Aŭtamabilnaja revalucyja ŭ Minsku: sotni mašyn zabłakavali centr horada

Pratest suprać rostu cenaŭ: u aŭtorak sotni aŭtaamataraŭ zabłakavali praśpiekt Niezaležnaści ŭ Minsku.

Pratest aŭtamabilistaŭ suprać padaražeńnia paliva pieraros u vykazvańnie ahulnaha niezadavalnieńnia situacyjaj u ekanomicy.

7 červienia minskija aŭtamabilisty zładzili akcyju pratestu suprać padaražeńnia paliva.

DAI i AMON byli biaśsilnyja suprać socień mašyn: na niekalki hadzin ruch na centralnym praśpiekcie stalicy byŭ błakavany.

Kałona aŭto z uklučanaj avaryjnaj sihnalizacyjaj i simvolikaj akcyi «Stop bienzin!» — vyjavaj čałaviečka, jaki «stralaje» sabie ŭ skroniu z zapraŭnaha pistaleta ci biełaj stužkaj na antenie — raściahnułasia ad Hałoŭpaštamta da Centralnaha ŭniviersama. Nasustrač joj ruchałasia druhaja, što zajmała praśpiekt miž płoščami Jakuba Kołasa i Pieramohi.

Krajniuju pravuju pałasu praśpiekta Niezaležnaści arhanizatary akcyi — hramadskaja inicyjatyva «Za aŭto» — zaklikała pakidać volnaj dla ruchu hramadskaha transpartu. Nie zaŭždy heta ŭdavałasia. Adnak nichto nie pieražyvaŭ: pasažyry vychodzili z aŭtobusa i… apładziravali ŭdzielnikam akcyi. Hledačoŭ sabralisia sotni: ludzi machali aŭtamabilistam, kryčali «Stop bienzin!»,

Našy reparciory nie zafiksavali nivodnaj niehatyŭnaj reakcyi.

Na most cieraź Śvisłač u znak padtrymki źjechalisia dziasiatki ravarystaŭ.

Aŭtamabilisty błakavali milicejskija evakuatary, jakija sprabavali adciahnuć mašyny, što spynialisia. Dzie-nidzie daišniki pad ahulny śmiech sprabavali adkacić ich uručnuju. DAI dziejničała biez ahresii, AMON maŭčaŭ. Kala kramy «Karavaj» sumavaŭ niezadziejničany aŭtazak.

U natoŭpie na tratuary la HUMa apynulisia zamiežniki, miarkujučy pa akcencie, niemcy. Jany spytalisia ŭ žančyny, što stajała pobač z reparcioram «NN»: što adbyvajecca? Žančyna adkazała im koratka: padaražeńnie paliva. «Tut blizka rezidencyja kiraŭnika dziaržavy, — zapytalisia niemcy, — niaŭžo biełarusy nie bajacca pratestavać?» — «Raniej bajalisia, bo žorstka razhaniali, — skazała kabieta, — ale ciapier situacyja ŭ krainie takaja, što strach źnik».

«Daviali narod da krajnaści», — padsumavała jana.

* * *

Chranałohija padziej

19.29

Nasuprać KDB na praśpiekcie pavolna idzie kałona kala sotni mašyn. Jeduć marudna ŭ bok Kastryčnickaj płoščy. Z uklučanaj avaryjkaj». Faktyčna možna skazać, što ruch u toj bok zabłakavany, pieradaje karespandent «NN».

19.33

Kala cyrku niekalki dziasiatkaŭ mašyn stali z uklučanaj avaryjkaj.

19.34

Jak pieradaje karespandent «NN», ad Hałoŭpaštamtu da Kastryčnickaj płoščy ruch faktyčna spyniŭsia: usio zabłakavana mašynami. Krajniaja pravaja pałasa dla aŭtobusaŭ i maršrutak volnaja.

19.36

Kala piacidziesiaci mašyn z uklučanaj avaryjnaj sihnalizacyjaj błakujuć ruch kala cyrku. Jany ruchalisia z boku Kastryčnickaj płoščy. Na praśpiekcie harmidar. Mašyny sihnalać.

19.40

«Hałava» kałony, što idzie ad Hałoŭpaštamtu — nasuprać univiersama «Centralny». Jany ruchajucca vielmi pavolna. Niekalki mašyn zusim spynilisia. Kiroŭcy adčynili kapoty. Da ich padyšli pradstaŭniki DAI. Na chodnikach na praśpiekcie źbirajucca ludzi, jakija apładysmientami vitajuć akcyju.

19.42

Sotni mašyn błakujuć ruch pa praśpiekcie ŭ abodva baki na płoščy Pieramohi. Dziasiatki mašyn majuć simvoliku akcyi. Na tratuarach sabralisia tłumy ludziej. Jany vitajuć kiroŭcaŭ vopleskami.

19.46

Da płoščy Pieramohi pryjechaŭ evakuatar. Sprabuje adciahnuć mašyny, jakija stali. Kiroŭcy i ludzi na chodnikach aburajucca. Sihnały aŭto čuvać na prylehłych vulicach.

19.48

La «Centralnaha» supracoŭniki DAI sprabujuć rukami vyšturchać z prajeznaj častki aŭto, jakija spynilisia. Ludzi sustreli heta družnym śmiecham i krykami: «Šturchaj, šturchaj!» Mnohija aŭto, što jeduć ad płoščy Pieramohi ŭ bok Hałoŭpaštamta taksama majuć na sabie simvoliku akcyi i biełyja stužački.

19.50

U rajonie Kastryčnickaj płoščy ruch na praśpiekcie zabłakavany ŭ abodvuch kirunkach.

19.53

Na ŭsioj praciahłaści ad płoščy Jakuba Kołasa da płoščy Pieramohi praśpiekt taksama błakavany. Aŭtamabilistaŭ vitajuć sotni ludziej na tratuarach. Da kramy «Karavaj» padahnali aŭtazak.

19.55

Zabłakavanaje całkam koła płoščy Pieramohi.

19.56

Ad Kastryčnickaj płoščy ŭdzielniki akcyi pačynajuć patrochu raźjazdžacca. Na chodnikach za pratestam aŭtamabilistaŭ tam naziraje kala čatyrochsot čałaviek.

19.57

Ad płoščy Pieramohi da cyrku mašyny stajać. Ludzi masava pavychodzili z mašyn. Filmujuć zator pratestu na mabilnyja telefony. Śpiecnaz nie ŭmiešvajecca.

19.59

Na moście cieraź Śvisłač sabralisia dziasiatki ravarystaŭ, jakija padtrymlivajuć akcyju.

20.01

Da akcyi dałučylisia i asobnyja bajkiery. Jany stajać u šerahach mašyn i sihnalać. Niekatoryja ŭdzielniki vystavili pustyja kanistry na dachi.

20.02

Ludzi na tratuarach žyva abmiarkoŭvajuć situacyju. Reakcyja na akcyju absalutna pazityŭnaja.

20.06

Na moście cieraź Śvisłač DAI pasprabavała spynić kiroŭcu na šerym «fordzie-univiersale». Da jaho ruchaŭsia milicejski evakuatar, ale inšyja kiroŭcy zabłakavali jamu šlach. Daišniki zmušanyja byli adstupić.

20.07

Kiroŭca «leksusa» z rasijskimi numarami pacikaviŭsia va ŭdzielnikaŭ akcyi, što adbyvajecca. Paśla abjechaŭ zator, uklučyŭ "avaryjku" i taksama pajechaŭ pavolna.

20.08

Kala «Centralnaha» niekalki socień čałaviek na tratuarach skandavali: «Stop bienzin!»

20,16

Ad 19.50 DAI zabłakavała praśpiekt u kirunku płoščy Pieramohi z boku płoščy Jakuba Kołasa. Jana skiroŭvaje transpart na vulicu Kazłova i praśpiekt Mašerava. U tym liku i aŭtobusy maršrutu 100.

20.18

U masavym prateście ŭdzielničajuć kiroŭcy samych roznych aŭto -- ad starych "falksvahienaŭ-holf" i "žyhuloŭ" da "krajśleraŭ", "BMV" i "miersedesaŭ" apošnich madelaŭ.

20.23

Kala "Makdonaldsa" spynilisia i bieznadziejna "pałamalisia" niekalki aŭto. Ich kiroŭcy navat sieli na ziamlu pobač. DAI padychodzić da kožnaha, sprabuje raźbiracca, što zdaryłasia. Adbyvajecca heta ŭ spakojnaj abstanoŭcy.

20.29

Asnoŭny "ačah supraciŭleńnia" -- ad skryžavańnia praśpiekta z vulicaj Lenina da płoščy Pieramohi. Tudy nahnali evakuataraŭ i DAI. Kiroŭcy impravizujuć i iduć na chitryki: čaplajuć tych chto "złamaŭsia" na tros, pavolna ciahnuć praśpiektam, spyniajucca.

20.32

U natoŭpie na tratuary kala HUMa apynulisia zamiežniki-niemcy. Jany pytajuć u žančyny pobač: što adbyvajecca? Žančyna tłumačyć im sutnaść pratestu aŭtamabilistaŭ. Tut blizka rezidencyja kiraŭnika dziaržavy, dziviacca zamiežniki, niaŭžo biełarusy nie bajacca pratestavać? Raniej bajalisia, bo žorstka razhaniali, kaža surazmoŭca, ale ciapier ekanamičnyja ciažkaści, situacyja z valutaj i palivam takaja, što strach źnik. "Daviali narod da krajnaści", -- padsumoŭvaje jana.

21.25

Akcyja praciahvajecca. Jaje epicentr — Kastryčnickaja płošča. U abodva baki ad jaje pa praśpiekcie ciahnucca łancuhi aŭto ŭdzielnikaŭ pratestu. Jany jeduć pavolna z uklučanaj «avaryjkaj», sihnalać. Ich vitajuć sotni ludziej na tratuarach. Źjaviłasia novaja moda: «achviaravańnie na bienzin». Hledačy kidajuć na aŭto drobnyja rublovyja kupiury. Atmaśfiera karnavalnaja.

21.32

Karespandent «NN» zapytaŭsia ŭ ludziej, jakija kidali drobnyja kupiury pad koły aŭto, navošta jany heta robiać. «Bo heta ŭžo nie hrošy, a fanciki, za ich ničoha nie kupiš», — byŭ adkaz. Takim čynam, akcyja suprać padaražańnia paliva pierarasła ŭ ahulny pratest suprać situacyi ŭ ekanomicy.

* * *

Arhkamitet ruchu «Za aŭto» raspaŭsiudziŭ płan akcyi «Stop-bienzin» 7 červienia, u suviazi z pavyšeńniem cen na paliva. Jany zaklikajuć kala 19.20 družna vyjechać na praśpiekt, kab, a 19.30 zapoŭnić jaho. Aktyvisty ruchu za panižeńnie cenaŭ na bienzin zaklikajuć pryviazvać biełyja stužački da anten svaich aŭtamabilaŭ, prylaplać nalepki, uklučać avaryjku i ruchacca z panižanaj chutkaściu, pastupova źbirajučysia ŭ ahulnuju kałonu. Taksama miarkujecca, što ŭdzielniki pačnuć chaatyčna spyniacca (na roznych pałosach ruchu), adkryvać kapot, bahažnik, dastavać pustyja kanistry i pravodzić 15-chvilinny «ramont» svajho aŭtamabila, u jakoha nibyta skončyŭsia bienzin ci jaki pierastaŭ jechać.

Inicyjatary taksama zaklikajuć udzielnikaŭ nie zajmać krajniuju pravuju pałasu, kab nie pieraškadžać hramadskamu transpartu. «Pry kantaktach ci pretenzijach z boku pravaachoŭnych orhanaŭ zachoŭvajcie vałodańnie saboj, nie paddavajciesia na pravakacyi, nie ŭstupajcie ŭ niervovyja svarki. Budźcie hodnymi hramadzianami svajoj krainy, adstojvajcie svaje pravy», — tak skančajuć jany svoj zvarot.

• 0
• 0
• 0
• 0
• 0
• 0
• 0
• 0