Jak fanipalskija «špakoŭni» pieramahli chejt: mikrastudyi pa 18 kv. m raźmiali za tydzień
Niahledziačy na nieadnaznačnyja vodhuki ŭ sacsietkach, usie mikrastudyi płoščaj 18 m² u novym domie «Sučasny» ŭ Fanipali byli raspradadzienyja mienš čym za tydzień, piša fanipol.by. Heta samy maleńki farmat žylla ŭ krainie, cana na jaki z pačatku prajekta vyrasła bolš jak na 50 pracentaŭ.
10 śniežnia zabudoŭščyk kompleksu paviedamiŭ, što ŭsie kvatery-studyi ŭ piatym domie, jaki budujecca, prapanavanyja koštam ad 35 000 dalaraŭ, pradadzienyja.
Taki imklivy prodaž adbyŭsia na fonie abmierkavańniaŭ u siecivie, dzie takoje žyllo časta nazyvali «sabačaj budkaj», «šafaj» i «špakoŭniaj».
Historyja mikrastudyj u ŽK «Sučasny» — heta kryvaja popytu, nakiravanaha ŭvierch. Usiaho try hady tamu, u 2022 hodzie, pieršyja takija kvatery płoščaj kala 20 m² u tolki što pabudavanym domie prapanoŭvalisia pa $22620 (kala $1131 za m²). Na etapie reziervavańnia cana mahła startavać i z $19 000.
Užo tady zabudoŭščyk nazyvaŭ metavuju aŭdytoryju: maładyja ludzi 20‑22 hadoŭ, jakija chočuć žyć asobna ad baćkoŭ za 15 chvilinach jazdy ad Minska.
Da leta 2025 hoda, na chvali ažyjatažu vakoł horada-spadarožnika, košt na studyi ŭ čaćviortym domie, jaki budujecca, padskočyŭ da $28 000. A da listapada, z pačatkam prodažaŭ u zaklučnym, piatym domie, płanka dasiahnuła $35 000 (kala $1944 za m²). Takim čynam, minimalny košt uvachodu za try hady vyras bolš jak na 50%.
Na druhasnym rynku ŭ hetym ža kompleksie studyi z ramontam užo aceńvalisia na $50 700 i navat $63 600, što rabiła kuplu na starcie vyhadnaj inviestycyjaj.
Kamientatary ŭ sacsietkach nie razumieli, jak možna prasić «canu Minska» za 18 kvadrataŭ u pradmieści. «Lecišča pad Fanipalem za takija hrošy z vadoj i kanalizacyjaj + plac. Nu i kvadrataŭ, tam sapraŭdy nie 18, a jak minimum 40», — davali karystalniki alternatyvy. Inšyja iranizavali: «Niešta šmat płoščy, treba pa 5‑8 mietraŭ pradavać».
Chto kuplaje mikrastudyi
Moładź i minčanie, dla jakich stalica niedastupnaja. Heta hałoŭnaja aŭdytoryja. Kali «adnapakajoŭka» ŭ Minsku kaštuje ad $60 000, a kredyt zastajecca darahim, $35 000 za ŭłasnuju kvateru za 15 chvilinach ad MKAD zdajecca razumnym kampramisam.
Inviestary, jakija raźličvajuć na arendu. Mikrafarmat idealny dla zdačy. Takaja studyja — hatovy anałah pakoja ŭ chostele, ale z asobnym sanvuzłom. Arendnyja staŭki ŭ Fanipali vidavočna nižejšyja za staličnyja.
Jak ni paradaksalna, na maleńkija kvatery zvažajuć i padžyłyja ludzi. Časam jany kuplajuć takuju studyju dla siabie, pakidajučy vialikuju kvateru siamji dziaciej.
Kamientary