«Recepty pryjšli jašče ad prababuli». Mazyranka try hady viadzie kulinarny błoh i sabrała amal 140 tysiač padpisčykaŭ
U Instagram Taćciana Ściepaniejeva viadomaja jak tatka_sashevna. Žyvie jana ŭ ahraharadku Kozienki — jon zaraz ščylna prymykaje da Mazyra, ale raniej byŭ prosta vioskaj. Mienavita ŭ viaskovaj abstanoŭcy i sfarmavalisia kulinarnyja zvyčki žančyny, raskazvajuć «Mocnyja naviny».
Pa słovach Taćciany, ź dziacinstva jana dapamahała mamie z hatavańniem, a ŭ chacie była pieč — smak ježy, pryhatavanaj u joj, niepaŭtorny. Ciapier jana hatuje na kamieru i vykładvaje videa na svajoj staroncy ŭ sacsietcy.
U «repiertuary» ŭ błohierki možna znajści i chatni chleb na kipieni, i kryvianku, i salanku pa-viaskovamu, i «bituju» kurycu, i śvinyja nožki z časnakom.
«Kali ty vyras na vioscy, ty cudoŭna viedaješ našu viaskovuju, sapraŭdnuju biełaruskuju kuchniu. Usie hetyja recepty pryjšli jašče ad prababuli, babuli, mamy», — kaža mazyranka.
Ideja vieści błoh pryjšła dziakujučy samim padpisčykam. Raniej Taćciana vykładvała svajo zvyčajnaje žyćcio, časam pakazvała svaje chatnija stravy ŭ storyz. Ludzi stali cikavicca, jak heta pryhatavana, i žančyna vyrašyła pakazvać čaściej.
Rodnyja padtrymali: Taćciana pryznajecca, što ŭdziačnaja mužu, jaki nie pieraškadžaŭ zajmacca «hłupstvam». Z časam jana adšlifavała manieru zdymki, źjaviłasia firmovaje pryvitańnie «Maje charošyja», a kolkaść apublikavanych videa pieravaliła za tysiaču.
Kamientary