Pra śmierć mastactvaznaŭcy Juryja Abdurachmanava, stvaralnika muzieja Chaima Sucina ŭ Śmiłavičach, paviedamiła ŭ fejsbuku kulturołah Julija Čarniaŭskaja.
Juryj Abdurachmanaŭ naradziŭsia ŭ 1959 hodzie. U 1984 hodzie skončyŭ pierakładčycki fakultet Minskaha instytuta zamiežnych moŭ. Peŭny čas vučyŭsia i pracavaŭ za miažoj — u Francyi, Bielhii i Ałžyry.
Byŭ stvaralnikam i dyrektaram pryvatnaj ustanovy kultury «Spadčyna i čas» u haradskim pasiołku Śmiłavičy Červieńskaha rajona. Taksama ŭvachodziŭ u apiakunskuju radu muzieja «Prastora Chaima Sucina» ŭ Śmiłavičach i staŭ inicyjataram stvareńnia ŭ hetym muziei zały, pryśviečanaj mastaku Šrahu Carfinu.
Jon byŭ taksama aŭtaram šerahu knih i publikacyj pra mastakoŭ Paryžskaj škoły. U 2016—2017 hadach čytaŭ lekcyi pra hetu škołu na radyjo «Kultura».
Vystupaŭ kurataram roznych vystaŭ sučasnych biełaruskich mastakoŭ u Biełarusi, Litvie i Francyi. Byŭ hałoŭnym kurataram vystavy «Šraha Carfin. Toj, što vioŭ da śviatła», jakaja prachodziła ŭ Nacyjanalnym mastackim muziei Biełarusi ŭ 2019—2020 hadach.
Taksama byŭ adnym z zasnavalnikaŭ mižnarodnaj kanfierencyi «Sucinskija čytańni». Akramia taho, vystupiŭ aŭtaram idei, scenarystam i pradziusaram dakumientalnaha filma «Błukajučaja zorka sa Śmiłavičaŭ», pryśviečanaha mastaku Šrahu Carfinu.
Byŭ členam ICFA (Mižnarodnaha kamiteta muziejaŭ i kalekcyj vyjaŭlenčych mastactvaŭ).
«Dobry, razumny, iraničny, vielmi prystojny. Tam, dzie jon ros, na ŭskrainie impieryi, u maleńkim pasiołku, u jaho byli dobryja nastaŭniki — represavanyja kandydaty i daktary navuk. Jany jaho šmat čamu navučyli — advazie, stojkaści, što nie adrazu było vidać za jaho krychu «francuzistym» šarmam, za jaho śvieckaściu. Ja, jakaja viedała jaho choć i nie blizka, ale ŭ ciažkija časy, viedała hetuju advahu i hetuju prystojnaść», — napisała Julija Čarniaŭskaja.
Ciapier čytajuć
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary