Fotafakt: Šyrokafarmatny kalandar da 130-hodździa Kołasa
Šykoŭnaje vydańnie padrychtavaŭ Valer Drančuk pry niepasrednym udziele akcyjaniernaha tavarystva «Minskvodbud».
U sieryi «Malaŭničaja Baćkaŭščyna» pabačyŭ śviet vialikafarmatny kalandar na 2012 hod, pryśviečany 130-hodździu Jakuba Kołasa. Na dvaccaci dvuch staronkach pamieram 45×60 źmieščana kala 150 fatahrafij, pieravažna biełarusich krajavidaŭ, tvory vieršavanaj spadčyny («Moj dom», «Rodnamu kraju», «Lasam Biełarusi», vierš 1937-ha hoda «Noč pad Novy hod», inš.), list u CK na abaronu biełaruskaj movy, a taksama małaviadomyja staronki ŭspaminaŭ pra pieśniara, rannija partrety piśmieńnika. Aŭtar sieryi i kiraŭnik prajekta (jon ža fotamastak i ŭkładalnik vydańnia) Valer Drančuk kaža: «Choć kalandar i paznačany łahatypam budaŭničaj kampanii, jaho ciažka adnieści da tak zvanych karparatyŭnych vydańniaŭ, jano całkam kulturnaje i litaraturna-mastackaje, a ŭ šyrokim sensie hramadska-kulturnaje. Bo vidavočna i metaskiravana adkazvaje zapatrabavańniam hramadskaj supolnaści nasupierak uładnamu aficyjozu i vyklikam rusifikacyi ŭ Biełarusi. Heta nie adno dałučeńnie da vialikaj spadčyny, abahačeńnie kulturnym skarbam nacyi, ale interpretacyja paetyčnaha śvietu i vobrazaŭ Kołasa srodkami fatahrafii i dyzajnu. Heta sproba, u rešcie rešt, adzin hod pažyć ź vialikim paetam, padychać rodnym słovam, travoj i listotaj. Ale najpierš tut pryrodalubnaja Biełaruščyna, naša kłasičnaja patryjotyka i, nie pabajusia skazać, hłabalnaja ekałohija — vierš „Naš dom“ nievypadkova staŭ nazvaj kalendara i varty hetkich słoŭ».
Drančuk płanuje pravieści kala dziasiatka prezientacyj i majstar-kłasaŭ, padaravać vydańnie aktyŭnym i znakavym ludziam, u tym liku ŭsim palitviaźniam abo ich siemjam.
Varta dadać, što heta dziasiaty kalandar u sieryi «Malaŭničaja Baćkaŭščyna» (z 2001-ha). Byli «Niaśviž. Vodna-parkavy krajavid», «Duby i dubrovy», «Śviatyja krynicy» dy inš. A letaś na 2011 hod byŭ vydadzieny taki samy, jak i sioleta, — jubilejny «kupałaŭski» kalandar.
Kamientary