U kožnaha piataha nastaŭnika ŭ biełaruskaj škole vopyt mienšy za 10 hadoŭ
Ministr adukacyi Andrej Ivaniec na pres-kanfierencyi, prymierkavanaj da Dnia nastaŭnika, paviedamiŭ, što siońnia ŭ biełaruskich škołach nazirajecca vysokaja ŭkamplektavanaść piedahahičnymi kadrami — amal 100%. Pry hetym kolkaść nastaŭnikaŭ piensijnaha ŭzrostu zastajecca adnosna nizkaj i stabilnaj — kala 11%, paviedamlaje BiełTA.
Pavodle danych Ivanca, kožny piaty biełaruski piedahoh pracuje ŭ prafiesii da 10 hadoŭ, śviedčyć pra «amaładžeńnie» partreta nastaŭnika.
Razam z tym zastajucca prablemy z zabieśpiačeńniem škoł śpiecyjalistami pa asobnych pradmietach, pierš za ŭsio pa fizicy i matematycy. U rehijonach mienavita ŭ hetych śfierach pracent piedahohaŭ piensijnaha ŭzrostu, jak śćviardžaje ministr, krychu vyšejšy za siaredni pakazčyk.
Kab vyrašyć hetuju prablemu, užo ź biahučaha navučalnaha hoda pačali prymać biez ekzamienaŭ na piedahahičnyja śpiecyjalnaści vypusknikoŭ inžyniernych kłasaŭ. Jak adznačyŭ Andrej Ivaniec, hetaja praktyka pavinna dać vynik u pierśpiektyvie — nie tolki pa kolkaści nastaŭnikaŭ, ale i mienavita ŭ zabieśpiačeńni škoł vykładčykami fiziki, matematyki i infarmatyki.
Što da mahčymaści uviadzieńnia ŭ škołach novych vučebnych pradmietaŭ, to ministr adukacyi padkreśliŭ, što školnaja prahrama i biez taho vielmi składanaja dla vučniaŭ. Tamu śpis pradmietaŭ u škołach źmianiać nie płanujuć, ale pry hetym u Minadukacyi zajmajucca aktualizacyjaj prahram pa ŭžo najaŭnych dyscyplinach.
Kamientary