Žurnalisty Biełaruskaha rasśledvalnickaha centra naviedali maštabnuju budoŭlu pad Sočy ŭ «Krasnaj Palanie» i zrabili zdymki pieršaj viadomaj zamiežnaj rezidencyi Łukašenki. A taksama daviedalisia, chto heta finansuje.
Pavodle infarmacyi BRC, minimum šeść firmaŭ ukłali nie mienš za 19,5 miljona dalaraŭ u budaŭnictva VIP-kompleksu, jaki ŭzvodzicca z 2023 hoda na terytoryi płoščaj 10 hiektaraŭ, raźmieščanaj u miežach samaha darahoha harnałyžnaha kurorta Rasii — «Krasnaj Palany».
Raniej było vyśvietlena, što ŭčastak, jaki raniej znachodziŭsia va ŭłasnaści Respubliki Biełaruś, dvuma sakretnymi ŭkazami Łukašenki byŭ pieradadzieny rasijskaj kampanii «Kompleks-Inviest» pa košcie ŭ 20 razoŭ nižejšym za rynkavy. U lutym 2024 hoda 99,9% kampanii nabyŭ hramadzianin Biełarusi Alaksandr Ramanoŭski — były aficer achovy Słužby biaśpieki Łukašenki.
Jak adznačajuć žurnalisty, placoŭka maje niaroŭny reljef i niekalki jarusaŭ. Pa stanie na kastryčnik hetaha hoda ŭźviedzieny čatyry katedžy. Try ź ich vyhladajuć amal dabudavanymi (nie chapaje tolki voknaŭ i dźviarej). Samy vialiki, čaćviorty, trochpaviarchovy budynak, schavany na ŭzhorku za drevami. Da jaho viadzie doŭhaja leśvica.
Pa pierymietry ŭčastku za aharodžaj bačnyja nievialikija pabudovy, vierahodna, pasty achovy. Taksama na zdymkach zafiksavany abjekt, padobny na vialiki haraž, i asobna ŭźviedzienaja vodaačyščalnaja stancyja.
Za budaŭnictva adkazvaje «Kompleks-Inviest».
Usie pracy pa płanie pavinny skončycca da kanca 2025 hoda.
Aficyjna na sajcie sočynskich inviestycyjnych prajektaŭ hety abjekt značycca jak hatelny kompleks, raźličany na 31 VIP-numar. Prajekt uklučaje asnoŭny budynak, try VIP-katedžy, haścinicu z restaranam, sadovy dom z zonaj barbiekiu, a taksama haraž dla 5 mikraaŭtobusaŭ i 5 lehkavych aŭtamabilaŭ z pakojem dla adpačynku kiroŭcaŭ i inšymi nieabchodnymi zbudavańniami dla kamfortnaha žyćcia i adpačynku.
Što ŭnutry
Płošča hałoŭnaha trochpaviarchovaha budynka składaje kala 3000 kv. m, što supastaŭna z pałovaj standartnaha futbolnaha pola. U im praduhledžana ŭsio nieabchodnaje, u tym liku dla asob z abmiežavanymi mahčymaściami.
Cokalny pavierch pryznačany dla adpačynku i rełaksacyi. Tut buduć raźmieščany vialiki basiejn, tureckaja i ruskaja łaźni, masažny kabiniet, fitnies-zała, zona adpačynku z baram, pamiaškańnie dla łyžaŭ i kala 20 inšych słužbovych pakojaŭ, u tym liku dla achovy.
Na pieršym paviersie praduhledžana pradstaŭničaja zona. Tut budzie faje płoščaj 150 kv. m ź siamimietrovymi stolami, bankietnaja zała, kinateatr, kaminny pakoj z rajalem, vialiki pracoŭny kabiniet i dadatkovy pakoj dla achovy.
Druhi pavierch adviedzieny pad žyłyja pamiaškańni. Tam raźmieściacca dźvie haściavyja spalni (pa 40 kv. m kožnaja) i adna hałoŭnaja spalnia, jakaja razam z haścinaj zajmaje 110 kv. m.
Try asobnyja viły, raźmieščanyja pobač, sastupajuć hałoŭnaj pabudovie pa płoščy — jany pa 700 kv. m, ale ŭ kožnaj ź ich taksama praduhledžany basiejn, łaźnia, stałovaja i pa čatyry spalni. Haścinica z restaranam, zhadanaja ŭ apisańni prajektu, zojmie 1000 kv. m.
Asablivaści achovy
Analiz techničnaj śpiecyfikacyi sistemaŭ achovy śviedčyć, što tut budujuć nie VIP-hatel, a VIP-krepaść. Praduhledžany šerah mier dla zabieśpiačeńnia maksimalnaj biaśpieki abjekta.
Pierš za ŭsio, pierymietr budzie abaronieny supraćtarannym i supraćpadkopnym stalovym płotam vyšynioj nie mienš za 2,5 mietra, abstalavanym vostrymi zakancoŭkami.
Ujezd na terytoryju mahčymy tolki praz šmattonnuju supraćtarannuju bramu.
Dla fizičnaj achovy kompleksu zapłanavana šeść pastoŭ achovy pa pierymietry ŭčastku. Akramia taho, uzvodzicca asobny budynak dla achovy, dzie praduhledžany šeść łožkaŭ dla adpačynku i śpiecyjalny pakoj dla zbroi.
Techničnaje abstalavańnie ŭklučaje kompleks sučasnych sistem nazirańnia i kantrolu. Siarod ich: mietała– i renthien-detektary dla pravierki asob i pradmietaŭ ciepłavizary, kamiery i sihnalizacyja dla pastajannaha manitorynhu terytoryi; sistema radyjomietryčnaha kantrolu dla vyjaŭleńnia radyjoaktyŭnych materyjałaŭ; asobnaja sistema vyjaŭleńnia i padaŭleńnia bieśpiłotnikaŭ.
Adkul hrošy
Aficyjnaj uładalnicaj kampanii «Kompleks-Inviest» na momant prodažu kaštoŭnaha nadziełu była piensijanierka Alena Borcieva. Jana — rodnaja siastra žonki nabližanaha da siamji Łukašenkaŭ biełaruskaha biznesoŭca Uładzimira Japryncava.
U lutym 2024 hoda kampaniju pierapisali na byłoha cupracoŭnika Słužby biaśpieki Alaksandra Łukašenki — Alaksandra Ramanoŭskaha. U hetym ža hodzie jon vydaŭ svajoj novaj kampanii piać pazykaŭ.
Hrošy kampanija atrymała ŭ pazyku ad jašče niekalkich jurasob. Adna ź ich — biełaruskaje TAA «Rehijanalny Paradak». Kiravaŭ kampanijaj na luty 2022 hoda hramadzianin Biełarusi Viačasłaŭ Vasiljeŭ. «Biełpoł» paviedamlaŭ, što Vasiljeŭ — supracoŭnik adzinaj u Biełarusi pryvatnaj achoŭnaj kampanii z pravam nasić zbroju «Hardservis». I «Hardservis», i «Rehijanalny paradak» — kampanii, źviazanyja z eks-kirujučym spravami Łukašenki Viktaram Šejmanam.
U pieralik sponsaraŭ trapiła rasijskaje TAA «M.R.I.S. Hrupp», jakoje zajmajecca roznymi vidami budaŭnictva i kiravańniem nieruchomaściu. Zasnavaŭ firmu Viktar Žuraŭkoŭ, syn byłoj kiraŭnicy spravami Łukašenki Haliny Žuraŭkovaj.
Hrošy dała taksama kiprskaja kampanija Rostumel Holding Limited. Za joj staić Andrej Śvirydaŭ, były namieśnik Šejmana ŭ Kiraŭnictvie spravami Łukašenki. Jon zajmaje ŭ Rostumel Holding Limited pasadu finansavaha dyrektara.
Jašče adna z kampanij sa śpisu kredytoraŭ mierkavanaj rezidencyi Łukašenki zarabiła hrošy na kantrabandnym reeksparcie tureckich kurynych łapak praź Biełaruś u Kitaj — kitajskaja Winshun Trade Limited.
Rasijskaje TAA «Domino» taksama finansavała budaŭnictva. Jaje dyrektar, biełarus Dźmitryj Žukoŭski, pracavaŭ u firmie, źviazanaj z Šejmanam, — TAA «Hłobałkastam». Jon ža byŭ zadziejničany i ŭ schiemie z kurynymi łapkami.
Rasśledavańnie padrychtavana ŭ partniorstvie ź inicyjatyvami «Rabočy Ruch» i BelPol, vydańniami «Važnyje Istorii», «Ślidstvo.Info», «Radyjo Svaboda» i OCCRP, pry padtrymcy supolnaści ŭkrainskich chaktyvistaŭ KibOrg i biełaruskich «Kibierpartyzanaŭ».
Ciapier čytajuć
Andrej Švied, architektar represij, pryznačany staršynioj Viarchoŭnaha suda22
Kamientary
Po biełaruskim riezidiencijam nie stoit, tipa mir s Ukrainoj. A vot po Soči samoje to!
Vsie ravno on ot suda otpietlajet ili zapadniki načnut "humannosť" k niehodiaju projavlať, kak s toj damboj.