ŽŽ‑karystalniki pałka abmiarkoŭvajuć scenary i miesca praviadzieńnia Dnia Voli 2007 i inšych manifestacyjaŭ sakavika.
Niahledziačy na toje, što lidery apazycyi vyrašyli pravieści hałoŭnuju akcyju 25 sakavika na Kastryčnickaj płoščy, karystalniki «Žyvoha žurnału» vysoŭvajuć svaje prapanovy.
Aktyŭna abmierkavańnie idzie ŭ supołcy «Minsk_baj». Karystalnik de_norbu piša: «Mnohimi pryniataje rašeńnie iści 25. Mnohija pojduć ‑‑ 19. Chtości ‑‑ 20. I navat jość tyja, chto 23‑ha ŭ 03:15 [Pałatačny haradok byŭ źniščany 24 sakavika ŭ 03:15 -- NN]. (...) Ale ci pryjdzie 19 sakavika na Płošču Labiedźka, jak zajaŭlaŭ raniej, ci hatovyja ŭziać inicyjatyvu ŭ svaje ruki, chłopcy, što kazali ŭ hutarcy «Našaj Nivie»: «My ŭziali na siabie adkaznaść za Płošču, my hatovyja ŭziać adkaznaść za Krainu», dzie buduć u hety čas «Małady front», BUNT, ruchi «Za svabodu», «Salidarnaść»...»?
Copish adkazvaje: «Nia stolki važna, kali prychodzić – 25 ci 19‑ha. Da «sarkafahu» ci da vakzału. Važna, kab usie pryjšli ŭ adzin čas i ŭ adno miesca. Pryčym važna pa adzinaj pryčynie: pa adnamu razhaniać‑zatrymlivać praściej.
Revanshist iranična adhukajecca na roznahałośsi ŭ stanie apazycyi: «Niachaj tyja kamu padabajecca Milinkievič prychodziać 25‑ha, kamu Labiedźka – 19‑ha. U kaho ludziej bolej, toj i maje racyju. Padtrymlivajučy toj ci inšy bok, kožny z nas kryšačku pichaje historyju ŭ vyznačanym kirunku. A kali padtrymlivaje ŭsich, historyja topčacca na miescy. Prahres biez adboru niemahčymy, pavinien pieramahać macniejšy, a pieramožany pavinien sam syści».
Frizzby vykazvaje svajo mierkavańnie adnosna viesnavych akcyjaŭ nastupnym čynam: «A čamu nichto nie ŭličvaje, što 25 — heta niadziela! Vychodny! Heta ž vialiki plus! I jašče, voś usie my kryčym, što «abjadnanaja» apazycyja nijak nie moža abjadnacca i damovicca kančatkova”.
Anei_aka_kirian prapanoŭvaje ŭsim źbiracca nie na Kastryčnickaj, a na płoščy Niezaležnaści: «Čamu nie razhladajuć varyjant płoščy Niezaležnaści? Bo jana samaja vialikaja, znachodzicca ŭ samym centry, dy i źnizu zaŭždy možna zatarycca niečym smačnym».
Dzm23 u svaju čarhu ličyć, što najlepšym varyjantam zboru ludziej była b Pryvakzalnaja płošča, jakuju ciažka pierakryć. «La jaje raźmieščana čyhunačny vakzał, aŭtavakzał, metro, dziesiatak tralejbusnych i aŭtobusnych prypynkaŭ, šmat ludziej, vialikaja kolkaść padziemnych pierachodaŭ. U toj čas, jak Kastryčnickaja lohka pierakryvajecca pa perymetru, metro, adzin aŭtobus, mała ludziej».
Internaŭtam karcić dziejničać pa-za virtualnaj realnaściu...
Kamientary