«Piać kvater u Minsku, 25 mašyn». Novyja padrabiaznaści pra dyrektara «dabračynnaha fondu»
Z bolš jak 1,5 miljona rubloŭ, jakija pastupili na rachunak fondu, Viačasłaŭ Łysiankoŭ patraciŭ na dabračynnaść tolki kala 55 tysiač rubloŭ.
Pra zatrymańnie zasnavalnika dabračynnaha fondu «Dapamoha ciažkachvorym dzieciam» Viačasłava Łysiankova stała viadoma ŭ kancy studzienia.
Pavodle viersii śledstva, u bolšaści vypadkaŭ achviaravańni, jakija pastupajuć na rachunak fondu, dyrektar vydatkoŭvaŭ na svaje patreby, kuplu i absłuhoŭvańnie aŭtamabilaŭ, arendu kvatery, nabyćcio techniki, asabistyja bytavyja patreby. Suma prysvojenych srodkaŭ — bolš za 830 tys. rubloŭ.
Ciapier stali viadomyja novyja padrabiaznaści hetaj hučnaj spravy, piša Onliner.by.
Pavodle viersii śledstva, u 2024 hodzie 28‑hadovy minčuk stvaryŭ dabračynny fond pad nazvaj «Dapamoha ciažkachvorym dzieciam» i, budučy jaho dyrektaram, całkam kantralavaŭ dziejnaść arhanizacyi.
Na kastryčnik 2025 hoda z bolš za 1,5 miljona rubloŭ, jakija pastupili na rachunak fondu, na dabračynnyja mety było vydatkavana tolki kala 55 tys. rubloŭ, — raspaviali ŭ efiry telekanała «Pieršy infarmacyjny».
U efiry taksama prahučali telefonnyja razmovy dyrektara ź siabram, u jakich jon raskazvaŭ pra schiemy vyvadu hrošaj z fondu.
«Ja naohuł ciapier dumaju pieraaformić mašyny, tyja, što zastalisia dzieviać<…>, nu, takuju ž schiemu zrabić, nu ty zrazumieŭ, i firmu na vałacuhu aformić, dy i ŭsio. Na dropa čysta, kab maksimalna siabie zaścierahčy», — razvažaŭ Łysiankoŭ.
Akramia hetaha, stała viadoma, što va ŭłasnaści Viačasłava Łysiankova było piać kvater u Minsku i 25 aŭtamabilaŭ (byli aformlenyja na padstaŭnych asob).
Usio heta ciapier aryštavana. Taksama vyśviatlajecca los najaŭnych achviaravańniaŭ (ich źbirali ŭ «skryni dabra»), jakija, jak vyśvietlili śledčyja, nie zaličvalisia na rachunki. Śledstva praciahvajecca.
Paviedamlajecca taksama, što paśla ŭsich rezanansnych spraŭ dabračynnaja śfiera budzie ŭparadkavana. Tak, naprykład, užo rychtujecca novy narmatyŭny akt, jaki pavinien zrabić dabračynnaść prazrystaj.
U dakumiencie prapišuć vyraznyja miechanizmy: jak źbirać, jak davać spravazdaču i jak kantralavać ruch hrošaj, kab dapamoha dachodziła da adrasata, a nie asiadała na kartach influjensieraŭ. Taksama budzie ŭrehulavanaja praca sa skryniami miłasernaści. Hałoŭnaja meta ŭsich hetych mierapryjemstvaŭ u tym, kab usie sabranyja achviaravańni dachodzili da tych, chto sapraŭdy ŭ ich maje patrebu.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary