Niazdolnaja kankuravać z zamiežnymi vytvorcami, Biełaruś abmiažuje impart administratyŭna

Prem'jer-ministr Michaił Miaśnikovič daručyŭ uzmacnić kantrol za spažyvieckimi cenami. Adpaviednaje daručeńnie było dadziena 27 śniežnia na pasiadžeńni Savieta ministraŭ.

Pavodle źviestak dziaržaŭnaha ahienctva BiełTA, Miaśnikovič daručyŭ vice-premjeru Siarhieju Rumasu i ministru ekanomiki Mikałaju Snapkovu «terminova padrychtavać pamiesiačnyja hrafiki kantrolu miežavych źmianieńniaŭ spažyvieckich cen pa hrupach tavaraŭ i pasłuh, rehijonach». «Kab inflacyja za 2012 hod nie pieravysiła 19–22%», — rastłumačyŭ premjer.

Jon źviarnuŭ uvahu na roźnicu cen na asobnyja hrupy tavaraŭ u razrezie roznych rehijonaŭ krainy. Tak, pavodle słoŭ Miaśnikoviča,

za 11 miesiacaŭ hetaha hoda ceny na małako i małočnyja pradukty ŭ Hrodzienskaj vobłaści ŭzraśli ŭ paŭtara raza, u toj čas jak u Homielskaj — u dva.

Toje ž samaje, pavodle jaho słoŭ, adbyvajecca z meblaj, jakaja ŭ Viciebskaj vobłaści padaražeła na 48%, a ŭ Minsku — u 2,2 razu.

Pryrost cen na miedpasłuhi ŭ Minskaj vobłaści skłaŭ 54%, u Mahiloŭskaj — 85%. «Heta nie poŭnyja prykłady, adpaviednyja słužby ministerstvaŭ i abłvykankamaŭ pavinny pryncypova adsočvać hetyja pytańni i likvidavać pierahiby», — zapatrabavaŭ Miaśnikovič.

Jon taksama zajaviŭ pra nieabchodnaść bolš žorstkaha paradku impartu.

Havorka idzie ab źmianieńni paradku impartu. «Nie buduć uvodzicca abmiežavańni, prosta paradak budzie inšy, kab paźbiehnuć masavych pasrednikaŭ i kab pakazčyki pa imparcie byli racyjanalizavanyja», — rastłumačyŭ Miaśnikovič.

Kiraŭnik urada taksama ŭkazaŭ na nieabchodnaść udakładnić zadańni nacyjanalnaj prahramy raźvićcia ekspartu i «surjozna dabavić» pa impartazamiaščeńni. Adkaznymi ŭ hetym pytańni vyznačany Minekanomiki, MZS i Akademija navuk.

Miaśnikovič nahadaŭ, što ŭsie patrabavańni pa impartazamiaščeńni byli «jasna akreślenyja» na niadaŭnim sieminary, jaki prajšoŭ pad kiraŭnictvam Alaksandra Łukašenki. Na dumku premjera, mnohija ministry, kiraŭniki kancernaŭ i departamientaŭ słaba adreahavali na daručeńni prezidenta i pratakolnyja daručeńni kiraŭnika ŭrada. «Praca idzie viała, kali nie biezadkazna», — skazaŭ Miaśnikovič.

Jon zapatrabavaŭ vykanańnia pastaŭlenych zadač i zaznačyŭ, što času da novaha hoda zastałosia vielmi mała. Tych, chto nie vykanaje pakazčyki, buduć čakać dyscyplinarnyja spahnańni, papiaredziŭ prem'jer-ministr.

• 0
• 0
• 0
• 0
• 0
• 0
• 0
• 0