Azierbajdžanski «Nieftčy» razhladaje kandydaturu Viktara Hančarenki na pasadu hałoŭnaha treniera, piša football.by.
Raniej hałoŭnym kandydatam byŭ ukrainiec i były trenier salihorskaha «Šachciora» Juryj Viernidub, adnak pieramovy ź im zastaparylisia. Na dadzieny momant abaviazki hałoŭnaha treniera paśla zvalnieńnia Samira Abasava 24 listapada vykonvaje Sanan Hurbanaŭ.
Paśla 13 turaŭ «naftaviki» zajmajuć 7‑ie miesca ŭ čempijanacie Azierbajdžana (z 12) z 16 bałami, a adstavańnie ad lidyrujučaha «Karabacha» składaje ŭžo 13 ačkoŭ.
Hančarenka zastajecca biez pracy z 12 červienia hetaha hoda, kali pakinuŭ «Pary NN».
Samym paśpiachovym etapam Viktara Hančarenki byŭ barysaŭski BATE, jaki pry im šeść razoŭ stanaviŭsia čempijonam krainy, jon upieršyniu vyvieŭ kłub u hrupavy turnir Lihi čempijonaŭ.
Potym pracavaŭ u Rasii z «Kubańniu», CSKA, «Krasnadaram», «Ufoj», «Urałam», «Pary NN». Z CSKA stanaviŭsia siarebranym pryzioram čempijanatu susiedniaj krainy, ale apošnija hady trenierskaja karjera nie zadałasia.
Spačatku jon nie zdoleŭ zachavać «Urał» u premjer-lizie, a potym jaho pazvali ŭ «Pary NN», kab jon pakinuŭ kłub u vyšejšym dyvizijonie, kłub finišavaŭ 13-m, prajhraŭ u stykavych matčach «Sočy», i biełarusa zvolnili. Ale «Pary NN» zastaŭsia ŭ premjer-lizie, bo «Chimki», što finišavali ŭ minułym siezonie 12-ja, nie atrymali licenziju.
Hančarenka paśla sychodu z BATE nie pracavaŭ pa-za miežami Rasii, ale apošnim časam kazaŭ, što nie vyklučaje varyjant uschodniaha viektara, naprykład Kazachstan i Siaredniuju Aziju.
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary