Saša Ramanava nabyła dom u Irłandyi za 370 tysiač jeŭra

Saŭładalnica miedyjaprajekta Kyky biełaruska Saša Ramanava razam z mužam pierajechała ŭ Irłandyju ŭ 2023 hodzie. Pierajezd byŭ źviazany z pracaj muža. Jany pasialilisia ŭ horadzie Hołuej (zachad Irłandyi) i pačali zdymać žyllo — vielizarny dom na čatyry spalni za 2700 jeŭra na miesiac.

Jak raskazvaje žančyna ŭ videa na svaim jutub-kanale, heta było nievierahodna ciažka, bo abodva ich zarobki całkam išli na apłatu arendy i kamunalnych pasłuh. Jany adčuvali siabie studentami, u jakich pad kaniec miesiaca nie zastavałasia hrošaj, i razumieli, što treba niešta mianiać.

Pavialičyć

Ipateka

Zamiest taho, kab praciahvać płacić za čužy dom, jany vyrašyli pasprabavać nabyć svoj. Jak tłumačyć žurnalistka, u Irłandyi, kab zamiežnik moh pretendavać na ipateku, jon pavinien pražyć u krainie jak minimum adzin hod. Heta adno z bazavych patrabavańniaŭ bankaŭ.

Dalej uźnikaje pytańnie vizy, abo, jak kažuć u Irłandyi, «štampa» (stamp). Heta adznaka ŭ pašparcie, jakaja vyznačaje, što čałavieku dazvolena rabić u krainie (pracavać, vučycca, być na ŭtrymańni i hetak dalej). Kožny štamp maje svoj numar.

Saša Ramanava padkreślivaje vielmi važny momant: dla banka nieabaviazkova mieć samy «lepšy» ci doŭhaterminovy štamp. Jaje muž atrymaŭ uchvaleńnie ipateki sa «štampam 1» (Stamp 1).

Heta zvyčajny pracoŭny dazvoł, jaki pryviazany da kankretnaha pracadaŭcy. Jamu nie daviałosia čakać atrymańnia «štampa 4» (Stamp 4), jaki daje prava pracavać na kaho zaŭhodna i ličycca bolš stabilnym i nadziejnym dazvołam na žycharstva.

Adnak isnujuć važnyja vyklučeńni. Nie ŭsie štampy dajuć prava na ipateku. Jak praviła, banki nie razhladajuć zajaŭki ad uładalnikaŭ studenckich štampaŭ (Stamp 2/2A) i štampaŭ biez prava na pracu (Stamp 0 i Stamp 3).

Choć mnohija rajać najmać brokiera, siamja vyrašyła nie źviartacca da jaho pasłuh i źviarnułasia ŭ pieršy ž bank, dzie ŭ ich byli adkryty rachunki. Tam im adrazu vydzielili mieniedžarku, jakaja viała ich spravu i ŭsio padrabiazna tłumačyła. Muž Sašy — ajcišnik, tamu, jak jana kaža, zarobak u jaho «dastatkova tryvały» dla Irłandyi. Dla ipateki chapiła navat adnaho jaho zarobku.

Atrymaŭšy ad banka aficyjny list z sumaj, jakuju im hatovyja vydzielić, jany pačali dasyłać jaho ahientam pa nieruchomaści. Damy šukali na papularnym sajcie Daft.ie. Jak tłumačyć žurnalistka, paćviardžeńnie ad banka adrazu pakazvaje ahientam, što pakupnik surjozny, i prahlady pačali pryznačać litaralna na nastupny dzień.

Jak kaža Saša Ramanava, jany šukali dom koštam da 400 tysiač jeŭra. Značnuju kolkaść prapanoŭ jany pa roznych pryčynach adrazu adchilili. U svaim videa jana raskazała pra tyja, jakija im spadabalisia.

Pošuk doma

Pieršy dom u pryharadzie staŭ dla Sašy, pa jaje pryznańni, «dakučlivaj maraj». Jon vystaŭlaŭsia za 370 tysiač jeŭra, ale ŭ vyniku adkrytaha aŭkcyjonu i stavak jaho košt padskočyŭ da 450 tysiač.

Pavialičyć

Siamja zrazumieła, što ŭ ich niama stolki hrošaj, dyj dom taho nie kaštavaŭ: rajon daloka ad centra, sam dom maleńki, ź nizkimi stolami i nievysokim indeksam enierhaźbieražeńnia.

Druhi dom znachodziŭsia ŭsiaho za dva kiłamietry ad horada, i jaho pačatkovy košt byŭ 330 tysiač jeŭra. Heta byŭ vuhłavy teras-chaŭs ź vialikim sadam i navat niekalkimi ŭłasnymi drevami.

Praŭda, unutry ŭsio było ŭ zaniadbanym stanie: staraja kuchnia, brudnyja pakoi, tanny linoleŭm. Sapraŭdny kamin byŭ pracoŭny i navat nahravaŭ vadu ŭ sistemie aciapleńnia, ale dom mieŭ rejtynh enierhaźbieražeńnia G — samy nizki z mahčymych.

Pavialičyć

Jak akazałasia, dom pradavali syny pažyłoj pary, jakaja pražyła tam usio žyćcio. Paśla śmierci ŭładalnikaŭ naščadki ničoha nie ramantavali, prosta zdavali dom niekalki hadoŭ. Na momant prahladu košt doma z-za kankurencyi inšych pakupnikoŭ užo vyras da 390 tysiač jeŭra. Płacić bolš za 400 tysiač za dom, kudy jašče treba ŭkłaści kala 100 tysiač na ramont, im padałosia nierazumna.

Nabyćcio 

Narešcie, treci dom, jaki jany pajechali hladzieć, byŭ trochpaviarchovy dupleks (niešta nakštałt taŭnchaŭsa). Jaho košt źniziŭsia z 360 da 340 tysiač jeŭra, i na jaho byŭ usiaho adzin pretendent. Jak tłumačyć Ramanava, pryčyna nizkaha popytu ŭ tym, što ŭ

hetaha dupleksa ahulny dvoryk na čatyry siamji i jość kirujučaja kampanija, ź jakoj treba ŭzhadniać hłabalnyja źmieny, naprykład, znos ściany unutry doma. Irłandcy jak mocnyja indyvidualisty addajuć pieravahu niachaj i maleńkamu, ale ŭłasnamu domiku.

Ale dla siamji ź Biełarusi, pa słovach Sašy, kamfort, vysoki indeks uciapleńnia i dobry ramont byli važniejšyja za mahčymaść samastojna łamać ścieny. Jany prapanavali 340 tysiač jeŭra. Inšy pakupnik adrazu padniaŭ staŭku da 350. Tady jany padniali svaju prapanovu da 360 tysiač, i kankurent admoviŭsia.

Adnak na hetym historyja nie skončyłasia. Pa słovach Sašy, ź imi źviazaŭsia ryełtar i skazaŭ, što haspadary pieradumali pradavać, bo nibyta vyrašyli pakinuć dom dla svajoj piacihadovaj dački, kab u jaje było žyllo, kali jana pastupić va ŭniviersitet. Pry hetym ryełtar namiaknuŭ, što kali jany prapanujuć 370 tysiač, haspadary, mahčyma, pieradumajuć.

U vyniku, jak raskazvaje Saša, uzvažyŭšy ŭsie arhumienty za i suprać, jany vyrašyli pahadzicca. Tym bolš, što miesiačnyja vypłaty pa ipatecy ŭ hetym vypadku abychodzilisia b u 1600 jeŭra na miesiac u paraŭnańni z 2700 jeŭra za arendu. Da taho ž žyćcio z susiedziami i ahulnym dvarom padałosia im navat bolš pryvabnym dla sacyjalizacyi dziciaci, čym izalavanaść va ŭłasnym domie.

• 22
• 2
• 2
• 2
• 4
• 0
• 1
• 0