U Iranie aryštavali scenarysta filma «Prostaja vypadkovaść», naminavanaha na «Oskar»
U Iranie zatrymany adzin sa scenarystaŭ dramy «Prostaja vypadkovaść» Miechdzi Machmudzian. Aryšt adbyŭsia ŭsiaho za niekalki tydniaŭ da cyrymonii ŭručeńnia premii «Oskar», dzie karcina pradstaŭlena adrazu ŭ dźviuch naminacyjach — za najlepšy scenaryj i jak najlepšy mižnarodny film.
Jak paviedamlajuć pravaabaroncy, Machmudziana zatrymali ŭ subotu, 31 studzienia. Aficyjnyja abvinavačvańni pakul nie ahučanyja, adnak aryšt źviazvajuć z tym, što za niekalki dzion da hetaha scenaryst razam ź inšymi dziejačami kultury padpisaŭ adkrytuju zajavu. U joj padpisanty rezka asudzili žorstkaje padaŭleńnie pratestaŭ u krainie i nazvali dziejańni režymu Ali Chamieniei «arhanizavanym dziaržaŭnym złačynstvam suprać čałaviečnaści». Razam z Machmudzianam byli zatrymanyja jašče dvoje padpisantaŭ hetaha lista.
Režysior filma Džafar Panachi, jaki sam nieadnarazova padviarhaŭsia pieraśledu i turemnamu źniavoleńniu, vystupiŭ u padtrymku kalehi. Jon nazvaŭ Machmudziana «redkim maralnym aryjenciram». Mienavita sumiesnaje znachodžańnie Panachi i Machmudziana ŭ turmie padčas papiarednich represij natchniła ich na stvareńnie scenaryja «Prostaj vypadkovaści».
Film, źniaty ŭ Iranie tajemna, staŭ pieramožcam Kanskaha kinafiestyvalu i vyłučany na «Oskar» ad Francyi.
Siužet raspaviadaje historyju byłoha palitviaźnia, jaki sustrakaje svajho mučyciela i vyrašaje adpomścić. U samim Iranie pakaz stužki zabaronieny, a ŭ Rasii Ministerstva kultury admoviła filmu ŭ prakatnym paśviedčańni, paličyŭšy, što jon nie adpaviadaje miascovamu zakanadaŭstvu.
Ciapier čytajuć
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
Kamientary
Padaj isk u sud !
Na 1 bln.
U Ajataly josc...