Ministr unutranych spraŭ Litvy aburany pieravozčykami: Paśla pajezdki ŭ Biełaruś jany viartajucca z pramytymi mazhami
Uładzisłaŭ Kandratovič pryznaje, što navat paśla taho, jak u Litvie ŭziali pad kantrol kantrabandnyja sietki, biełaruski režym moža dalej zapuskać pavietranyja bałony ŭ bok Vilenskaha aeraporta, tamu Litvie rana ci pozna daviadziecca šukać sposaby ich niejtralizacyi, paviedamlaje LRT.
«Pavodle našych źviestak, nivodnaja kraina nie maje rašeńnia, jakoje dazvalaje źbić pavietrany bałon na vyšyni 10 km z dapamohaj bieśpiłotnika abo inšaha kinietyčnaha ŭzbrajeńnia», — narakaje ministr.
Adnak jon spadziajecca, što litoŭskija kampanii zmohuć prapanavać rašeńnie dla niejtralizacyi pavietranych bałonaŭ. Ministerstva ekanomiki dy inavacyj abviaściła prahramu koštam 1 miljon jeŭra, meta jakoj — znajści sposab baraćby z pavietranymi bałonami, što zalatajuć u Litvu z kantrabandaj. Try kampanii prajšli pieršy etap konkursu, i čakajecca, što pratatyp zbroi budzie hatovy ŭ lutym.
Uładzisłaŭ Kandratovič kaža, što jon adzin z tych palitykaŭ, chto nie stračvaje aptymizmu ŭ baraćbie z prablemami. Ministr z entuzijazmam zajaŭlaje, što, niahledziačy na składanuju situacyju, palicyja, pamiežniki i vajskoŭcy sprabujuć pierapynić dziełavyja suviazi kantrabandystaŭ u Litvie, vajskoŭcy kantralujuć pavietranuju prastoru i šukajuć sposaby jaje abarony, biznes vypraboŭvaje roznyja varyjanty niejtralizacyi pavietranych bałonaŭ, a MZS prykładaje namahańni, kab uzmacnić cisk na biełaruski režym na ŭzroŭni Jeŭrasajuza.
Pavodle słoŭ ministra, zapuskajučy pavietranyja bałony, biełaruski režym imkniecca supraćpastavić litoŭskija dziaržaŭnyja ŭstanovy ŭłasnym hramadzianam, a zatrymlivajučy hruzaviki ŭ Biełarusi, jon sprabuje ŭpłyvać na Litvu praź biznes.
Uładzisłaŭ Kandratovič byŭ aburany pradstaŭnikami dalnabojščykaŭ, jakija naviedali Biełaruś, a paśla zapatrabavali ad Litvy dyjałohu ź Biełaruśsiu i vykazali sumnieŭ u tym, što kantrabandnyja pavietranyja bałony naohuł laciać u bok Litvy.
«Pabyŭšy tam paru dzion, jany viartajucca z pramytymi mazhami i kažuć: nie, bałony nie latajuć, a hruzaviki stajać, bo my nie razmaŭlajem. Dyk pra što ž my budziem razmaŭlać? Pra toje, kab «adpuścić hruzaviki»? Dy što tut niezrazumieła — hruzaviki pavinny jechać! Vidać, heta sproba cisnuć na nas unutry. Toje samaje adbyvajecca i praz žycharoŭ, jakija nie mohuć palacieć na adpačynak abo pa spravach», — zajaviŭ Kandratovič u intervju partału LRT.lt.
Kamientary