Pačałasia rabočaja pajezdka ŭ Polšču pretendenta na pasadu prezidenta Jarasłava Ramančuka, namieśnika staršyni Abjadnanaj hramadzianskaj partyi (AHP).
Jak paviedamiŭ lidar AHP Anatol Labiedźka, u Ramančuka ŭ Polščy zapłanavana šyrokaja prahrama sustreč i pieramoŭ. "Siońnia Ramančuk sustreŭsia z maršałkam sienata Polščy Bahdanam Barusievičam, praviadzie paŭtarahadzinnuju pres-kanfierencyju dla polskich ŚMI, sustreniecca z pradstaŭnikami dziełavoj i ekśpiertnaj supolnaści. 12 kastryčnika ŭ jaho zapłanavana sustreča z kiraŭnikom polskaha MZS Radasłavam Sikorskim, a taksama kiraŭnikom kamiteta pa mižnarodnych spravach siejma Andžejem Chalickim", — paviedamiŭ Labiedźka.
Pavodle jaho słoŭ, niadaŭna ŭ AHP byŭ stvorany saviet pa źniešniaj palitycy. "Adnosna našaj zachodniaj susiedki my vypracavali pytańnie "Polšča: nadzieja ci rasčaravańnie?". Padčas svajho vizitu Ramančuk pavinien atrymać adkaz na hetaje pytańnie i pasprabavać pierakanać polskich palitykaŭ u tym, što ciapier u Biełarusi jość realny šans dla pieramien. Bo ŭ dzień vybaraŭ 19 śniežnia padziei nie zakančvajucca, heta nie kropka ŭ vybarčaj kampanii, a tolki koska. I dla pieramien u Biełarusi treba prykładać namahańni nie tolki ŭnutry krainy, ale i zvonku", — ličyć Labiedźka.
Jon adznačyŭ, što rola Polščy ŭ demakratyzacyi Biełarusi ŭzmacnicca paśla 1 studzienia 2011 hoda, kali kraina budzie staršynstvavać u Jeŭrasajuzie. "Tamu Ramančuk pradstavić polskim palitykam minimalny pakiet taho, što Polšča moža zrabić adnosna demakratyzacyi Biełarusi", — skazaŭ Labiedźka. Taksama Ramančuk pieradaść palitykam susiedniaj krainy bačańnie AHP sankcyj u dačynieńni da vyšejšych biełaruskich čynoŭnikaŭ.
Kamientary