Turystam daviadziecca płacić pa dva jeŭra, kab padyści da znakamitaha rymskaha fantana Trevi
Takim čynam haradskija ŭłady spadziajucca źnizić chaatyčnyja turystyčnyja patoki.
Turysty ŭ Rymie nieŭzabavie buduć abaviazanyja płacić uvachodny zbor dva jeŭra, kali zachočuć ubačyć znakamity fantan Trevi zblizku. Takim čynam haradskija ŭłady spadziajucca ŭ tym liku źnizić «chaatyčnyja turystyčnyja patoki», piša Bi-bi-si.
Novaje abmiežavańnie dla naviedvalnikaŭ, jakija žadajuć pahladzieć na pomnik u styli baroka, nabudzie moc z 1 lutaha 2026 hoda.
Sabranyja srodki buduć pastupać u haradski biudžet dla apłaty vydatkaŭ na ŭtrymańnie fantana i absłuhoŭvańnie naviedvalnikaŭ. Horad raźličvaje atrymlivać kala 6,5 miljona jeŭra ŭ hod tolki za košt płaty za naviedvańnie fantana.
Abviaščajučy pra hetaje rašeńnie ŭ piatnicu, mer Ryma Rabierta Hualćjery, jak paviedamiła ahienctva Reuters, adznačyŭ, što «dva jeŭra — heta nie tak užo i šmat… i heta pryviadzie da mienš chaatyčnych turystyčnych patokaŭ».
Zbor za naviedvańnie fantana Trevi źjaŭlajecca častkaj novaj taryfnaj sistemy dla niekatorych muziejaŭ i pomnikaŭ u stalicy Italii.
Dostup da šerahu abjektaŭ, za jakija ciapier spahaniajecca ŭvachodnaja płata, stanie biaspłatnym dla žycharoŭ Ryma.
U toj ža čas turysty i asoby, jakija nie źjaŭlajucca rezidentami Italii, pavinny buduć płacić za ahlad fantana Trevi i jašče piaci słavutaściaŭ, u tym liku muzieja Napaleona.
Dzieci da piaci hadoŭ, a taksama ludzi ź invalidnaściu i asoba, jakaja ich supravadžaje, buduć vyzvalenyja ad płaty za naviedvańnie słavutaściaŭ. Turysty pa-raniejšamu zmohuć biaspłatna hladzieć na fantan Trevi, pabudavany italjanskim architektaram Nikoła Salvi ŭ XVIII stahodździ, — ale z adlehłaści.
Pavodle danych meryi Ryma, ciapier hety abjekt u siarednim naviedvajuć kala 30 tysiač čałaviek u dzień.
Paśla restaŭracyjnych rabot, praviedzienych letaś, Hualćjery ŭvioŭ sistemu čerhaŭ, kab praduchilić skapleńnie vialikich natoŭpaŭ kala słavutaści.
Ciapier adnačasova vakoł fantana mohuć znachodzicca nie bolš za 400 čałaviek.
Kamientary
Vas tam jašče i abkraduć 🎄
Vsiu žizń vchod tuda był biespłatnyj.
Sovsiem užie…