«Paznajomiłasia ź dziadulem z Anhlii». Junaja hamialčanka ŭžo 6 hadoŭ adpraŭlaje i atrymlivaje paštoŭki ź inšych krain
Anhielinie z Homiela ciapier 18 hadoŭ, i tracinu svajho žyćcia jana zajmajecca postkrosinham — niezvyčajnym chobi, jakoje abjadnoŭvaje ludziej z roznych krain praz papiarovyja paštoŭki i ščyryja słovy, napisanyja ad ruki i adpraŭlenyja poštaj. Vydańnie «Mocnyja naviny» pahutaryła z Anhielinaj i daviedałasia, jak u jaje źjaviłasia heta zachapleńnie.
Pra postkrosinh dziaŭčyna daviedałasia ŭ 12 hadoŭ padčas karanavirusa, ad nudy dziaŭčyna šukała novyja zachapleńni. Tady jana pahladzieła šmat videa na YouTube, jakija tyčylisia tematyki postkrosinhu, i zarehistravałasia na śpiecyjalnym sajcie. U ankietach ludzi paznačajuć svaje imia, intaresy, mary i krychu raskazvajuć pra siabie.
«U 2021 hodzie ja navažyłasia adpravić svaje pieršyja paštoŭki: na płatformie mnie vypali niekalki adrasoŭ, i ja pajšła na poštu pa kartki. Doma ich zapoŭniła — starałasia kožnamu adrasatu padabrać paštoŭku ŭ zaležnaści ad jaho intaresaŭ i zachapleńniaŭ. U pasłańni krychu raskazała pra siabie i napisała ciopłyja pažadańni ludziam, jakim pryznačalisia hetyja paštoŭki, i adpraviła», — uzhadvaje hamialčanka.
Nieŭzabavie dziaŭčynie pryjšła jaje pieršaja paštoŭka z Hiermanii — jana ledź nie skakała ad radaści. Toj dzień staŭ dla jaje pa-sapraŭdnamu asablivym, i jana dahetul uzhadvaje jaho z uśmieškaj.
«Razam z paštoŭkaj ja atrymlivaju niepierakazalnyja pačućci i emocyi. Ja nie viedaju navat, jak apisać, nakolki pryjemna ŭ viek telefonaŭ i sacsietak atrymać kartku ad nieznajomaha čałavieka, napisanuju ad ruki. Mnie zaŭsiody vielmi cikava čytać pra zachapleńni i žyćcio ludziej ź inšych krain», — raskazała padletak.
Zvyčajna na listy, jakija adpraŭlaje čałaviek, adkazu nie prychodzić, ale adnojčy Anhielinie dasłali paštoŭku ŭ adkaz. Mužčyna raskazaŭ joj krychu pra siabie i pachvaliŭ jaje YouTube-kanał, jaki dziaŭčyna paznačyła ŭ svaim liście.
«Ja napisała list dziadulu ŭ Anhliju i nieŭzabavie mnie pryjšła paštoŭka ŭ adkaz. Heta było vielmi pryjemna, ale hetaja historyja nie skončyłasia. Jon staŭ dasyłać mnie paštoŭki znoŭ i znoŭ. Brytaniec raskazvaŭ pra svaje padarožžy, pra miescy, dzie byvaŭ, i pra ludziej, jakich sustrakaŭ. Samaje miłaje, što jon vybiraŭ paštoŭki z vyjavaj tych miescaŭ, kab ja taksama ich ubačyła. Usiaho jon dasłaŭ mnie kala 20 listoŭ. Časam heta byli vialikija paštoŭki, a časam — maleńkija, a niečym jon dzialiŭsia prosta na arkušy papiery, jaki adpraŭlaŭ u kanviercie», — padzialiłasia emocyjami Anhielina.
Dziaŭčyna zaŭsiody čytaje apisańnie akaŭnta čałavieka i vybiraje paštoŭki pa asacyjacyjach. Za 6 hadoŭ jana adpraviła bolš za 50 paštovak, a joj pryjšło prykładna stolki ž, kali nie brać pad uvahu listy, adpraŭlenyja joj z Anhlii. Pavodle jaje słoŭ, u postkrosinhu jość niešta niezvyčajnaje. Heta mahčymaść dakranucca da žyćcia nieznajomaha čałavieka — možna daviedacca historyju pra chatnich hadavancaŭ ci pra niezvyčajny vopyt padarožža na rovary, pryčym u najdrabniejšych detalach.
Ciapier čytajuć
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary