«Lehalizacyja za dva dni». Čamu ajcišniki źjechali z Polščy ŭ Irłandyju i Uźbiekistan
Telehram-kanał pra IT DzikPic publikuje dva apoviedy supracoŭnikaŭ IT, jakija vyrašyli pierajechać z Polščy ŭ inšyja krainy.
«Havoryš pa-anhlijsku — užo svoj»: pierajezd u Irłandyju
— Pierajazdžaŭ u krasaviku ŭ Irłandyju. Pracuju jak Product Security Manager (mieniedžar pa biaśpiecy. — NN).
Choć heta i ES, ale «błakitnaja karta» Polščy była bieskarysnaja. Irłandyja nie Šenhien, tamu — spačatku atrymańnie dazvołu na pracu, potym viza i tolki zatym pierajezd.
Čamu mienavita Irłandyja? Z Polščy žadańnia źjazdžać nie było, ale skaracili. Potym daviałosia ŭ Varšavu pierajechać z Krakava, a zatym ja atrymaŭ ofier (prapanova ab pracy. — NN). Vyrašyli z žonkaj, što varta pasprabavać.
Ja metanakiravana nie šukaŭ u Irłandyi. Rekrucier sam na mianie vyjšaŭ, znajšoŭ moj profil u LinkedIn. Moj lehalny status ich nie biantežyŭ. Jany ŭžo šukali kandydata 6 miesiacaŭ i pašyryli haryzont pošuku.
Ja b skazaŭ, što ciapier dobryja mahčymaści [u pošukach pracy] va ŭsich, chto ŭ siekjuryci, pačynajučy ad mocnaha midła (śpiecyjalist z dośviedam 2-5 hadoŭ. — NN).
Kampanija apłaciła i zrabiła work permit (dazvoł na pracu. — NN), vizu rabiŭ sam — u pasolstvie Irłandyi ŭ Varšavie. Spatrebiŭsia niejki čas sabrać usie dakumienty.
Dapamahło, što zahadzia abmianiali biełaruskija paśviedčańnie ab naradžeńni i paśviedčańnie ab šlubie, tamu apastyl i pierakład składanaściaŭ nie vyklikaŭ. Ad zdačy dakumientaŭ da vizy — 3 tydni.
Pakul mnie ŭ Irłandyi ŭsio padabajecca. Tak, z žyllom było nie prosta, ale vyrašalna. Prosta treba aktyŭna zajmacca, rynak adnaznačna adroźnivajecca ad polskaha. Tut praviły dyktuje arendadaŭca, a nie arandatar.
Pracujecca našmat lepš, jašče bolš rassłablena, čym u Polščy. Heta vialikaja asobnaja tema.
Irłandskaje hramadstva bolš adkryta da imihrantaŭ, razmaŭlaješ pa-anhielsku — užo svoj. Plus jany sami daśviedčynyja imihranty, tamu rady, chutčej, usim, pakul nie pačynajuć dzikaść tvaryć.
Da biełarusaŭ staŭleńnie pryjaznaje, bo nas tut nie tak šmat, i im zaŭsiody cikava, jakim čynam my tak daloka zabralisia.
«Nijakich čakańniaŭ DNŽ pa 2 hady»: płany na Uźbiekistan
— Ja pryjechaŭ z Blue Card u Polšču. I zaraz źjazdžaju ź joj ža — va Uźbiekistan.
Jedu ŭ adzin miascovy e-commerce. U ich tam jość taškiencki IT-kłastar, i im treba jak maha bolš roznych paćviardžeńniaŭ, što ty sapraŭdy vysokakvalifikavany pracaŭnik.
I voś tut «błakitnaja karta» nibyta dobra siabie prajaŭlaje. Što kali ŭžo ES ličyć ciabie narmalnym, to i my taksama.
Ź pieravah [raboty va Uźbiekistanie] — 7% płoskaha padatku (padachodny padatak dla ludziej sa statusam rezidenta IT Park va Uźbiekistanie składaje 7,5%. — zaŭv. Dzik).
Hłabalna, tam dobry rynak, jaki raście, dynamičny i cikavy. Plus za tysiaču jeŭra — vydatnyja kvatery, a ŭ Partuhalii — praktyčna ničoha.
Nu i praktyčna poŭnaja adsutnaść biurakratyi. Nijakich čakańniaŭ DNŽ pa 2 hady. Jak mnie skazali, lehalizacyja pa pryjeździe zvyčajna zajmaje paru dzion.
Byŭ va Uźbiekistanie amal try tydni ŭ lipieni. Naohuł, ja dumaŭ, budzie mocna horš, ale tam prosta inšy režym žyćcia. Horad «ažyvaje» kala 20 viečara. Bałazie, kramy pracujuć amal kruhłyja sutki. Heta značyć, z 11 da 19 vulicy pustyja, i ŭsie da hetaha hatovyja.
Ź internetam sapraŭdy biada strašnaja. Jaho amal nidzie niama. Na vulicach 3G. Chutki internet byŭ tolki hateli. Ja navat padumvaju Starlink kupić. Kazachstan voś na dniach padklučyli.
Što z nahody pierśpiektyŭ hramadzianstva? Hramadzianstva tam śpiecyfičnaje. U cełym, za try hady možna atrymać, kali vyvučyć uźbiekskuju movu. Jana vielmi składanaja paśla jeŭrapiejskich, ja voś užo treci miesiac vuču. Ale patrabujuć na praciahu hoda potym admovicca ad papiaredniaha pašparta (dla pašparta Uźbiekistana treba vyjści z papiaredniaha hramadzianstva, pražyć pa ahulnych praviłach 5 hadoŭ i vyvučyć uźbiekskuju movu. — zaŭv. Dzik).
Kamientary