Chronika vybuchaŭ u Biełarusi: 1997-2011

Vybuch u minskim mietro ŭžo nie pieršy ŭ Biełarusi ŭ apošnija hady. TUT.BY uzhadvaje papiarednija padobnyja incydenty.

1997: Chvala vybuchaŭ pa krainie

1 kastryčnika 1997 hoda ŭ padjeździe ŭłasnaha doma ŭ Mahilovie byŭ zabity staršynia dziaržkantrolu pa Mahiloŭskaj vobłaści Jaŭhien Mikałucki. Zakładzienaja ŭ śmiećciepravod bomba była pryviedziena ŭ dziejańnie z dapamohaj radyjosihnała. U aficyjnym niekrałohu kanstatavałasia, što Mikałucki «zahinuŭ u vyniku terakta». Troch mahiloŭcaŭ, abvinavačanych u arhanizacyi zabojstva, asudzili. Čaćviorty, major KDB u adstaŭcy, zhodna z aficyjnaj viersijaj, nakłaŭ na siabie ruki ŭ śledčym izalatary Mahiloŭskaha UUS.

Paśla sudu, jaki adbyvaŭsia pry začynienych dźviarach, Ała Mikałuckaja, jakaja padčas vybuchu znachodziłasia pobač z mužam, zajaviła: «Ja viedaju, što zakazčyk chodzić na voli… Zabojstva majho muža — hetaje palityčnaje zakaznoje zabojstva».

Potym u presie źjaviłasia nieaficyjnaja infarmacyja, nibyta ŭ siejfie čynoŭnika byli znojdzieny vialikija hrošy, a zabojstva nasiła «kamiercyjny charaktar».

Charakterna, što ŭ tym ža 1997-m pa Biełarusi prakaciłasia cełaja chvala vybuchaŭ: na hazakampresarnaj stancyi Krupki Minskaj vobłaści, hazapravodzie Taržok-Minsk-Ivacevičy, u sudach Savieckaha rajona Minska i Minskaha rajona Zasłaŭla, a taksama ŭ padjeździe žyłoha doma na staličnaj vulicy Avakiana. Nichto nie paciarpieŭ, a adkaznaść za vybuchi na siabie brali dźvie nieidentyfikavanyja arhanizacyi — «Biełaruskaja vyzvolnaja armija» i «Novy paradak». 21 kastryčnika prezident Biełarusi padpisaŭ dekret № 21 «O nieotłožnych mierach po boŕbie s tierrorizmom i inymi osobo opasnymi nasilstviennymi priestuplenijami».

Vierasień 2005: Viciebsk

Adrazu dva vybuchi za tydzień adbylisia ŭ Viciebsku ŭ 2005-m — 14 i 22 vieraśnia. Ad mietaličnaha načyńnia samarobnych bomb u vyniku pieršaha paciarpieli dva čałavieki, paśla druhoha — bolš za 40. Niekatoryja haziety atrymali paviedamleńni, u jakich adkaznaść za vybuchi brała na siabie nieviadomaja «Biełaruskaja narodna-vyzvalenčaja armija». Niekalki aktyvistaŭ apazicyi nazyvalisia ŭ jakaści padazravanych ŭ złačynstvach, adnak vinavatyja dahetul nie asudžany.

4 lipienia 2008: Minsk

Da siońniašniaj trahiedyi ŭ mietro najbujniejšy terakt u historyi suvierennaj Biełarusi adbyŭsia 4 lipienia 2008 hoda. Samarobnaje vybuchovaje prystasavańnie, načynienaje mietaličnymi detalami i ŭładkavanaje va ŭpakoŭku soku, spracavała, a pałovie na 1-ju nočy na skryžavańni praśpiektaŭ Mašerava i Pieramožcaŭ, dzie prachodziŭ śviatočny kancert ŭ honar Dnia Niezaležnaści. Na prylehłaj da sceny terytoryi znachodziłasia kala paŭmiljona čałaviek. Na ščaście, nichto nie zahinuŭ, adnak za dapamohaj da miedykaŭ źviarnulisia 54 čałavieki, 47 ź jakich byli špitalizavanyja.

Padčas śledstva supracoŭniki pravaachoŭnych orhanaŭ uziali adbitki palcaŭ u bolš, jak 1,3 młn žycharoŭ Biełarusi. Bolš za 100 čałaviek prajšli pa spravie ŭ jakaści padazravanych. Ź piaci pieršapačatkovych viersij złačynstva zastałosia dźvie. Milicejskija čynoŭniki zajaŭlali ab najaŭnaści psichałahičnaha partreta złačyncy, adnak jon dahetul nie znojdzieny.

• 0
• 0
• 0
• 0
• 0
• 0
• 0
• 0