Žycharka Dobruša atrymała hihancki rachunak za karystańnie hazam — usio z-za muža, ź jakim jana nie žyvie 30 hadoŭ
U 1997 hodzie žančyna raźviałasia z mužam, toj z kancami źjechaŭ u Rasiju, a zaraz joj pryjšoŭ rachunak pa poŭnym taryfie.
Na pryjom da staršyni Dobrušskaha rajvykankama Alaksandra Horbača Tamara Vasiljeŭna pryjšła paśla taho, jak atrymała rachunak za karystańnie pryrodnym hazam. Suma akazałasia značna bolšaj u paraŭnańni z papiarednimi miesiacami, piša «Dobrušski kraj».
Jana kaža, što jaje piensii nie chopić, kab apłačvać pasłuhi pa poŭnym taryfie.
U 1997 hodzie jana raźviałasia z mužam, ale zastałasia žyć u sumiesna pabudavanym domie, uładalnikam jakoha ličycca były muž. Mužčyna vyjechaŭ žyć u Rasiju, suviazi ni ź joj, ni ź dziećmi nie padtrymlivaje. U 2012 hodzie žančyna padavała zajavu na jaho vyšuk i atrymała ad pravaachoŭnikaŭ zapeŭnivańnie, što jon žyvy, ale paviedamlać pra svajo miescaznachodžańnie nie žadaje.
Staršynia rajvykankama rastłumačyŭ: sapraŭdy, z 1 kastryčnika pracazdolnyja hramadzianie, nie zaniatyja ŭ ekanomicy, abaviazany apłačvać uvieś abjom kamunalnych pasłuh — ciepłazabieśpiačeńnie, haz, vadu, elektryčnaść — pa poŭnych taryfach, a nie tolki svaju dolu, jak było raniej. Hetaje novaŭviadzieńnie datyčycca ŭsich žyłych pamiaškańniaŭ, što naležać takim asobam, i nakiravana na vyraŭnoŭvańnie ŭmoŭ apłaty dla ŭsich katehoryj hramadzian.
— Vyrašeńnie pytańnia lažyć u sudovaj płoskaści, — skazaŭ kiraŭnik rajona. — U pieršuju čarhu treba vyznačyć los žylla. Padajcie ŭ sud na padzieł majomaści, dakumientalna aformicie svaju dolu ŭ domie. Inšaha šlachu nie budzie.
Kiraŭnik rajona hazazabieśpiačeńnia Juryj Śpivak padtrymaŭ prapanavany vychad z prablemnaj situacyi.
— Paśla ŭsich pracedur źviartajciesia da nas, praviadziom abśledavańnie, zafiksujem, što hazavyja sietki znachodziacca na vašaj žyłpłoščy, — abmalavaŭ jon dalejšyja kroki. — Zaklučym damovu na hazazabieśpiačeńnie, i budziecie płacić pa ilhotnym taryfie.
***
Zaraz pryrodny haz pry najaŭnaści ličylnikaŭ padaražeŭ da 21,25 kapiejki za kubamietr (+0,63 kapiejki). Kali pryboraŭ uliku niama, to ŭ aciaplalny siezon płata składzie 73,6 kapiejki za kvadratny mietr ahulnaj płoščy (+4,88 kapiejki), a letam — 27,6 kapiejki za «kvadrat» (+1,83 kapiejki).
Zvadkavany haz dla damoŭ ź indyvidualnym aciapleńniem i ličylnikami abydziecca ŭ 3,1098 rubla za kubamietr u aciaplalny pieryjad (+26,41 kapiejki).
Bieź ličylnikaŭ taryf vyras da 10,1046 rubla za kvadratny mietr ahulnaj płoščy (+93,27 kapiejki).
Ciapier čytajuć
Što Babaryka i Kaleśnikava adkazali na pytańni pra vajnu85
Kamientary