Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?
Biełaruski brejk-dansier Mikita Sielaźnioŭ, viadomy ŭ tancavalnaj supolnaści pad nikam Wild Jerry, užo bolš za hod znachodzicca ŭ kitajskaj turmie. Pavodle jaho siabroŭ, praces pa spravie Mikity prachodziŭ u zakrytym režymie, jamu dali 11 hadoŭ źniavoleńnia. Ciapier tancor padaŭ apielacyju, a jaho siabry źbirajuć hrošy na advakata.
Chto taki Mikita Sielaźnioŭ
Mikita Sielaźnioŭ rodam ź Viciebska. U biełaruskim brejku jon adzin z najbolš prykmietnych tancoraŭ svajho pakaleńnia. Jon vystupaŭ na mižnarodnych spabornictvach i fiestyvalach, zamiežnych brejk-batłach i šou.
Mikita trapiŭ u finał suśvietnaha čempijanatu pa brejkinhu Red Bull BC One — adnaho z hałoŭnych turniraŭ u hetaj kultury. Dla tancora trapić u finał BC One prykładna toje ž, što dla spartsmiena vystupić na Alimpijskich hulniach.
U supolnaści Mikitu apisvajuć jak «tancora, jaki ŭmieŭ pracavać na vialikaj scenie i na kamiernym batle adnolkava ŭpeŭniena».
Apošni post Mikity Sielaźniova ŭ instahramie datujecca 1 śniežnia 2024 hoda, jon tady viarnuŭsia ŭ Biełaruś paśla vystupu na čempijanacie pa brejk-dansu ŭ Maskvie.
Na jaho staroncy možna znajści šmat videa z vuličnymi tancami ŭ roznych azijackich krainach, najbolš — z Kitaja.
Što zdaryłasia ŭ Kitai
Pavodle infarmacyi ad siabroŭ, Mikitu zatrymali ŭ Piekinie, kudy jon pajechaŭ na pracu, 21 śniežnia 2024 hoda. Z taho času jon znachodzicca za kratami ŭ Kitai. Sud byŭ zakryty, rodnyja i siabry nie bačyli materyjałaŭ spravy, sutnaść abvinavačvańnia nieviadomaja. Viadoma tolki pra naviedvańnie sauny z «novymi znajomymi» i načleh u pryvatnym pakoi, paśla jakoha adbyłosia zatrymańnie.
Na dniach staŭ viadomy prysud — 11 hadoŭ pazbaŭleńnia voli. Mikita padaŭ apielacyju, razhlad jaho abskardžańnia adbudziecca ciaham miesiaca. Pasłuhi advakata kaštujuć 10 tysiač dalaraŭ. Siabry i blizkija Mikity abviaścili zbor.
Za što ŭ Kitai mohuć dać 11 hadoŭ turmy
Kitajskaja kryminalnaja sistema davoli žorstkaja i časta praduhledžvaje vialikija terminy za dziejańni, jakija ŭ Jeŭropie mahli b ličycca mienš ciažkimi.
Prysud u 10‑12 hadoŭ moža pahražać, naprykład, za narkotyki (navat za nievialikija abjomy), arhanizacyju abo ŭdzieł u niezakonnych viečarynach z narkotykami, surjoznyja parušeńni mihracyjnaha zakanadaŭstva ŭ spałučeńni ź inšymi artykułami i inšaje.
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary
Dziaŭčyna davała svaju zhodu na publikacyju jaje fota? Čamu tvar nie zablurany?