Žonka rasijskaha miljardera ździejśniła samahubstva ŭ IČU. U śmierci jana abvinavaciła muža
U izalatary časovaha ŭtrymańnia horada Istra skončyła žyćcio samahubstvam 46‑hadovaja Alija Halickaja — byłaja žonka eks-top-mieniedžara «Alfa-banka» i zasnavalnika vienčurnaha fondu Almaz Capital Alaksandra Halickaha.
Trahiedyja zdaryłasia praz sutki paśla taho, jak sud aryštavaŭ jaje pavodle abvinavačańnia ŭ vymahalnictvie kałasalnaj sumy ŭ byłoha muža.
Jak paviedamiła pravaabaronca Jeva Mierkačova, Alija znachodziłasia ŭ kamiery IČU adna. Žančyna pakinuła pieradśmiarotnuju zapisku, u jakoj naŭprost abvinavaciła ŭ svajoj śmierci byłoha muža-miljardera.
Kanflikt pamiž byłym mužam i žonkaj pierajšoŭ u dramatyčnuju płoskaść paśla ich razvodu ŭ sakaviku 2025 hoda. Śćviardžałasia, što Alija patrabavała ŭ Halickaha 150 miljonaŭ dalaraŭ, pahražajučy apublikavać kampramat na biznesmiena. U vyniku jaje kinuli ŭ IČU.
U pary zastalisia dźvie dački. «Nie viedaju, jak jon budzie z hetym žyć, jak patłumačyć dzieciam, čamu ich maci apynułasia pad vartaj, a potym tam nakłała na siabie ruki», — napisała pravaabaronca Jeva Mierkačova.
Alaksandr Halicki viadomy jak bujny hulec na rynku vienčurnych inviestycyj i były člen rady dyrektaraŭ «Alfa-banka», jaki pakinuŭ pasadu ŭ 2022 hodzie paśla ŭviadzieńnia sankcyj suprać Michaiła Frydmana i Piatra Aviena.
Kamientary