Minski haradski sud pakinuŭ pryhvor lidaru mižnarodnaj maładziožnaj arhanizacyi «Małady front» (Čechija) Źmitru Daškieviču i aktyvistu hetaj arhanizacyi Eduardu Łobavu bieź źmianieńniaŭ. Pra heta BiełaPAN paviedamiła namieśnik staršyni «Maładoha frontu» Nasta Pałažanka.
17 červienia ŭ Minskim haradskim sudzie razhladałasia kasacyjnaja skarha na pryhavor Daškieviču i Łobavu. Maładyja ludzi byli zatrymanyja ŭ Minsku 18 śniežnia 2010 hoda. Pavodle infarmacyi HUUS Minharvykankama, u dvary žyłoha doma pa vulicy Janki Bryla jany niby źbivali Kanstancina Savickaha i Aleha Małyšava. Zatrymańnie Daškieviča i Łobava pradstaŭniki apazicyi i pravaabaroncy rascanili jak previentyŭnuju mieru milicyi napiaredadni vybaraŭ prezidenta.
24 sakavika Daškievič byŭ pryhavorany da dvuch hadoŭ pazbaŭleńnia voli ŭ kałonii ahulnaha režymu, Łobaŭ — da čatyroch hadoŭ u kałonii ŭzmocnienaha režymu. Takoje rašeńnie abjaviła sudździa Maskoŭskaha rajona Minska Alena Šylko.
Maładyja ludzi svajoj viny nie pryznali i abskardzili pryhavor u kasacyjnym paradku.
Vystupajučy ŭ sudzie z apošnim słovam, Daškievič vykazaŭ upeŭnienaść, što ŭsie, chto łžyva śviedčyŭ suprać jaho, i tyja «niby paciarpiełyja», jakija davali pakazańni ŭ sudzie z susiedniaha pakoja (pavodle aficyjnaj viersii, sud źmiaściŭ ich tudy ź mierkavańniaŭ biaśpieki. — BiełaPAN.), u budučym abaviazkova buduć spraviadliva pakaranyja.
«Usie vydatna viedajuć, što ja i Łobaŭ daŭno zajmajemsia palityčnaj dziejnaściu i napadać na kahości za dzień da vybaraŭ, „padpału Rejchstaha“, nam było b vielmi niavyhadna», — zajaviŭ Daškievič.
Łobaŭ padtrymaŭ svajho tavaryša, dadaŭšy, što heta była «dobra spłanavanaja pravakacyja śpiecsłužbaŭ».
Kamientary