Kitaj i ZŠA damovilisia ab «ramkach» handlovaj ździełki napiaredadni sustrečy Si i Trampa

ZŠA i Kitaj damovilisia ab ramkach patencyjnaj handlovaj ździełki, jakuju lidary dźviuch krain buduć abmiarkoŭvać na svajoj asabistaj sustrečy na hetym tydni, paviedamiŭ ministr finansaŭ ZŠA Skot Biesent, piša Bi-bi-si.

U intervju amierykanskamu partnioru ZŠA telekampanii CBS Biesent raspavioŭ, što pahadnieńnie budzie ŭklučać u siabie «kančatkovuju ździełku» pa amierykanskim siehmiencie sietki TikTok, a taksama adterminoŭku ŭzmacnieńnia kantrolu na ekspart redkaziamielnych mietałaŭ z Kitaja.

Donald Tramp pahražaŭ ź listapada abkłaści impart z Kitaja pošlinaj u 100%, ale Biesent skazaŭ, što hety taryf, chutčej za ŭsio, prymianiacca nie budzie. Taksama, pavodle jaho słoŭ, Kitaj adnović impart značnych abjomaŭ sojevych baboŭ z ZŠA.

Tramp i staršynia KNR Si Czińpin sustrenucca ŭ čaćvier u Paŭdniovaj Karei. Biesent sustreŭsia z kitajskaj delehacyjaj na palach samitu ASIEAN u Małajzii, u jakim prymaje ŭdzieł i sam Tramp.

Baki «dasiahnuli źmiastoŭnaj ramačnaj damoŭlenaści dla dvuch lidaraŭ», skazaŭ ministr finansaŭ ZŠA, dadaŭšy: «Taryfaŭ udasca paźbiehnuć».

Piekin nazvaŭ abmierkavańnie kanstruktyŭnym. U kitajskim kamiunikie havorycca, što na pieramovach byŭ dasiahnuty «bazavy kansensus ab mierach dla vyrašeńnia zakłapočanaściaŭ» bakoŭ. «Abodva baki pahadzilisia praciahnuć abmierkavańni vynikovych kankretnych detalaŭ», — adznačajecca ŭ zajavie.

Paśla viartańnia Donalda Trampa ŭ Bieły dom u studzieni hetaha hoda jon pahražaŭ pavyšeńniami taryfaŭ na impart ź inšych krain i časam sapraŭdy ich pavyšaŭ. Mnohija krainy, takija jak Vialikabrytanija, damovilisia ab novych umovach handlu z ZŠA, jak praviła, z bolš nizkimi taryfami, čym pieršapačatkova pahražaŭ Tramp, ale vyšejšymi, čym jany byli raniej.

Kitaju Tramp pahražaŭ samymi vysokimi taryfami. Adnak jany šmat razoŭ adterminoŭvalisia, pakul praciahvalisia pieramovy ab handlovaj ździełcy.

U hetym miesiacy Tramp pryhraziŭ pavysić taryfy na kitajskija tavary na 100 pracentnych punktaŭ ź listapada ŭ adkaz na ŭzmacnieńnie abmiežavańniaŭ na ekspart z Kitaja redkaziamielnych mietałaŭ. Hetyja materyjały šyroka prymianiajucca ŭ mnohich vysokatechnałahičnych tavarach, a Kitaj kantraluje bolšuju častku ich suśvietnaj vytvorčaści — da 90%.

U inšym intervju ŭ niadzielu Biesient skazaŭ, što Kitaj prypynić novyja abmiežavańni na hod, a taksama adnović impart z ZŠA sojevych baboŭ. Heta adzin z bujnych artykułaŭ amierykanskaha ekspartu ŭ Kitaj, a kali Tramp pačaŭ taryfnuju vajnu, Piekin spyniŭ zakuplać baby ŭ amierykanskich fiermieraŭ.

• 1
• 0
• 0
• 0
• 0
• 0
• 0
• 0