Pryvitańnie, Alena». Płatforma dla dyjałohu ź ličbavym pamočnikam, stvoranym na bazie ajčynnych rašeńniaŭ;
- Trenažorna-simulacyjny kłas. Tut imitujucca štatnyja i avaryjnyja situacyi dla adpracoŭki kiraŭničych rašeńniaŭ;
- 3D‑kłastar. Prastora dla vizualizacyi i analizu vialikich abjomaŭ danych.
Asablivaść łabaratoryi — u vykarystańni biełaruskaha prahramna‑abstalavanaha kompleksu. Heta, jak adznačyli ŭ viedamstvie, daje studentam dostup da aktualnych technałahičnych instrumientaŭ i realnych pramysłovych dadzienych. Budučyja inžyniery vučacca na scenarach, maksimalna nabližanych da pracy na pracujučym pradpryjemstvie.
Kamientary