Taćcianu Sieviaryniec za hadzinu da adjezdu ŭ Varšavu zatrymaŭ KDB, zabraŭ pašpart

Maci źniavolenaha palityka, jakaja źbirałasia sieńnia ŭviečary adjechać u Varšavu, zatrymali kala doma dački Hanny ŭ Miensku.

Pavodle Taciany Sieviaryniec, supracoŭniki KDB padyšli da jaje, kali jana ŭžo vypraviłasia na vakzał. Jany pradjavili joj pozvu da śledčaha pa proźviščy Sańko i skazali, što na dopyt jana musić źjavicca nieadkładna — pajechać razam ź imi.

U poźvie havorycca, što jaje treba dapytać u jakaści śviedki pa kryminalnaj spravie ab masavych biesparadkach u Miensku 19 śniežnia.

Zatrymańnie adbyłosia ŭ 19:40, kali da adpraŭleńnia varšaŭskaha ciahnika zastavałasia hadzina. Supracoŭniki KDB skazali, kaža Taciana, što «jana paŭsiul paśpieje», adnak viciebskaja kaardynatarka arhkamitetu BCHD i maci źniavolenaha Paŭła Sieviarynca ŭ heta nia vieryć. Naadvarot: jana pierakanana, što terminovy vyklik na dopyt spatrebiŭsia mienavita na toje, kab na ciahnik jana spaźniłasia.

* * *

Vyjšaŭšy kały 22.45 ź mienskaj upravy KDB, spadarynia Taciana paviedamiła, što dopyt doŭžyŭsia bolš za paŭtary hadziny. Infarmacyju pra sustreču z synam, jakaja źjaviłasia na niekatorych internet-sajtach, jana kateharyčna abvierhła.

Śledčaha KDB cikaviła, dzie Taciana Sieviaryniec znachodziłasia 19 śniežnia. Pra sustreču sa źniavolenym u SIZA KDB Paŭłam Sieviaryncam havorki nie było.

Spadarynia Sieviaryniec raspaviała, što ŭ KDB u jaje zabrali pašpart, jaki potym nie viarnuli. Jana kaža, što pašpart znachodziŭsia ŭ supracoŭnika, jaki nie nazvaŭ siabie, ale pradstaviŭsia psycholaham. Kali dopyt u śledčaha zaviaršyŭsia, psycholah zajaviŭ, što choča jašče parazmaŭlać z aktyvistkaj, što ŭ jaho jość da jaje “cikavyja prapanovy”.

Taciana Sieviaryniec praciahvać razmovu admoviłasia, bo śpiašałasia na vakzał: pakolki na ciahnik, kab pajechać u 20.40 u Varšavu, jana spaźniłasia, to chacieła chacia b zdać svoj bilet. Ale supracoŭnik KDB tak i nie viarnuŭ joj pašpart. Taciana Sieviaryniec patelefanavała śledčamu, jaki jaje dapytvaŭ, kab znajści taho, u kaho zastaŭsia dakument. Ale śledčy skazaŭ, što nia viedaje, chto heta byŭ. Spadarynia Sieviaryniec źbirajecca pisać skarhu na dziejańni supracoŭnikaŭ KDB.

Nahadajem, što maci źniavolenaha palityka zatrymali kala 19.40 – za hadzinu da adychodu varšaŭskaha ciahnika. Spadarynia Sieviaryniec źbirałasia pajechać u Varšavu, ale kala padjezdu, kali jana vychodziła ad svajoj dački Hanny, joj uručyli pozvu na dopyt.

• 0
• 0
• 0
• 0
• 0
• 0
• 0
• 0