Kamandujučy Nachvardyjaj Ukrainy: My možam vajavać jašče niekalki hadoŭ
«Pieramoha dla Ukrainy ŭ vajennym płanie — heta, viadoma, zabrać svaje terytoryi», — ličyć Alaksandr Piŭnienka.
Kamandujučy Nacyjanalnaj hvardyi Ukrainy (NHU) bryhadny hienierał Alaksandr Piŭnienka daŭ intervju Bi-bi-si i raskazaŭ, jakoj moža być pieramoha Ukrainy, što dla hetaha treba i kolki jašče hadoŭ Ukraina moža vieści vajnu.
«Pieramoha dla Ukrainy ŭ vajennym płanie — heta, viadoma, zabrać svaje terytoryi. Ja razumieju, što heta, mahčyma, nie aktualna siońnia, ale patencyjna na budučyniu. Razumieju, što moža prajści niekalki dziasiatkaŭ hadoŭ — nievažna», — kaža Piŭnienka.
Viartańnie terytoryj — heta stratehičnaja zadača ŭkrainskaha ŭrada i nasielnictva. Adnak zaraz pryjarytet — vyžyvańnie i spynieńnie ahniu, kaža hienierał. Alaksandr Piŭnienka kamanduje NHU ź lipienia 2023 hoda.
Da hetaha jon uznačalvaŭ Uschodniaje terytaryjalnaje ŭpraŭleńnie Nachvardyi, adbivaŭ u rasijskich vajennych vakolicy Charkava i ŭtrymlivaŭ Bachmut. Maje zvańnie Hieroja Ukrainy.
Pra terytoryi
Na pytańnie žurnalistaŭ, ci hatova Ukraina sastupić terytoryi, Alaksandr Piŭnienka adkazaŭ, što heta «niemahčyma ŭ ciapierašni čas».
«Spynieńnie ahniu pa linii bajavoha sudakranańnia — heta jašče historyja, jakuju my možam zrazumieć. A addavać terytoryi nichto nie budzie», — skazaŭ hienierał.
U toj ža čas, jon pryznaŭ, što kali budzie taki zahad ad viarchoŭnaha hałoŭnakamandujučaha — ukrainskija vajennyja jaho vykanajuć.
«Tamu što my pravavaja kraina. Ale jak usprymie heta nasielnictva našaj krainy, i navošta tady było pačynać abaraniacca?… Heta možna było i tady damovicca i addać prosta, naprykład, Łuhansk i Danbas i na hetym skončyć vajnu, vobrazna kažučy», — miarkuje Piŭnienka.
I dadaje: «My vielmi šmat stracili svajho nasielnictva i terytoryi dla taho, kab prosta tak spynicca i prosta tak addać terytoryju».
Čaho Ukrainie nie chapaje dla pieramohi
Alaksandr Piŭnienka pierakanany, što ŭkrainskim vojskam pierš za ŭsio treba bolš roznaj zbroi.
«Heta mohuć być rakiety dalokaha dziejańnia, dla taho, kab źniščać kamandnyja punkty, źniščać ich piłotaŭ, tak jak jany robiać svaimi samalotami, svaimi KABami, čaho ŭ nas, na žal, niama ŭ toj kolkaści i ŭ tym abjomie, kab nanosić udar u adkaz», — kaža kamandujučy NHU.
Jon adznačaje, što va Ukrainy jość «Deep Strike» (katehoryja dalnabojnych udarnych bieśpiłotnikaŭ i dronaŭ-kamikadze), jakija vykonvajuć peŭnyja zadačy, ale na poli boju važna źniščeńnie na apieratyŭnuju hłybiniu.
«Na taktyčnym uzroŭni ŭ nas jość usie nieabchodnyja vidy ŭzbrajeńnia i drony, i FPV-drony. My pracujem vielmi niadrenna. A voś na apieratyŭnaj hłybini nam by treba było takoje ŭzbrajeńnie, jakoje mahło b dziejničać jak dalokamahistralnyja rakiety, typu ŭstanovak HIMARS, jakija b my zapuskali sa svaich samalotaŭ i vykonvali hetyja zadačy», — tłumačyć kamandujučy Nachvardyjaj.
Havoračy pra asabisty skład, Piŭnienka pryznaje, što Ukrainie nie chapaje sałdat, kab rabić ratacyi: «Kab u nas byŭ druhi kamplekt vojskaŭ, naprykład, i my mahli spakojna rabić ratacyi, kamplekt na kamplekt, davać ludziam adpačyvać, davać adpačynki. Na žal, hetaha ŭ nas niama ŭ poŭnaj miery».
Pra toje, jak źmianiłasia vajna
Alaksandr Piŭnienka vykonvaŭ zadačy piachotnika ŭ 2014 hodzie, a taksama piachotnyja šturmavyja dziejańni ŭ 2022 hodzie. Byŭ kamandziram bryhady ŭ 2023 hodzie, abaraniaŭ Bachmut.
«U pryncypie možna było spakojna dziejničać da taho momantu, pakul nie źjavilisia drony. Zaraz piachotnik — heta meta numar adzin. Jaho pieramiaščeńnie ŭskładniłasia ŭ sotni razoŭ», — raskazvaje Piŭnienka.
Jon tłumačyć, što asnoŭnaja zadača piachotnika — dajści niepaškodžanym da pazicyi, vykarystoŭvajučy, naprykład, pompavyja strelby abo śpiecyjalnyja patrony dla źniščeńnia dronaŭ, jakija jość na ŭzbrajeńni USU: «Padyści da pazicyj, zaniać pazicyju i prosta zamaskiravacca i nie pakazvać svajo znachodžańnie, kab praciŭnik nie razumieŭ, dzie my».
Pry šturmavych dziejańniach rasijskich vajennych, kaža hienierał, ukrainskim vajskoŭcam na pieršaj linii abarony nie dajuć kamandy vieści pa ich ahoń, kab nie vydać siabie.
«My ich u tyle, u druhim ešałonie źniščajem dronami. Tamu što viedajem, kali budzie aśvietlena hetaja pazicyja na pieršaj linii, to praciŭnik ubačyć, što tam niechta jość, tudy prylacić usio — ad artyleryi da biaskoncaj kolkaści dronaŭ», — tłumačyć kamandujučy NHU.
Hienierał adznačaje, što rasijskija vajennyja vielmi chutka vučacca i dziejničajuć zaraz «vielmi razumna».
«Jany ŭmiejuć karystacca tym resursam, jaki ŭ ich jość. Tak, jany šmat traciać ludziej, ale zachoplivajuć našy terytoryi. Ja liču, što vorah vielmi mocny i chutka vučycca», — pryznajecca Pivnienka.
Kolki jašče Ukraina hatova vajavać
Na pytańnie ab tym, jak zmahacca z praciŭnikam, jaki pieraŭzychodzić kolkasna, Piŭnienka kaža, što «cisnuć treba ekanamična».
«My možam abaraniacca i hod, i dva. Viadoma, z dapamohaj našych partnioraŭ: jeŭrapiejskich, Złučanych Štataŭ. Ale kali my budziem zabivać bolš i bolš rasijan, to hetym my nie skončym vajnu», — ličyć hienierał.
Jon adznačyŭ, što, niahledziačy na toje, što Ukraina straciła častku terytoryj, Kijeŭ nanosić škodu rasijskaj ekanomicy.
«Paślavajenny pieryjad dla ich budzie jašče ciažejšy, tamu što treba budzie tłumačyć svajmu narodu, dla čaho naohuł hetaja vajna była i dla čaho stolki strat. My viedajem ceły rehijon, dzie ŭžo niama ludziej, u pryncypie, pryzyŭnoha ŭzrostu», — adznačaje Piŭnienka.
Zadača Ukrainy, kaža jon, heta zachavańnie terytoryj i asabistaha składu.
Kamandujučy NHU nie zhodny ź śćviardžeńniem Donalda Trampa ab tym, što kali nie budzie spynieńnia ahniu jak maha chutčej, to Ukraina prajhraje vajnu.
«Nu nie zusim. My možam jašče vajavać niekalki hadoŭ 100%. Ale ja liču, što naohuł vojny pavinny zakančvacca. Naohuł na hetaj płaniecie i naohuł zabivać ludziej dziela terytoryj i resursaŭ — heta dla nas vielmi niezrazumiełaja historyja. Heta pavinna skončycca», — adznačyŭ Piŭnienka.
Hienierał upeŭnieny, što ludzi stamilisia ad vajny.
«Usie chočuć, kab skončyłasia vajna. Ale hałoŭnaje pytańnie dla nas — jakoj canoj? Ci heta spynieńnie ahniu, ja dumaju, na što ŭsie buduć zhodnyja. I tady pieraasensavańnie dalejšych dziejańniaŭ i damoŭlenaściej. Ci straty terytoryi. Skažam tak, my addavać ničoha nie budziem, ja ŭpeŭnieny», — zaklučaje Piŭnienka.
Kamientary