«Kurier»: Aŭstryjski łabist Łukašenki maje dypłamatyčny pašpart

Hazeta krytykuje viedamstva za toje, što niekatoryja byłyja federalnyja čynoŭniki dy palityki, jakija skamprametavali siabie, dahetul karystajucca dyplamatyčnymi pašpartami.

Adzin ź ich — Hubert Horbach, u minułym ministar transpartu i vice-kancler Aŭstryi, a ciapier kiraŭnik firmy «Gorbach Consulting» i kansultant «Wintertechnik Engeneering». Abiedźvie kampanii viaduć u Rasiei i Biełarusi šerah prajektaŭ, u tym liku źviazanych sa śniežnymi technalohijami i stvareńniem infrastrukturaŭ na zimovych kurortach.

U interviju dla «Kurier» Horbach paćvierdziŭ, što maje dyplamatyčny pašpart, i vykazaŭ mierkavańnie, što heta zvyčajnaja ŭsiaśvietnaja praktyka — vydavać padobnyja dakumenty ŭ jakaści bonusu byłym vysokim čynoŭnikam dy palitykam.

Tym časam imia aŭstryjskaha eks-vice-kanclera i eks-ministra transpartu ŭsio čaściej traplaje ŭ ŚMI ŭ suviazi z samymi roznymi skandałami — ad kiravańnia transpartam u niećviarozym stanie da padazreńnia ŭ karupcyi i abvinavačańnia ŭ siabroŭstvie z aŭtarytarnymi režymami. U tym liku i z režymam Łukašenki.

U śniežni 2010 hodu Horbach byŭ zaprošany ŭ jakaści naziralnika i «hanarovaj persony mižnarodnaj palityki» (pavodle aznačeńnia kiraŭnika biełaruskaha MZS Siarhieja Martynava) na prezydenckija vybary ŭ Biełarusi. Dajučy im acenku, Horbach u interviju biełaruskim dy aŭstryjskim ŚMI nieŭzabavie adznačyŭ, što na tych učastkach, dzie jon byŭ, «Łukašenka atrymaŭ kala 70% hałasoŭ, što prykładna adpaviadaje ahulnamu vyniku».

Što da padziejaŭ, jaki adbylisia paśla vybaraŭ, to pra ich «hanarovaja persona mižnarodnaj palityki» raspaviała hetak:

«Demanstranty pasprabavali šturmam uziać štab vybaraŭ, byli raźbityja vokny. Upeŭnieny, va ŭsich jość prava na samaabaronu. Akramia taho, asnoŭny pryncyp demakratyi — zhoda z bolšaściu. Ja čuŭ, što demanstracyi planavalisia zahadzia, niezaležna ad vynikaŭ hałasavańnia».

Praź niekalki miesiacaŭ, uviesnu 2011 hodu, zahnany ŭ kut zachodnimi žurnalistami ŭ suviazi ź jahonaj supracaj ź biełaruskim režymam, Hubert Horbach zajaviŭ ahienctvu Associated Press, što asudžaje «hvałt va ŭsich jaho formach». Jon zapeŭniŭ, što paśla śniežańskich vybaraŭ u Miensku byŭ u svaim numary ŭ hateli, ničoha nia bačyŭ i nia čuŭ pra žorstki razhon palicyjaj akcyi pratestu apazycyi».

Jak piša «Kurier», presavy sakratar aŭstryjskaha MZS Pieter Łaŭnski-Tyfental pryznaje skandalny charaktar padobnych vypadkaŭ, adnak pry hetym adznačaje:

«Pa linii MZS my nia možam siabie ŭ čymści paprakać. Zakanadaŭstva dazvalaje nam rehularna praciahvać termin dziejańnia dyppašpartu. Heta prablema, u vyniku vyrašeńnia jakoj my mahli b fundamentalna pierahledzieć svaje pohlady».

Hladzi taksama: Skandalny adpačynak Łukašenki ŭ Aŭstryi + ksierakopii rachunkaŭ za adpačynak i lačeńnie.

• 0
• 0
• 0
• 0
• 0
• 0
• 0
• 0