Apieracyja pa źmianšeńni hrudziej stała samaj papularnaj siarod mužčyn ZŠA
U Złučanych Štatach mužčyny ŭsio čaściej źviartajucca da płastyčnych chirurhaŭ nie dziela amaładžeńnia, a kab vyrašyć kankretnuju fizijałahičnuju prablemu. Čamu apieracyja pa źmianšeńni hrudziej uznačaliła rejtynh papularnaści ŭ krainie, raźbirałasia vydańnie New York Post.
Pavodle źviestak Amierykanskaha tavarystva płastyčnych chirurhaŭ, apieracyja pa źmianšeńni mužčynskich hrudziej vyjšła na pieršaje miesca siarod usich vidaŭ mužčynskaj płastyki. Kali ŭ 2019 hodzie było praviedziena kala 21 tysiačy takich umiašańniaŭ, to ŭ 2024‑m ich kolkaść pieravysiła 26 tysiač.
Što takoje hiniekamastyja
Pryčynaj takich apieracyj zvyčajna stanovicca hiniekamastyja — razrastańnie hrudnoj tkanki ŭ mužčyn. Pavodle acenak miedykaŭ, z hetym stanam u toj ci inšy momant sutykajecca jak minimum pałova mužčyn.
U padletkavym uzroście hiniekamastyja najčaściej uźnikaje z-za harmanalnych źmienaŭ i ŭ mnohich vypadkach z časam źnikaje sama. Adnak u darosłych mužčyn jana moža raźvivacca abo zachoŭvacca pa inšych pryčynach — u tym liku z-za lišniaj vahi, pryjomu lekaŭ, užyvańnia ałkaholu abo narkotykaŭ, istotna ŭpłyvajučy na samaacenku i sacyjalnyja pavodziny.
New York Post pryvodzić prykład 44‑hadovaha žychara Ńju-Jorka Brajana Hansalesa. Jon raskazvaje, što z padletkavych hadoŭ nasiŭ šyrokaje adzieńnie i navat u śpioku nadziavaŭ niekalki kašul, kab schavać hrudzi. Navat paśla značnaj straty vahi prablema nie źnikła, i ŭ 2021 hodzie jon vyrašyŭsia na apieracyju.
Pavodle jaho słoŭ, chirurhičnaje ŭmiašańnie nie tolki źmianiła źniešni vyhlad, ale i dało adčuvańnie ŭpeŭnienaści, jakoha jon nie mieŭ dziesiacihodździami.
Padobny dośvied apisvaje i radyjoviadoŭca Kiełbin Ramires, jaki da 30 hadoŭ pakutavaŭ ad niemahčymaści padabrać adzieńnie i saromieŭsia naviedvać plažy. Jon adznačaje, što navat ruch bodypazityvu nie dapamoh jamu pryniać siabie, pakul prablema nie była vyrašana chirurhična.
Jak tłumačać daktary, hiniekamastyja moža mieć roznuju pryrodu. Kali hrudzi pavialičvajucca pieravažna z-za tłušču, pachudańnie sapraŭdy moža dapamahčy. Ale kali havorka idzie pra załozistuju tkanku, źnižeńnie vahi nie daje poŭnaha efiektu.
Heta paćviardžaje i historyja Dešona Peniksa. Mužčyna skinuŭ bolš za 50 kiłahramaŭ z dapamohaj sučasnych preparataŭ, adnak forma hrudziej amal nie źmianiłasia. U vyniku jamu spatrebiłasia kompleksnaja apieracyja, jakaja ŭklučała nie tolki lipasakcyju, ale i vydaleńnie ščylnaj załozistaj tkanki razam ź liškami skury. Śpiecyjalisty padkreślivajuć: pry pachudańni załozy nie źmianšajucca, a časam stanoviacca jašče bolš prykmietnymi na fonie ahulnaj strojnaści.
Dešon Peniks demanstruje vyniki apieracyi
Što za apieracyja
Miedyčny padychod da apieracyi zaležyć ad typu i stupieni hiniekamastyi. Charaktar chirurhičnaha ŭmiašańnia vyznačajecca tym, što stała asnoŭnaj pryčynaj pavieličeńnia hrudziej. Kali prablema vyklikana pieravažna lišnim tłuščam (tak zvanaja psieŭdahiniekamastyja), lekary vykarystoŭvajuć lipasakcyju.
Adnak čaściej za ŭsio havorka idzie pra razrastańnie ščylnaj załozistaj tkanki niepasredna pad saskom. U hetym vypadku adnoj lipasakcyi niedastatkova — chirurhu nieabchodna zrabić nadrez, jak praviła, pa krai areoły, kab fizična vydalić hetuju masu. Mnohim pacyjentam patrabujecca kambinavany mietad: i lipasakcyja, i niepasrednaje vyrazańnie załoz i liškaŭ skury.
Praces adnaŭleńnia taksama maje svaje asablivaści. Paśla apieracyi pacyjentam časta ŭstaloŭvajuć drenažnyja trubki dla advodu lišniaj vadkaści, jakija treba nasić kala tydnia. Radyjoviadoŭca Kiełbin Ramires, jaki prajšoŭ praz hetuju praceduru, uzhadvaje, što pieršy čas jamu było ciažka i niekamfortna navat prosta ciahnucca rukami za rečami. Tym nie mienš bolšaść pacyjentaŭ viartajecca da pracy ŭžo praz 8—10 dzion.
Košt apieracyi, pavodle źviestak New York Post, u siarednim składaje kala $10 tysiač.
Hieroi materyjału padkreślivajuć, što rašeńnie zrabić apieracyju nie było daninaj modzie. Dla ich heta sposab pazbavicca ad šmathadovaha soramu i pastajannaha adčuvańnia ŭłasnaj «niapravilnaści». Miedyki źviazvajuć rost popytu ź fienomienam sacyjalnych sietak, dzie mužčyny pačali adkryta dzialicca svaimi historyjami, razburajučy staryja stereatypy pra «niemužčynskija» prablemy.
Kamientary