Dziemčuka paviali pa druhim kole

U sudzie Pieršamajskaha rajona Minska pačaŭsia novy razhlad kryminalnaj spravy pa abvinavačańni kiraŭnika TDA «Pierśpiektiva-Inviest Stroj» Siarhieja Dziemčuka.

Słuchańni, što raspačalisia ŭ sakaviku pad staršynstvam sudździ Taćciany Masalskaj, skončylisia pšykam — davioŭšy spravu da stadyi sprečak, sudździa syšła ŭ dekretny adpačynak. Pa zakonie pačynać ciapier treba było z samaha pačatku.

Nahadajem, što Departamient finansavych rasśledavańniaŭ (DFR) KDK vystaviŭ Dziemčuku abvinavačańnie pa art. 216 KK — «Učynieńnie majomasnaj škody biez prykmiet kradziažu, u bujnym pamiery». Viadomy ŭ minułym budaŭnik šmatuzroŭnievych parkinhaŭ stalicy, Dziamčuk vyrašyŭ zaniacca žyllom. U 2005 hodzie źjaviłasia abjava ab pryciahnieńni dolščykaŭ kompleksu «Hrupa žyłych damoŭ, jakija nie adnosiacca da žyłych damoŭ pavyšanaj kamfortnaści, u kvartale vuł. Filimonava — Parnikovaja — Makajonka — pr. Niezaležnaści ŭ h. Minsku», pačaŭsia zbor hrašovych srodkaŭ. Ale prajekt prahareŭ. Hrošy, sabranyja na śpiecrachunak TDA «Pierśpiektiva-Inviest Stroj» — usiaho bolš za 11,3 młrd rubloŭ — vydatkavanyja nie pa pryznačeńni, 128 hramadzian, jakija zastalisia biez kvater, pryznanyja paciarpiełymi.

U abvinavačańni Dziamčuk nazvany zasnavalnikam, faktyčnym ułaśnikam i kiraŭnikom TDA «Pierśpiektiva-Inviest RID» (dyrektar — rodny brat abvinavačanaha), TAA «Parkinh-Inviest Stroj», TDA «Vytvorča-inviestycyjnaja hrupa», STAA «Staličny centr», TDA «Pierśpiektiva-Inviest Stroj», TDA «Armiejec» (hienpadradčyk na budaŭnictvie abjektaŭ). Nibyta, vykarystoŭvajučy pravy ŭłaśnika, Dziamčuk rasparadžaŭsia srodkami dolščykaŭ jak chacieŭ.

Zamiest taho kab nakiroŭvać hetyja hrošy na budaŭnictva, padnačalenyja jamu dyrektary nazvanych kampanij zaklučali damovy pa pastaŭkach budmateryjałaŭ dla žyłych kompleksaŭ, jakija nasamreč nie zakuplalisia.

Pavodle viersii śledstva, hrošy dolščykaŭ vykarystanyja inšymi strukturami Dziemčuka — dla apłaty pracentaŭ pa kredytnaj damovie, prajektna-vyšukalnych rabot i inš. Značnyja srodki pieraličanyja na rachunak «Armiejca» — kampanii, u dačynieńni da jakoj ciapier inicyjavanaja pracedura bankructva.

Paśla abviaščeńnia abvinavačańnia 21 vieraśnia sud dapytaŭ Dziemčuka, jaki znoŭ zajaviŭ pra nievinavataść i pierypietyi zakanadaŭstva, jakija zaminali pabudavać žyły kompleks.

Jak paviedamiŭ Dziamčuk, paśla pačatku ŭ 2005 hodzie zboru srodkaŭ dolščykaŭ prezident Biełarusi niečakana zaćvierdziŭ novy hienpłan Minska, što abaviazała zabudoŭščyka padać šerah dakumientaŭ. A kali papiery byli hatovyja, byli pryniatyja zakony ab ziamli i achovie pryrody, jakija ŭskładnili budaŭnictva. Vyjaviłasia, što abjekt Dziemčuka ŭvajšoŭ u 500-mietrovuju achoŭnuju zonu vadajoma, što vyklučała viadzieńnie budaŭničych prac. Kali ž dazvoł na budaŭnictva ŭsio ž byŭ atrymany, vyjaviłasia, što prajektavalniki pamylilisia z analizam hruntu miesca zabudovy — pali, jakija pačali zabivać, nie trymalisia. I jašče adna biada — zabivańnie palaŭ pieraškodziła pracy vysokadakładnaha abstalavańnia Biełhidramietcentra, jaki znachodziŭsia pobač z kvartałam zabudovy. Kali ž narešcie i heta pieraškoda była pieraadolenaja, skončyŭsia dazvoł na budaŭnictva.

Takija ŭ ahulnych rysach pryčyny, jakija, pavodle słovaŭ Dziemčuka, nie dazvolili vykanać abaviazańni pierad dolščykami. Ale biznesoviec źbirajecca sadziejničać uźviadzieńniu dla ich žylla, dy jašče bieź indeksacyi cen, pra što zajaviŭ padčas dopytu. Kali ž chto-niebudź choča viartańnia hrošaj — treba nabracca ciarpieńnia. Dziamčuk źbirajecca razdavać pazyki tolki paśla pačatku budaŭničych rabot. Kali jany pačnucca, nieviadoma.

P. S. Pieršaje sudovaje śledstva nieadnarazova zaciahvałasia. Stamiŭšysia čakać prysudu, na novy sud paciarpiełyja nie pryjšli. Kali novy staršynia pahodzicca abviaścić pakazańni, dadzienyja imi raniej, sprava moža chutčej dajści da prysudu.

• 0
• 0
• 0
• 0
• 0
• 0
• 0
• 0