Za hod sa stychijnych śmietnikaŭ u minskich lasach vyvieźli kala 1200 ton śmiećcia
U 2025 hodzie ź lasnych zon Minska vyvieźli kala 1200 ton śmiećcia. Takija ličby paviedamiŭ staršynia Minskaha haradskoha kamiteta pryrodnych resursaŭ i achovy navakolnaha asiarodździa Alaksandr Drahun na apieratyŭnaj naradzie ŭ Minharvykankamie, pišuć «Minsk-Naviny».
Dla baraćby sa stychijnymi śmietnikami ŭ lasach płanujecca vykarystoŭvać fotapastki i sistemy videanazirańnia, jakija buduć fiksavać parušeńni. Asobam, što parušajuć ekałahičnaje zakanadaŭstva, buduć nakiroŭvać paviedamleńni z patrabavańniem apłacić štraf.
Pavodle słoŭ Alaksandra Drahuna, u 2025 hodzie jakaść pavietra ŭ Minsku ŭ cełym adpaviadała vysokim standartam i najčaściej aceńvałasia jak «vielmi dobraja», «dobraja» abo «umieranaja». Karotkačasovaje pieravyšeńnie dapuščalnych normaŭ ćviordych čaścinak zafiksavali tolki ŭ rajonie Uručča, što było źviazana z praciahłaj adsutnaściu daždžoŭ. Z pačatkam apadkaŭ situacyja chutka narmalizavałasia.
Asnoŭnaja častka škodnych vykidaŭ u stalicy — kala 80 % — prypadaje na transpart, jašče 20% utvarajuć pramysłovyja pradpryjemstvy. U 2026 hodzie płanujecca skaracić ahulny abjom vykidaŭ prykładna na tysiaču ton, u tym liku za košt vyvadu z ekspłuatacyi sastarełaha abstalavańnia na adnym ź minskich zavodaŭ.
Taksama adznačajecca rost kolkaści ekałahičnaha transpartu: kali dva hady tamu ŭ Minsku naličvałasia kala 1200 elektramabilaŭ, to ciapier ich užo bolš za 24 tysiačy. U ciopły siezon žychary horada aktyŭna karystajucca ravarami, što taksama spryjaje źnižeńniu ŭzroŭniu zabrudžvańnia pavietra.
Akramia taho, ŭ stalicy było vysadžana bolš za 55 tysiač dreŭ, kala 318 tysiač kustoŭ i zvyš 11 miljonaŭ kvietkavych raślin, a taksama abnoŭlena bolš za 300 hiektaraŭ hazonaŭ.
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Kamientary