Siastra aryštavanaha kandydata ŭ prezidenty Andreja Sańnikava Iryna Bahdanava źviarnułasia z adkrytym listom da prezidenta Rasii Dźmitryja Miadźviedzieva.
Pavažany spadar Miadźviedzieŭ,
Usie ludzi zdolnyja rabić pamyłki. Pamylacca nie strašna i nie hrešna, kali čałaviek hetyja pamyłki pryznaje i sprabuje ich vypravić. Vypraŭlać pamyłki nikoli nie pozna, i tvar čałaviek pry hetym nie hublaje, a čaściakom nabyvaje pavahu ludziej.
Pryznańnie vybaraŭ u Biełarusi lehitymnymi i vinšavańnie Łukašenki było Vašaj pamyłkaj. I jašče nie pozna jaje vypravić. Ja nie sumniavajusia, što ŭ Vas byli niejkija damoŭlenaści ź im, i Vy, napeŭna, sprabujecie ich vykonvać. Heta razumieje ŭvieś cyvilizavany śviet. Ale ci žadajecie Vy, kab hety śviet asacyjavaŭ Vas z dyktataram i złačyncam?
Ja nie palityk i nie chaču ŭdavacca ŭ acenku palityčnaj situacyi. Nie sumniavajusia, što ŭ Vas jość daradcy, jakija jaje vydatna ŭjaŭlajuć. Źviartajusia da Vas jak siastra adnaho z kandydataŭ u prezidenty, jaki byŭ žorstka źbity i aryštavany tolki za toje, što chacieŭ mirnych pieramovaŭ dla raźviazańnia situacyi, jakaja skłałasia ŭ krainie.
Sotni čałaviek u turmach, sotni źbityja biez usialakaj na toje padstavy. Jak čałaviek i jak žančyna ja malu Vas zrabić usio, što ŭ Vašych siłach, kab pieraduchilić hvałt i spynić niezakonnyja dziejańni suprać nievinavatych ludziej.
Vy skazali, što vybary - heta ŭnutranaja sprava kožnaj krainy. Moža być, i tak, ale razhon mirnaj demanstracyi, źbićcio biezabaronnych ludziej, aryšty nievinavatych, razhromy redakcyj haziet i sajtaŭ - heta hrubaje parušeńnie pravoŭ čałavieka. A heta ŭžo zusim nie ŭnutranyja spravy - heta datyčyć kožnaj krainy, kožnaha čałavieka.
Vy - prezident vialikaj krainy, i ja ŭpeŭnienaja, što ŭ Vašaj uładzie spynić hetuju samaŭpraŭnaść.
Dyk zrabicie toje, što naležyć prezidentu Rasii. Pierastańcie paturać złačyncam i zapatrabujcie nieadkładnaha vyzvaleńnia palityčnych źniavolenych.
Ćviorda vieru, što Vy možacie heta zrabić.
Iryna Bahdanava, siastra kandydata ŭ prezidenty Biełarusi Andreja Sańnikava
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary