Rasijskaja ambasada ŭ Karei vyviesiła banier «Pobieda budiet za nami»
Źniać banier z trykałoram u Sieule rasijanie admovilisia.
U Sieule na budynku ambasady RF u Paŭdniovaj Karei napiaredadni čaćviortaj hadaviny ŭvarvańnia Rasii va Ukrainu źjaviŭsia banier na ruskaj movie «Pobieda budiet za nami», paviedamlaje «Ukrainskaja praŭda».
Banier daŭžynioj prykładna 15 mietraŭ na fonie rasijskaha trykałora źjaviŭsia na budynku ambasady ranicaj 21 lutaha.
Jak adznačaje vydańnie Chosun, u dypłamatyčnych kołach Sieuła ŭzmacniajecca krytyka, što «raźmiaščeńnie nadpisu, jaki abviaščaje pieramohu ŭ vajnie-ŭvarvańni ŭ sercy inšaj krainy, źjaŭlajecca značnym adchileńniem ad dypłamatyčnych kanviencyj».
Viadoma, što dypłamatyčnyja pradstaŭniki ŭ Paŭdniovaj Karei, uklučajučy pradstaŭnikoŭ jeŭrapiejskich krain, vykazali zaniepakojenaść adnosna hetaha baniera Ministerstvu zamiežnych spraŭ.
Akramia taho, 11 lutaha ambasadar Rasii ŭ Paŭdniovaj Karei Hieorhij Zinoŭjeŭ zajaviŭ na pres-kanfierencyi z paŭdniovakarejskimi žurnalistami ŭ ambasadzie: «Rasija nie zabyvaje pra toje, nakolki vialiki ŭkład unieśli paŭnočnakarejskija vojski ŭ vyzvaleńnie paŭdniovaj častki Kurskaj vobłaści ad ukrainskich vojskaŭ i zachodnich najmitaŭ», dadaŭšy: «My nie zabudziem vielič paŭnočnakarejskich vojskaŭ».
Urad Paŭdniovaj Karei papiaredziŭ, što banier i vykazvańni ambasadara byli «vidavočna praźmiernymi».
Ministerstva zamiežnych spraŭ adznačyła, što raźmiaščeńnie takich nadpisaŭ na budynku ambasady moža spravakavać paŭdniovakarejskuju hramadskaść i naškodzić adnosinam pamiž Paŭdniovaj Karejaj i Rasijaj. Uličvajučy toje, što ambasada Ukrainy taksama raźmieščana ŭ Sieule, isnujuć aściarohi adnosna stvareńnia niepatrebnaj dypłamatyčnaj napružanaści.
Ministerstva patrabavała źniać banier, ale rasijskaja ambasada admoviłasia. Paŭdniovakarejski ŭrad nie moža źniać jaho siłaj praź Vienskuju kanviencyju, jakaja praduhledžvaje niedatykalnaść dypłamatyčnych misij.
Vydańnie adznačaje, što 24 lutaha minułaha hoda, u treciuju hadavinu ŭvarvańnia, Rasija praviała mitynh u padtrymku vajny suprać Ukrainy ź vialikim nacyjanalnym ściaham u Sieule. Viadoma, što rasijskaja ambasada ŭ Paŭdniovaj Karei płanuje pravieści padobny mitynh i ŭ čaćviortuju hadavinu ŭvarvańnia.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary
Karikaturno smotritsia etot łozunh na vłasovskom fłahie.
Vpročiem,kak i vsie,čieho kasajutsia niemytyje ruki.