Vialikabrytanija pieradaść 2,5 miljarda funtaŭ sterlinhaŭ, jakija Abramovič atrymaŭ ad prodažu «Čełsi», u fond dapamohi Ukrainie
Pakul jeŭrapiejskija krainy sprabujuć damovicca adnosna vykarystańnia zamarožanych rasijskich dziaržaŭnych aktyvaŭ, Vialikabrytanija pierachodzić da kankretnych dziejańniaŭ u dačynieńni da pryvatnaha rasijskaha kapitału. Premjer-ministr Kir Starmier pastaviŭ aliharchu ŭltymatum: albo jon dobraachvotna nakiruje srodki na dapamohu Ukrainie, albo spravu vyrašyć sud.
Jak piša The Guardian, urad Vialikabrytanii aficyjna pačynaje praceduru pieravodu 2,5 miljarda funtaŭ sterlinhaŭ, atrymanych ad prodažu futbolnaha kłuba «Čełsi» Ramanam Abramovičam, na humanitarnyja patreby Ukrainy.
Vystupajučy ŭ Pałacie abščyn, Kir Starmier zajaviŭ, što hrošy rasijskaha miljardera, jaki znachodzicca pad brytanskimi sankcyjami, buduć nakiravanyja ŭ śpiecyjalna stvorany novy fond dla Ukrainy. Vydača Aramovičam śpiecyjalnaha dazvołu na hety tranśfier nazvanaja «apošnim šancam» dla aliharcha vykanać svaje abaviazacielstvy biez sudovaha ŭmiašańnia.
«Hadzińnik cikaje. Raman Abramovič pavinien vykanać abiacańnie, dadzienaje pry prodažy «Čełsi». Naš urad hatovy dabicca vykanańnia hetaha praz sud, kab kožnaja kapiejčyna dajšła da tych, čyje žyćci byli razburanyja niezakonnaj vajnoj Pucina», — cytuje Starmiera vydańnie.
Rasijski biznesmen pradaŭ łondanski kłub u 2022 hodzie pad ciskam brytanskich uładaŭ paśla pačatku poŭnamaštabnaha ŭvarvańnia Rasii va Ukrainu. Tady dazvoł na prodaž byŭ dadzieny tolki pry ŭmovie, što ŭsie srodki pojduć achviaram vajny. Adnak hrošy zastalisia zamarožanymi na bankaŭskim rachunku kampanii Abramoviča Fordstam praz doŭhija sprečki: bok aliharcha chacieŭ, kab srodki mahli vydatkoŭvacca nie tolki va Ukrainie, ale i ŭ inšych krainach, što nie zadavalniała Łondan.
U brytanskim uradzie nazvali situacyju, kali vielizarnaja suma lažyć biez ruchu bolš za dva hady, «nieprymalnaj». Ułady adznačyli, što doŭhi čas sprabavali damovicca z pradstaŭnikami biznesmena, adnak ciapier hatovy da rašučych dziejańniaŭ.
Jak zaŭvažaje vydańnie, hety krok Łondana supaŭ pa časie z abmierkavańniem bolš maštabnaha płana ES pa vykarystańni zamarožanych rasijskich aktyvaŭ dla finansavańnia Ukrainy. Maskva ŭžo nazvała padobnyja namiery «kradziažom» i pahražaje ŭ adkaz kanfiskavać aktyvy jeŭrapiejskich pryvatnych inviestaraŭ u Rasii.
Ciapier čytajuć
Biełaruska nabiła na ciele partrety Łukašenki i jaho synoŭ, Umki, Pucina dy Si Czińpina9
Kamientary
Słava Ukrajini 💖🇺🇦💖👍💪